Чешка е на врвот на светот според новоинфицираните на 100.000 жители за 14 дена, и на второто место, по Словачка, според стапката на смртност, јавува АФП.
Владата, која минатата пролет успеала да го спречи ширењето на вирусот во првиот бран, оттогаш се бори со новите бранови на епидемијата на ковид-19.
„Ние сме на пат да останеме без капацитети за интензивна нега“, рече заменик-министерот за здравство Владимир Черни, изразувајќи жалење пред се поради недоволно квалификуваните здравствени работници.
"Во никој случај не можеме да ги задржиме сегашните норми на здравствена заштита, има забавување и одложувања во грижата за луѓето кои страдаат од други болести. Целиот систем е близу до своите граници", додаде тој.
Чешката Република има 10,7 милиони жители, а денеска имале 1.300 пациенти со ковид-19 на интензивна нега, од кои 660 на респиратори и поголем број на реанимација, објави Черни.
Земјата пријавила повеќе од 1.160.000 заразени и над 19.500 жртви од почетокот на пандемијата.
Според заменик-министерот, владата треба да побара од Германија да прифати чешки пациенти, пред се од тешко погодените региони на западот на земјата.
Пред две недели министерот за здравство Јан Блатни бил критикуван за отфрлање на германската понуда за олеснување на преполната болница во Чеб, на крајниот запад од земјата.
Владата им наредила на граѓаните од следниот четврток да носат маски FFP2 или подобро, две обични маски една над друга, во јавни простори, вклучително и продавници и станици за јавен превоз.
Од почетокот на месецот, три сериозно погодени области се ставени во изолација.
Рестораните, кината, театрите и повеќето продавници се затворени, како и училиштата, освен градинките и првите две одделенија од основните училишта.