Доделени признанијата „Успешни млади“ за значајни достигнувања во 2021 година

Признанието им се доделува на млади до 35 години. Годинава аплицирале 45 кандидати во седум од осум категории. Не е доделено признание само за млад иноватор зашто немало апликација. 

Седуммина млади кои постигнале извонредни резултати во 2021 година денеска го добија признанието „Успешни млади“ што го доделува Претседателот на Република Македонија како поттик на научноистражувачката мисла и уметничката работа на младите во нашата држава.

Признанието им се доделува на млади до 35 години. Годинава аплицирале 45 кандидати во седум од осум категории. Не е доделено признание само за млад иноватор зашто немало апликација. Посебна Комисија ги избрала седумтемина добитници, а признанијата денеска им ги врачи претседателот на државата Стево Пендаровски.

Виктор Стојкоски е награден за најдобар млад научник во општествени науки во минатата година. Тој е вклучен во глобалната научна дебата за актуелни економски прашања, вклучително и за влијанието и ефектите од пандемијата. Во категоријата хуманистички науки, признание за најдобар млад научник му беше доделено на поетот и есеист Иван Антоновски, кој понуди свеж поглед врз книжевното наследство на Блаже Конески и Горан Стефановски.

Андреј Ристески е најдобар млад научник во природно-математички и технички науки. Се занимава со машинското учење и вештачката интелигенција, со посебен фокус на т.н. длабоко учење и невронските мрежи. Гордана Георгиева доби признание за најдобар млад научник во медицинските науки. Таа е специјалист и автор на голем број трудови од областа на пластичната и реконструктивна хирургија.

На Нина Костовска ѝ беше доделено признание за постигнат особен успех и за афирмација на инклузијата, затоа што низ личен пример покажува дека попреченоста не е пречка за успехот и ги урива стереотипите во македонското општество. За најдобра млада уметница признание доби актерката Наталија Теодосиева, која со својот ангажман ја освојува публиката и доби повеќе награди на театарски и филмски фестивали во земјава и во странство.

Во категоријата „Млад талент“, во која конкурираат само ученици од средните училишта, признанието му беше доделено на Алексиј Тасиќ кој освои голем број златни и сребрени медали и признанија на државни и меѓународни натпревари и олимпијади по математика, физика и хемија.

Иако не е средношколец, во оваа категорија беше награден и Македон Димитровски, со што е направен исклучок во правилата за доделување на признанието. Комисијата одлучила да го награди овој најмлад добитник на признанието поради неговите натпросечно развиени академски вештини и меморија за што има добиено бројни награди.

Претседателот Пендаровски во обраќањето истакна дека овие млади луѓе се дел од креативното малцинство кое има потенцијал да направи значајни пробиви во своите области.

-Нивните биографии, трудови, референтни признанија, како и уметнички и општествени ангажмани сведочат дека секој од нив се фатил во костец со некои од големите прашања на науката, технологијата, уметноста и воопшто, општествениот развој. Тие не само што не се плашат да поставуваат тешки прашања, туку имаат доволно храброст, доблест и знаење, да предлагаат решенија низ сосема нови перспективи. А со тоа да придонесуваат и за севкупниот развој на својата земја, рече шефот на државата.

Овие успешни млади луѓе, додаде претседателот, се позитивен пример за нивните врсници, но и за генерациите што допрва доаѓаат. Нивниот пат до успехот, како што рече, не е ни малку лесен, бидејќи бара време и посветеност во континуитет.

Пендаровски порача дека институциите не смеат да си дозволат „да испуштат од рака вакви ретки таленти“ и дека државата мора да им овозможи „еднакви можности на сите да напредуваат, и да ги препознава и наградува најуспешните меѓу нив“.

-Токму тоа е главната цел на признанието „Успешни млади“ – да ја поттикне научната, истражувачката и креативната работа на младите. Но, со ова признание сакаме да постигнеме уште нешто, не помалку вредно – да го намалиме иселувањето на младите, образовани луѓе. Еден од нашите најголеми предизвици е незавидната состојба во која со децении се наоѓа образованието и науката во Македонија. Честите реформи на образованието и минималните вложувања во истражувањето и развојот резултираа со ниски резултати на многу евалуации во меѓународни рамки. Никогаш нема да дознаеме колку надарени ученици и студенти биле испуштени или превидени од нашиот образовен систем, или, колку млади образовани луѓе имаат заминато во развиени земји каде што нивниот талент и труд се единствен критериум за личен успех и кариерно напредување, нагласи Пендаровски.

Порака за поголема грижа од државата за младите таленти и поголемо издвојување за науката упати и д-р Трајче Стафилов, претседател на Комисијата која ги избра добитниците на признанието „Успешни млади“ за 2021 година.

– Освен што науката има свое значење во економскиот развој, има многу големо значење и во афирмацијата на една држава. Затоа е неопходна поддршката на научно-истражувачката работа од страна на надлежните институции во државата. Поддршката на научните работници во Северна Македонија е недоволна… Не можеме да очекуваме големи научни достигнувања ако подолг период не се финансирани, на пример, националните научно-истражувачки проекти, ако не се стипендираат наши талентирани млади истражувачи кои сакаат своето научно оформување и издигнување да го реализираат во земјава или ако се исклучени можностите за нивно вработување на факултетите и научните институции, рече претседателот на Комисијата за избор на лауреатите на признанието „Успешни млади“.

