Цените на нафтата се стабилизираа на 86 долари, трговците се плашат од рецесија

Цените на нафтата денеска се стабилизираа на меѓународните пазари блиску до нивото од 86 долари, притиснати од зголемените залихи во САД и стравувањата од рецесија што го надмина оптимизмот за закрепнување на побарувачката во Кина.

На лондонската берза цената на барелот по пладне беше речиси непроменета во однос на вчерашното затворање на трговијата и изнесуваше 86,06 долари. Вчера ја затворија трговијата во минус 2,06 долари.

На американскиот пазар барелот денеска се тргуваше по 27 центи повисока цена, по 80,40 долари. Вчера го затворија тргувањето со загуба од 1,49 долари. Трговците вчера беа вознемирени од знаците на слабеење на американската економија и неочекувано големиот раст на нафтените резерви во САД. Извештајот на компанијата S&P Global покажал пад на активноста на американската економија во јануари, седми месец по ред.

Залихите на сурова нафта во САД се зголемија минатата недела за околу 3,4 милиони барели, според трговски извори кои цитирале податоци од Американскиот институт за нафта (API). Податоците поттикнаа загриженост за побарувачката на нафта, засенувајќи го закрепнувањето на Кина по ублажувањето на мерките за ковид-19. „Дали цените на нафтата ќе продолжат да растат ќе зависи од тоа колку брзо кинеската побарувачка на сурова нафта ќе закрепне овој квартал“, рече Стивен Бренок од PVM.

„Во меѓувреме, вниманието е насочено кон состојбата на резервите на нафта во САД“, додаде Бренок. Трговците, исто така, внимателно ќе ги следат одлуките на Организацијата на земјите извознички на нафта (ОПЕК) и нејзините сојузници за снабдување.

Панелот на ОПЕК + најверојатно ќе ја потврди актуелната производствена политика на состанокот на 1 февруари, изјавија извори во групата производители. Тие во октомври одлучија да го намалат производството од ноември до крајот на оваа година за два милиони барели дневно поради послабите економски перспективи.

Одделно, ОПЕК денеска објави дека барел од нафтената кошница на нејзините членки вчера паднал за 1,34 долари на 84,89 долари.

Ковачевски: Ги реализираме и инфраструктурните проекти кои беа заглавени десетина години

Ги реализираме и инфраструктурните проекти кои поради лошо проектирање беа заглавени десетина години.

Повторно зголемување на платите и пензиите, амбициозен план за инвестиции, почеток на градежните работи на Коридорот 8, автопатско решение до Албанија и меѓу Прилеп и Битола, завршување на најголемите инфраструктурни проекти, браната Коњско, автопатот Кичево – Охрид.., се само дел од активностите за оваа година, најави денеска премиерот Димитар Ковачевски.

Во изјава за медиумите по завршувањето на првиот панел од конференцијата „Година на нови можности“, Ковачевски истакна дека оваа Влада веќе ги реализира проектите кои долго време беа заглавени, а интензивно се работи и на патиштата кои не беа направени.

Премиерот рече дека ако се има посветеност, фокус и волја, инвестициите може да се реализираат.

Ковачевски е согласен со стопанските комори дека инфраструктурата е врвен приоритет за успешно развивање на економијата и бизнисите во кој било регион.

– Бизнисот има право да го каже тоа. Јас сум поминал 22 години во приватниот сектор, сум бил дел од Стопанската комора и сум личен пријател со претседателите на сите комори. Во државата беа почнати неколку клучни инфраструктурни проекти пред десетина години кои не се реализираа зашто беа лошо проектирани. Патот Кичево – Охрид почна со интензивна реализација во 2022 година, зашто 25 отсто од трасата мораше одново да се проектира. Сега има над 75 отсто реализација на овој патен правец. Интензивно се работи и на патишта кои не беа направени. Комплетно е рехабилитиран патниот правец кај Плетвар, веќе е завршен едниот тунел во Фаришка Клисура, се пробива и вториот тунел со што ќе може да се поврзе патниот правец од Дреново до Плетвар, веќе се сменети изведувачите на магистралниот пат кон Бугарија што гарантира дека ќе бидат завршени инвестициите, го пуштивме патот Штип – Кочани, истакна Ковачевски во врска со прашањето „дали во оваа држава постои поим одговорност за доцнењето на инфраструктурните проекти“ што преку колумна го упати претседателот на Стопанската комора, Бранко Азески до Владата.

Тој повтори дека минатата година, иако беше најкризна, има највисоко ниво на капитални инвестиции во историјата на државата, 465 милиони евра.

