Царовска: Покажавме дека промени се возможни, продолжувам да се борам за еднаквоста, ...

 Покажавме дека промени се возможни, продолжувам да се борам за еднаквоста, правата и интересите на децата, младите и жените.

И по заминувањето од функциите продолжувам да сум на страната на граѓаните, бидејќи верувам дека тие се единствените кои имаат моќ да ги менуваат работите на подобро. Продолжувам силно да се борам за граѓанските вредности, за еднаквоста, за интересите и правата на децата, младите и жените. Ова го истакна министерката за образование и наука Мила Царовска, во завршното обраќање на крајот од нејзиниот мандат, со кое им се заблагодари на граѓаните за дадената доверба да им служи во три наврати, како министерка за труд и социјална политика, вицепремиерка, а во последната година и половина и како министерка за образование и наука.

-Бев во влада предводена од социјалдемократи, кои успеаа да ја вратат слободата во општеството, вербата во институциите и да ја зајакнат меѓусебната граѓанска почит. Во еден исклучително тежок период, во време на транзиција од режим кон демократија, но и во време на сериозна здравствена криза, заедно со мојот тим покажавме дека можеме многу да придонесеме во справување со општествените и предизвиците на секој поединец и да направиме темелни промени кои водат кон подобро утре.Работевме интензивно, транспарентно и отчетно, оследно застапувајќи ги демократските, а почитувајќи ги граѓанските вредности, но и потреби, барања и иницијативи, притоа водејќи се по една и единствена мисла дека ова општество може и мора да биде еднакво за сите, дека има место за секого и секој заслужува подеднаков третман од државата, вели Царовска додавајќи дека е горда на постигнатите резултати.

Таа истакна дека со социјалната реформа која ја имплементирала како министерка за труд и социјална политика целосно е променет начинот на кој државата се грижи за најранливите.

– Системот на социјална заштита сега е подготвен да ги апсорбира сите семејства во социјален ризик, при што во моментов 35.500 домаќинства се приматели на финансиска помош која ја зголемивме речиси тројно, а обезбедивме и поддршка за вработување. За да ја намалиме детската сиромаштија, воведовме детски додадок кој го користат околу 47 илјади деца и образовен додаток кој го користат околу 30 илјади ученици и студенти, рече Царовска.

Со промените направени во секторот труд и социјала, нагласува, ги унапредивме и правата на лицата со попреченост и создадовме социјална сигурност за повозрасните. Решен е и деценискиот проблем на стечајците со обезбедувањето на месечен надоместок до пензионирање.

-Нашиот императив беше да создаваме вистински инклузивно и праведно општество, притоа менувајќи ја јавната перцепција за лицата со попреченост и создавајќи простор за нивна подеднаква вклученост во сите општествени процеси. Во оваа насока, донесовме и одлука да повеќе нема згрижени деца во сивите и гломазни институции. Тие сега живеат во семјна атмосфера, со повеќе љубов и внимание во малите групни домови, а „Тимјаник" стана синоним за борбата против дискриминација и за прифаќање на лицата и децата со попреченост во заедницата, рече Царовска.

Министерката посочи дека се направени сериозни инвестиции во раниот детски развој и воспитание, со изградбата на најсовремени градинки и вложување во усовршување и кариерен развој на воспитувачите и негователите со што е вратени достоинството на оваа професија.

Смета дека како министерка за образование и наука со образовната реформа е обезбедена добра основа за континуиран развој на националниот образовен систем.

-Усвоивме нова Концепција за основно образование со која се промени целосно пристапот во наставата и таа стана поинтересна, интерактивна и креативна. Започнавме со етапно воведување на нови наставни програми и современи материјали за учење базирани на интеркултурализам, еднаквост, недискриминација кои, освен печатени, достапни се и во дигитален формат, во аудио верзија, а се напишани и на Брајово писмо.Посебните училишта станаа основни училишта со ресурсни центри и тие обезбедуваат поддршка на секое училиште во кое има запишани ученици со попреченост, за што, ангажирани се 500 образовни асистенти кои повеќе не се товар на родителите и старателите, туку обврска на државата, вели Царовска.

