Граѓаните се жалат дека како возачи имаат преголеми давачки кон државата, се плаќаат високи казни, скапи патарини, а, чест на исклучоците, возат по лоши патишта….
Граѓаните најмногу се жалат дека од Скопје до било кое туристичко место возат по небезбедни патишта на кои често има сообраќајни незгоди. За пример, го споменуваат реновираниот пат Маврово-Дебар, каде долж текот на Радика нема банкини.
На повеќето автопатски делници низ земјава сообраќајот во двата правци се одвива по една коловозна лента и наизменично минување од едната во другата насока, таков е случајот на автопатот „Пријателство“, на делницата Петровец - Катланово. Истото е и на новиот автопат Штип – Миладиновци каде поради одрон, подолго време сообраќајот се одвива во една коловозна лента.
Неодамна и ревизорите констатираа дека патиштата во земјава чинат премногу, а бавно се реализираат. Земјава потрошила 58 милиони евра само за камати, провизии и казни, а патиштата и пругите никаде ги нема, како што е случајот со автопатот Кичево – Охрид кој се гради веќе 8 години. Па така, по стариот пат поради недоволна сигнализација возачите кои транзитираат низ земјава- домашни и странски често знаат да ја погрешат насоката на движење.
Во меѓувреме, надлежните го скроија предлог измените со кои се предвува ново дело „безобѕирно возење“, со кое неколку дела во сообраќајот, кои се казнуваат прекршочно, како на пример пребрзо возење, да станат кривични дела. Оттука, граѓаните ја отворија дилемата – дали и надлежните институции треба да одговараат за небезбедните патишта.