ДУИ го прекина молкот и на маса го става овој предлог како компромисно решение меѓу барањето на власта за избори во јуни и меѓу август или септември што се прифатливи за опозицијата. Од партијата на Ахмети за Канал 5 велат дека ќе пробаат да ги убедат Заев и Мицкоски дека овој термин е најдобриот за изборисо што би се запазиле законските рокови.
- Согласно околностите и очекувањата на граѓаните, но и на нашите меѓународни сојузници, кои очекуваат кредибилно демократски избрани и одговорни институции, краен логичен термин за можно одржување на избори би бил 5 јули, што овозможува и запазување на сите законски рокови за спроведување на изборен процес. – вели Артан Груби за Канал 5.
Двете најголеми македонски партии СДСМ и ВМРО-ДПМНЕ официјално не отстапуваат од своите позиции. Од двете страни немаше конкретен одговор дали за нив е прифатлив датумот 5 јули што го предлага ДУИ.
Од опозицисаката партија само повторуваат дека избори во јуни, како што бара СДСМ, за нив не е опција. За јули, одговор немаат.
– Она што можам да го потенцирам е дека избори во јуни не се можни. Тоа го докажува и актуелната ситуација со новозаразени кои што во моментов ги евидентираат здравствените установи. Од она што можам да кажам дека за датум за избори ќе мора да се разговара консензуално, односно во моментот кога ќе се оцени дека е можно да се одржат изборите, бидејќи најважно во моментов ни е здравјето на граѓаните, а не спас на нечија кариера на некој функционер од СДСМ – рече Арсовски.
Од СДСМ, пак повторија дека избори треба да се одржат во првиот можен термин. Простор за договор оставаат до крајот на неделава, кога завршува вонредната сосотојба. Математиките на СДСМ, но и ДУИ, се дека е важно датумот на изборите да биде одреден пред 30 мај, за изборните рокови да започнат да течат на 31 мај и со тоа ДИК да има доволно време за сите подготвки.
-Со ново Собрание и со нова политичка Влада со целосен легитимитет институциите целосно ќе бидат посветени на обезбедување на законите во државата и заштита на здравјето на граѓание.Особено во период кога се олеснуваат мерките и кога сите треба да се подготвуваме за новиот бран на коронавирусот наесен, истакна портпаролот на СДСМ Костадинов.
Вонредната состојба истекува во сабота, а дали владата ќе побара нејзино продолжување засега не е познато. Премиерот Спасосвски денеска рече дека одлуката ќе се носи по анализите деновиве, а дотогаш очекува и договор меѓу политичките партии околу изборите.
Нова лидерска средба засега не се планира, а од Кабинетот на претседателот Пендаровски велат дека се уште чекаат приближување на позициите на лидерите.