Министерката посочи дека МОН изминатиот период работеше и на враќање на атрактивноста и вредноста на средните стручни училишта кои беа загубени поради негрижа во минатото.

-Концептот на дуално образование се прошири во целата држава, а во практичната подготовка на учениците се вклучи и бизнис заедницата. Основавме три регионални центри за стручно образование и обука со кои ќе се овозможи стручна надградба, доквалификација, или преквалификација заради полесно вработување и обезбедување економска лична независност, нагласува таа.

Министерката посочи дека ученичкиот и студентскиот стандард се издигнале на повисоко ниво и оти над 27 илјади, студенти добиваат субвенциониран студентски оброк, нова мерка за олеснување на студентскиот живот и поголем фокус кон суштината на студирањето. Според неа, поголемиот дел од стипендиите се зголемени за 80 проценти, но се воведени и нови категории.

-Особено сум горда што дури и во вонредни околности и услови на пандемија, овозможивме секое дете да продолжи да учи во училница, како најдобра опција од интерес на младите, рече Царовска.

Со процесот на дигитализацијата кој бил забрзан во изминатите година и половина, училиштата се опремиле со современа информатичка опрема, додека голем дел од услугите во областа на образованието – како уписи на првачиња, аплицирање за стипендии и сместување во ученички и студентски домови, станаа достапни електронски.

-За време на мојот мандат во МОН, изградивме неколку нови училишта и спортски сали, а повеќе беа опфатени и со реконструктивни активности. Имаме и проект за реконструкција и постигнување на целосна енергетска ефикасност на студентските домови кој е во тек и ќе се реализира до 2024 година, потенцира министерката.

Според Царовска, науката е заживеана со двојно зголемување на средствата за оваа намена. Во последните два месеца, нагласува, распределени се речиси 250 милиони денари за опремување и поддршка на научните лаборатории и за реализација на научно – истражувачки проекти од посебен интерес за граѓаните и државата.

Оризопроизводителите најавуваат протест ако поддршка за арпата не добијат повеќе земјоделци

Производителите на ориз од кочанскиот регион бараат што повеќе земјоделци да бидат опфатени со финансиската помош – три денари за килограм предадена арпа, а за тоа е неопходно, велат, рокот за предавање на арпата да се продолжи до јуни.

На Министерството за земјоделство му даваат рок од две недели да најде начин како ова да го спроведе. Во спротивно, најавија, ќе организираат нови протести и ќе ги блокираат магистралните патишта.

Производителите до петок очекуваат ресорното Министерство да организира средба на која ќе ги образложат барањата, но се надеваат и дека ќа се најде заедничко решение за да се избегне блокирањето на сообраќајниците.

-Нашите сознанија се дека само на 15 отсто од земјоделците кои успеале до 15 декември да ги предадат произведените количини, им е исплатена финансиската помош од КОВИД мерките. Тие временски не можеа да стигнат да ја продадат арпата, зашто жетвата на оризот завршува до крајот на октомври, ниту пак откупувачите физички со своите капацитети можеа да стигнат да ги исполнат условите. Исто така, не се опфатени ниту земјоделците кои арпата ја преработиле во бел ориз. Затоа бараме, редовните субвенции да останат по 3.000 денари за декар и да бидат исплатени за 15 дена, а рокот за откуп на арпата заради добивање дополнителната финансиска помош да се продолжи до јуни. Ако не добиеме позитивен одговор, ќе излеземе на протести со блокада на патиштата, изјави земјоделецот Здравко Коцев од Облешево.

Земјоделците кои произведуваат ориз се во дилема како ќе ја почнат сеидбената сезона оваа година поради драстично зголемените трошоци на вештачките ѓубрива и заштитните препарати.