Пресврт на кинескиот пазар: Фолксваген веќе не е најпродаван бренд

Кинескиот BYD го престигна Volkswagen во рангирањето на најпродаваните брендови.

Според податоците на CMB (China Merchants Bank International), домашниот автомобилски гигант во ноември на кинескиот пазар продал дури 152.863 возила, што е неверојатни 83 отсто зголемување во споредба со истиот месец лани. Во исто време, Volkswagen продаде 143.602 возила, што е пад од 0,3 отсто и падна на второто место во рангирањето на најпопуларните. Ако на резултатот на Фолксваген се додадат 36.847 продадени Ауди, Фолксваген би ја задржал водечката позиција.

Иако недостасуваат податоци за последните неколку денови од ноември за конечната месечна позиција, речиси е сигурно дека BYD за прв пат во историјата ќе биде најпродаваната марка на автомобили на кинескиот пазар. Успехот е уште поголем бидејќи BYD нуди само електрични автомобили и plug-in хибриди.

А кога сме кај електричните автомобили, вреди да се спомене успехот на Tesla, кој ја удвои продажбата во Кина, пред сѐ благодарение на намалувањето на цените. Да напоменеме и дека BYD планира посилен ангажман во Европа, каде што ќе понуди многу конкурентни модели. Палетата наскоро би требало да вклучи дури пет модели.

Зечевиќ во Долнени: Национално, политичко и меѓуетничко обединување за европската иднина

Македонско обединување околу европскиот пат на државата, во најширока смисла-национална, меѓуетничка, политичка и општествена е патриотиски чин за заедничка европска иднина.

Ова го порача вечерва од Долнени, генералниот секретар на СДСМ, Миле Зечевиќ на работен состанок со членови и симпатизери на партијата од оваа општина.

Зборувајќи за основите на заедничкото живеење како социјалдемократски принципи Зечевиќ рече дека глобалните констелации повикуваат на заедничко делување и придонес за европската иднина на државата во интерес на сите нејзини граѓани.

-Европската интеграција е политичка визија за еден вид на договор на сите кои живеат во државата. Тоа е нашата одговорност, како принципиелна и државотворна партија, вкорената во македонската државност. Да се обединиме околу европските вредности и европскиот пат во најшироката смисла – национална, меѓунационална, политичка и државна. Ние, социјалдемократите, сме подготвени и пружаме рака за обединети да го креираме современиот пат на интегрирана, посилна и побогата македонска Република. Заедно да делуваме во констелацијата на идните регионални соработки, европски асоцирања, глобални позиционирања, рамо до рамо со европските нации со сите наши посебности. Само така може да ги одбраниме и заштитиме националните, државни интереси и да ја обезбедиме иднината на сите граѓани, рече Зечевиќ, се наведува во партиското соопштение.

Захарова: САД и НАТО уништуваа енергетски мрежи, потсетете се на нападите на Србија

Рускиот претседател Владимир Путин не е искрен за мировните преговори со Украина и ја носи војната на ново ниво на варварство обидувајќи се да ги изгаси светлата на цивилите, изјави вчера висок американски дипломат.

Американскиот потсекретар за политички прашања Викторија Нуланд се состана со претседателот Володимир Зеленски и други високи украински претставници во Киев за да покаже поддршка додека Русија се обидува да ја уништи енергетската инфраструктура на земјата.

„Дипломатијата очигледно е цел на сите, но мора да имате подготвен партнер“, им рече таа на новинарите. „И многу е јасно, без разлика дали станува збор за нападите врз енергетската инфраструктура, дали се работи за реториката од Кремљ и општиот став, дека Путин не е искрен или подготвен за тоа„.

Американскиот претседател Џо Бајден изјави во четвртокот дека е подготвен да разговара со Путин доколку рускиот лидер е заинтересиран да стави крај на војната. Но, идејата беше брзо закопана кога Кремљ рече дека Западот мора да ја признае анексијата на четири украински региони од Москва. Ваквата реакција на Русија, рече Нуланд, покажа „колку тие се несериозни“.

Русија агресивно ја напаѓа украинската инфраструктура за пренос на електрична енергија и греење од октомври, за која Киев и нејзините сојузници велат дека е намерна кампања против цивилите, воено злосторство.

„Путин ја однесе оваа војна на ново ниво на варварство, внесувајќи ја во секој дом на Украина додека се обидува да ги исклучи светлата и водата и да го постигне она што не можеше да го направи на бојното поле“, рече Нуланд.

Портпаролката на руското Министерство за надворешни работи Марија Захарова брзо одговори.

„Не е до Нуланд да го учи светот - САД и НАТО уништуваа енергетски мрежи“, реагира Захарова на каналот Телеграм, потсетувајќи на нападите врз Србија во 1999 година.

За време на нападот, воените авиони во Србија ја исклучија електричната енергија на повеќе од 70 отсто од областа, според НАТО. Нуланд се сретна и со Андриј Јермак, шеф на канцеларијата на Зеленски, кој изрази благодарност за помошта вредна милијарди долари од Вашингтон за Украина.

„Победата на Украина, во која сме сигурни, ќе биде наша заедничка победа“, ја цитираше неговата изјава од канцеларијата на Зеленски.

притисни ентер