По паузата , како што рече Џафери ќе се продолжи со 136 . седница на која прва точка ќе биде разрешувањето на министерката за труд и социјална политика , Рашела Мизрахи.

Џафери не прецизира кога ќе се гласа за законот за ЈО , откако беше исцрпена дискусијата и ги прекори дел од пратениците за синоќешната преписка на Фејсбук .

Тој остави на координаторите на партиите да решаваат кога ќе се гласа по Законот за Јавно обвинителство и предлог законот за Советот на јавни обвинители, откако координаторите ќе го обезбедат потребното мнозинство.

На 135. седница освен Предлог-законот за ЈО е и Предлог-законот за изменување и дополнување на Законот за Советот на јавни обвинители.

Седницата на која прва точка е законот за ЈО почна синоќа, но беше одложена за денеска поради големиот број пратеници пријавени за дискусија. Расправата по предложениот текст почна попладнево по повеќекратни процедурални забелешки, тензични реплики, контрареплики, обвинувања и контраобвинувања за криминал, како и по две паузи од по еден час. Владејачкото мнозинство остана на ставот дека со носењето на законот почнува вистинската борба против корупцијата и криминалот, а според ВМРО-ДПМНЕ законот е неуставен и се турка на сила со единствена цел – Заев и други владини функционери да се заштитат за сторениот криминал. Реагираше и Независната пратеничка група со остри критики кон ВМРО-ДПМНЕ.

За изгласување на законот се неопходни најмалку 80 пратенички гласови, односно двотретинско мнозинство од парламентарниот состав. Гласањето мора да биде најдоцна до недела на полноќ, кога е последниот рок за распуштање на Собранието во пресрет на предвремeните парламентарни избори.

Спикерот Џафери вечерва рече дека Собранието ќе работи без прекин, додека не се распушти.

Седницата за распуштање е закажана за недела во 12 часот.