Денот на Св. Климент Охридски собра стотици верници на едно место, во добро расположение, дојдоа на литургија да го одбележат празникот на својот патрон.

Здравјето, среќата и бериќетот се најгласни во молитвите, но се повеќе се слушаат и оние за мирот... Верниците со длабок наклон се прекрстија, барајќи од Светецот и Бога благосостојба во животот.

-Се помоливме за здравје, за мир да има насекаде, низ целиот свет и за нашиот народ, македонскиот, за сите словенски народи и за сите други народи, за сиот свет, да нема војни./ Многу убаво, величенствено, ако сака човек да се почуствува исполнет треба да дојде во светиот храм да се помоли за здравје за сите, за фамилијата./

Близината до Бога е клучот за среќен живот, бидејќи не учи на вистинските вредности, па битно е децата уште од малечки да го разберат тоа, велат дел од верниците.

-Ако сведочиме ние лично како родители со наш пример, тогаш ќе ги почувствуваат и ќе ги разберат нашите деца, ако не сведочиме, се е попусто ако одиме во црква.

А, со по некоја молитва на литургијата беа и најмалечките верници.

-За здравје, среќа и успех./ Се помолив веќе, за здравјето, мое и на мојата фамилија/ – Исто како него за сите.

Светец и просветител, прв македонски архиепископ и творец на охридската школа, Св. Климент Охридски има посебно место во срцата на верниците од земјава. Велат овој празник е свет за сиот македонски и православен народ, го одбележуваат со децении, а неговото негување не смее да застане.

-Го одбележувам секоја година, 85 години го одбележувам – Писмото, зборот, тоа е Св. Климент наш, како Бог што е за сите луѓе, Св. Климент е за нас, македонците./ Тоа е наш светец, наш, македонски светец, тоа највише ми значи мене./

Свети Климент е просветител, но пред се е светител и чудотворец, Бог по заслуга им дава на светците моќ да прават чуда, а Св. Климент со својот начин на живот тоа го заслужил, вели Отец Сашо.

-Ширењето на верата и мисионерската дејност на Св. Климент била рамна на рамноапостолите кои ја ширеле.

Празникот го одбележа и државниот врв во универзитетската библиотека која го носи името на светецот, а на неговиот споменик пред објектот беше положено и свежо цвеќе.