– Овој тим што сега работи докажа дека може да ги одглави проектите поради лошите претходни проектирања и да ги спроведе. Владата има одговорност пред граѓаните да ги спроведе овие проекти, подвлече премиерот. – Комплетно се согласувам со Стопанската комора дека инфраструктура на врвно ниво е еден од предусловите за успешно развивање на економијата и бизнисите во кој било регион, потенцира премиерот.

Стоилковски: Власта да каже кои странски агентури влијаат на односите со Бугарија

Власта да не ги крие и да ги посочи со име кои се тие странски агентури кои влијаат на односите со Бугарија, да каже и кој ги финансира бугарските здруженија во Македонија.

Ако власта излегува со тврдење дека агентурни мрежи и странски пари се вклучени во креирањето тензии со Бугарија, бараме да не ги кријат и да ги посочат со име и презиме кои се тие агентурни мрежи и какво влијание прават. Бараме да се знаат и јавно да се идентификуваат за да граѓаните не подлегнуваат под нивно влијание, изјави Наум Стоилковски, портпарол на ВМРО-ДПМНЕ одговарајќи на новинарско прашање на денешната прес конференција.

Како второ, Стоилковски посочи дека се бара финансиските институции да го следат текот на парите и да објават како се финансираат бугарските здруженија во Македонија.

- Трето и многу важно за владата во Македонија е да побара од Бугарија доследно почитување на одлуките на Судот за човекови права во Стразбур. Четврто, власта да реагира на омаловажувачките и негаторски политики и изјави од бугарска страна, истакна Стоилковски.

Стоилковски потенцира дека наместо измеќар и поданички однос, владата да има достоинствени позиции и однесување.

Стоилковски: СДС и ДУИ ја втурнаа државата во енергетска, економско-инфлаторна криза, па се фалат со невидливи автопати и железници

Нема да бидеме злобни како СДС и нема да кажеме дека власта организира Панаѓур, како што тоа власта го оценуваше првиот дводневниот политички Саем на промените што носат иднина, вели портпаролот на ВМРО-ДПМНЕ, Наум Стоилковски запрашан за став за тоа што Владата одржува дводневна конференција, на која премиерот Димитар Ковачевски на отворањето посочи дека главна тема била континуитетот кон подобар стандард и услови за живеење на граѓаните.

За разлика од владата, посочи Стоилковски, ВМРО-ДПМНЕ и градоначалниците имаа со што да се пофалат реализирајќи крупни капитални и инфраструктурни проекти во сите полиња на општественото живеење, кои го олеснуваат и го подобруваат животниот стандард на македонските граѓани.

„Со таа разлика што ВМРО-ДПМНЕ и нејзините градоначалниците имаа со што да се пофалат во само една година, со 120 милиони евра реализирани проекти, 36 милиони евра за нови булевари и улици; 20 милиони евра во водоводна и одводна инфраструктура; проекти во градинки, училишта, спортот, културата“, истакна Стоилковски.

Потенцираше дека од друга страна владата на СДСМ и ДУИ немаат со што да се пофалат, се фалат со невидливи и непостоечки автопати и железнички, а единствено ако за нив за фалење тоа што Македонија ја втурнаа во енергетска, економска и инфлаторна криза.

„За разлика, СДС и ДУИ нема со што да се пофалат, освен ако е за фалење дека ја втурнаа државата во енергетска, економска, инфлаторна криза како и со невидливи автопати и железници и дека би продолжиле во стилот "како и до сега"“, рече Стоилковски.

Центар за комуникации на ВМРО-ДПМНЕ

Град Скопје: ВМРО-ДПМНЕ и СДСМ во коалиција против Данела Арсовска

Уште еднаш на дело се покажа коалицијата помеѓу СДСМ и ВМРО-ДПМНЕ при денешното гласање во Заедница на единиците на локална самоуправа на Република Македонија.

Со здружени гласови на градоначалниците на СДСМ и ВМРО-ДПМНЕ, претставници во ЗЕЛС, беше разрешена од позицијата претседател на ЗЕЛС, градоначалничката на Град Скопје, Данела Арсовска.

Ова е само последниот пример за соработката помеѓу две партии на штета на граѓаните за нивните лични и теснопартиски интереси.

На постојниот политички естаблишмент очигледно му пречат луѓе со визија, вредни и чесни, луѓе кои се независни и делуваат исклучително во интерес на граѓаните. На СДСМ и ВМРО-ДПМНЕ очигледно му пречат луѓе кои знаат да кажат не на корупцијата и криминалот, луѓе кои јавниот го ставаат пред бизнис интересот на врхушката во партиите.

Истите луѓе кои се најзаслужни за ерозија на македонското општество во сите сфери од денес ја превземаат контролата врз единствената национална асоцијација и непрофитна организација, во која на доброволна основа членуваат сите 80 општини и Градот Скопје.

Град Скопје

притисни ентер