„Ќе бараме сите такви патници на кои не може да им биде забранет влез да бидат изолирани десет дена без исклучок во сместувања обезбедени од владата, како хотели.“, рече денеска британскиот премиер Борис Џонсон пред парламентарците, говорејќи за патниците од високо ризичните земји, од кадесе шират нови соеви на коронавирусот.
„Ќе бидат ставени во карантин директно од аеродромот“, додаде Џонсон еден ден откако бројот на починатите од ковид-19 во неговата држава надмина 100.000.
Така, Велика Британија стана првата европска земја што ја преминала таа црна бројка и петта во светот зад САД, Бразил, Индија и Мексико.
Мерките се однесуваат на патници од 22 земји каде варијантите на вирусот „претставуваат ризик“, како што се Јужна Африка, Португалија и земјите од Јужна Америка. На луѓето кои немаат престој во Велика Британија веќе им е забрането да доаѓаат од овие земји.
Швајцарија денеска ги засили граничните контроли, така што од 8-ми февруари ќе бара од патниците од земјите со висок ризик да имаат негативен тест, објави владата.
Алпската држава ги заостри мерките против ширењето на коронавирусот оваа недела, но не воведува општ карантин како соседните земји.
На денешната седница, швајцарската влада предложила и удвојување на средствата за компании и занаети кои се сериозно погодени од рестриктивните мерки против коронавирусот, во износ од вкупно 5,63 милијарди евра.
Владата, исто така, планира да го активира механизмот со кој државата гарантира банкарски заеми на засегнатите компании.
Во Швајцарија од почетокот на пандемијата се заразени околу 515 000 луѓе, а 8,5 илјади починале.