На два дена пред истекот на рокот за поднесување, во седиштето на Бихаќка пристигнаа две кандидатури- веќе најавената на заменик министерот за финансии Димитар Ковачевски и втората, помалку очекуваната на поранешната потпретседателка на партијата Фросина Ременски.
Во трката на 12ти месецов, Ковачевски кој важи за фаворит на Заев, рече дека ќе бара поддршка од членството со програма насловена “Заедно, одговорно и посветено”, а за евентуалното влијание на актуелниот претседател на партијата врз неговите одлуки, тој вели дека доколку победи, неговите политики ќе ги потврдел преку личниот интегритет.
-Една од моите основни заложби е да го вратиме единството во партијата и да го вратиме единството во општеството за да можеме да имаме посилни демократски партии и да имаме посилно општество, – Димитар Ковачевски – кандидат за претседател на СДСМ.
Два часа претходно, за лидер на СДСМ се самоканидираше и Фросина Ременски, која веќе две години не е дел од раководството на партијата откако беше отстранета од списокот на потпретседатели, по т.н. метла на Заев.. Нешто подоцна таа беше осомничена, па обвинета за случајот „Меѓународен сојуз“, за што се уште се води судски процес.
Во ист ден како и СДСМ, на 12ти декември, партиски лидер ќе бира и ВМРО-ДПМНЕ на редовниот Конгрес. Право на глас имаат над 500 делегати, а за избор на идниот лидер треба да гласаат мнозинство од вкупниот број. Актуелниот претседател Мицкоски ќе бара втор мандат, а дали ќе има противкандидати се уште не се знае.
Рокот за поднесување на кандидатури за претседател на ВМРО-ДПМНЕ е до самиот Конгрес, а кандидатите треба да имаат ажурирано партиско членство и да покажат поддршка од 30 делегати. Во СДСМ, пак, ќе се гласа на непосредни избори на кое право на глас ќе имаат сите членови кое ќе се регистираат, а кандидатите мора да имаат 5 години активно члнество и најмалку еднаш да биле избрани за член на некој партиски орган.