Македонија

Фатени дрвокрадци во каменичкото село Дулица

Кражбата на дрвна маса, како што информираа од каменичката полиција е забележана во два одделни случаи.

Фатени дрвокрадци во каменичкото село Дулица. Кражбата на дрвна маса, како што информираа од каменичката полиција е забележана во два одделни случаи при што е констатитано бесправно сечење на дрвна маса и притоа поднесени се кривични пријави против сторителите.

-Станува збор за два одделни случаи на дрвокрадство, при што во првиот случај се запленети тринаесет метри кубни огревна дрвна маса и истата е предадена во шумски плац. Во вториот случај во двор на семејна куќа е затечена бесправно исечена и складирана дрвна маса во количина од шест метри кубни и таа исто така е одземена. Против сторителите се поднесени соодветни пријави, информираат од каменичката шумска полиција.

Во наредниот период како што додадоа планирани се зголемени контроли и бараат од населението да ги почитува законите и да не врши бесправна сеча на шумите.

За бесправна сеча на шума обвинуваат и жители на делчевското село Ѕвегор.

-Забележано е масовно уништување на борова шума во атарот на место викано „Габи", каде дрвокрадците ја користат ситуацијата со коронавирусот, со тоа што масовно сечат бор на споменатото место. Случајот го пријавивме до надлежните органи, велат сопственици на имот на споменатото место во Ѕвегор.

Од делчевската шумска полиција потврдија дека жители пријавиле за наводната бесправна сеча на шума, за што се зајакнати контролите во тој дел од атарот на село Ѕвегор./МИА

Живот

„Најубава станбена зграда во светот“ се наоѓа во Хрватска

На наградите за архитектура „Биг си“ (Big See), зграда во Кутина, Хрватска, го доби престижното признание „Најубава станбена зграда во светот“ - од сите регистрирани во 2024 година.

Објектот е изграден во 2021 година, а вкупната негова квадратура е 1.969 квадратни метри. Главен белег на поголемите апартмани се кујните на предната страна, коишто може да се користат како трпезарии. Становите се прилично светли и имаат нетипично богат просторен стандард за современото домување, се наведува во описот.

Приземјето е малку повисоко од станбените катови и е целосно застаклено, поделено со врати, што му дава достоинство на јавен простор. На истото приземје, има и пекара и кафуле споени едно до друго.

Фото: БИГ СИ

Свет

Во Баварија уапсени двајца руски шпиони

Федералните обвинители уапсија вчера двајца осомничени руски шпиони во Баварија под сомнение дека шпионирале и планирале напади врз воени цели за да ја поткопаат поддршката за Украина, пишува денеска „Еурактив“.

Двајцата мажи се осомничени дека работеле за странска разузнавачка служба во „особено тежок случај“, соопшти обвинителството. Едниот е обвинет и за планирање на напади, пред се против воена инфраструктура и индустриски капацитети во Германија.

- Нашите безбедносни власти спречија можни експлозивни напади за да ја поткопаат нашата воена помош за Украина. Ова е сериозен случај на сомнителна активност на агент на криминалниот режим на Путин, изјави за новинарите министерката за внатрешни работи Ненси Фезер.

Според обвинителството, главниот обвинет бил во контакт со лице поврзано со руската тајна служба од октомври 2023 година.

Двајцата мажи, исто така, се вели дека извидувале неколку потенцијални цели, вклучително и американски бази, каде што собирале информации поврзани со нападот. /МИА

Регион

Словенија: Покрај изборите за ЕП на 9 јуни, можно е да се одржат и три референдум

Надлежните комисии на Државниот збор (Парламентот) на Словенија треба да одлучат дали на денот на изборите за Европскиот парламент во Словенија, 9 јуни, ќе се одржат истовремено три референдуми.

Но, не постои единство во владејачката коалиција за ваквиот предлог. Претставниците на Движењето за слобода се „за“, Левицата е рамнодушна, а Социјалдемократите (СД), Словенечката демократска партија (СДС) и Нова Словенија (НСи) се против.

В петок матичните комисии на Државниот збор ќе подготват уредби за распишување три советодавни референдуми, иако коалицијата се уште не се договорила за датумот на нивното спроведување. Во Движењето за слобода бараат референдуми да се одржат на денот на европските избори.

По процедуралните компликации на вонредната седница на Парламентот во средата, претставниците сепак ги прифатија предлозите за распишување три советодавни референдуми.

Така, гласачите ќе го кажат својот збор на референдумите за регулирање на правото на помош при доброволно завршување на животот, за воведување преференцијално гласање на изборите за Државниот збор и за одгледување, преработка и употреба на канабис.

Датумот на нивното спроведување сè уште не е целосно дефиниран, кој се носи заедно со уредбата за распишување референдум. Иако датумот се уште не е договорен ниту во коалицијата, претставниците веќе в петок во матичните работни тела ќе почнат да ги подготвуваат одлуките за распишување на сите три референдуми.