-Една вреќа ѓубре од 25 килограми сега чини 1.650 денари, а ќе се покачат и цените на хербицидите, што значи дека трошоците по декар се зголемени за сто отсто. Со сегашните откупни цени не можеме да ги покриеме давачките, а не станува збор за заработувачка. Затоа очекуваме арпата да се откупува по 40 денари, а белиот ориз по 80 денари за килограм, истакна Стојче Ташевски, земјоделец од Облешево. /МИА

Одложено првото рочиште за случајот „Софтвери“ поради отсуство на една од обвинетите

Екс владиниот секретар Драги Рашковски од домашен притвор денеска беше спроведен во скопскиот кривичен суд каде започна судењето за набавката на сообраќајните софтвери.

Но рочиштето беше одложено поради отсуство на една од обвинетите и очекувањето на Апелација да се произнесе по жалбата на Рашковски според кој Обвинителството на незаконски начин прибавило докази против него, заради што вети интересен судски процес.

-Не може да имате во кој Обвинителството на својот компјутер во Word направиле текстуални пораки и заборавиле да го сменат времето и во една секунда има 43 пораки. Јас проверував, Гинисовиот рекорд е дека за педесет и нешто секунди можете да испишете една порака а не 43 во една секунда. Не може во 2015 година средства да потекнуваат од кривично дело од 2017, не треба да сте ни правник. Едноставно Холивуд да го режира ова не може така да го направи, вели Рашковски.

Освен по жалбата за доказите, Апелација треба да одлучи и по жалбата на Рашковски за одлуката на судот да му го замрзне имотот во април лани додека траеше истрагата по што и антикорупционерите дојдоа до сознанија дека стан од 65 квадрати во Скопје и земјиште од 11 илјади квадратни метри во викенд населбата Побожје, префрлил на своите малолетни деца. Рашковски тврди дека нема разлика во имотниот лист во времето пред и по завршувањето на функцијата во Влада, освен во подароците на децата.

-Од 2017 година кога сум влегол на функција до 2021 кога сум излегол, ќе видите дека не постои разлика освен подароците на моите две деца прибрани од родендени, крштевки, мекици итн. Друг податок за зголемување на имотот не постои. Значи сето тоа е само префрлено, како секој родител, ние сме традиционална земја, вели Рашковски.

Обвинителката Ивана Трајчева уверува дека во случајот се постапувало како и во други предмети. Вели и дека располага со цврсти докази против Рашковски и останатите обвинети.

-Постапувањето на Обвинителството во овој предмет ништо не се разликува од постапувањето во други предмети а за кои има правосилни судски одлуки и се познати во јавност како Рекет и 27 Април.Во суштина станува збор за докази од кои ќе се докажат сите факти кои се наведени во диспозитивот на обвинителниот акт, за секоја постапка посебно како и за хонорарците а и за кривичното дело перење пари, вели Трајчева.

Рашковски и уште шест лица одговараат за злоупотреба на службената положба и перење пари. Ден пред судењето тој во допис до медиумите, тврдеше дека системот за сообраќајни прекршоци кој никогаш употребен а исплатен над 70 илјади евра, ќе спасуваше животи на улиците. Следно рочиште е закажано за 24 февруари.

СДСМ: Законите важат за сите подеднакво, денеска тоа го потврди и Транспаренси

Соопштение за јавност - реакција на прес-конференцијата на Наум Стоилковски од ВМРО-ДПМНЕ.

Законите важат за сите подеднакво, без разлика за кое име и презиме станува збор, а тоа е потврдено и со случајот којшто го споменува ВМРО-ДПМНЕ.

Фактите се дека има судска пресуда за овој случај, потврдена и од Апелацискиот суд. Споменатите лица се осудени на затворска казна и ја имаат издржано казната.

Од ВМРО-ДПМНЕ очигледно не можат да се воздржат од пласирање на невистини и конструкции.

Денешниот Извештај на Транспаренси интернешнл потврдува дека законите важат за сите.

Една од главните причини за напредокот од 24 места е тоа што земјата има преземено конкретни чекори за кривично гонење на високи функционери од власта.

Центар за комуникации со јавноста на СДСМ

притисни ентер