Македонија

Царинска управа: Спречен обид за шверц - запленети 2,7 кг сребрен накит, 33 часовници ....

Во текот на изминатиот викенд, царинарниците на три гранични премини заплениле роба во вредност од 500.000 денари, со што спречиле избегнување на плаќање царински давачки од околу 150.000 денари.

Околу 2,7 килограми сребрен накит, 33 часовници, како и 160 парчиња облека со вкупна вредност од над половина милион денари се запленети од мобилни тимови на Секторот за контрола и истраги во три контроли на влез во државата на граничните премини „Богородица“, „Блаце“ и „Табановце“ во текот на изминатиот викенд. Со овие акции е спречен обид за шверц и избегнување плаќање царински давачки од околу 150 илјади денари, информираат од Царинската управа.

- Во првиот случај двајца сопружници на влез во државата на граничен премин „Богородица“ се обиделе нелегално да внесат околу 2,7 килограми сребрен накит. Накитот е откриен при контрола на куферите, при што во внатрешните џебови од облеката се пронајдени 37 пакувања со сребрен накит, а во возилото се пронајдени и три сметки од накитот кои биле на име на сопружникот, соопштуваат од Царина.

Во вториот случај станува збор за часовници што мобилниот тим на Царинска управа ги открил при контрола на автомобил на граничниот премин „Блаце“. Возачот на автомобилот ги скрил часовниците во црни ќеси кои ги ставил зад совозачкото седиште.

- Друг мобилен тим, пак, на граничниот премин „Табановце“ при извршена контрола на автобус откри и заплени 160 парчиња облека наменета за продажба на македонскиот пазар. Автобусот кој сообраќал на релација Белград – Скопје е селектиран за детален преглед при што под клупите и во фабричката шуплина над задните десни тркала се пронајдени непријавените парчиња облека, известуваат од ЦУ.

Оттаму, посочуваат дека во случајот на заплена на часовници и облека против лицата се поднесени прекршочни пријави. Во случајот во кој е запленет околу 2,7 килограми сребрен накит против лицето е поднесена кривична пријава до јавно обвинителство за кривично дело криумчарење, по што судот донесе одлука за одземање на накитот, парична казна од 2.500 евра во денарска противвредност и заплена на возилото со кое е извршено кривичното дело.

Македонија

ВРЕДИ: На четири тендери исплатени близу еден милион денари на фирма на внукот на Азири

Коалицијата Вреди и денеска на прес-конференција продолжи да објавува информации за тендери поврзани со фирми на семејството на пратеникот Елми Азири од Европскиот фронт.

-Вчера објавивме информации за тендерите кои фамилијарно поврзаната фирма на пратеникот Елми Азири ги добила од Министерството за политички систем и односи со заедниците, во времето на главниот логистичар на ДУИ, Артан Груби. Денес продолжуваме со објавување нови сознанија за тоа како истата фирма, чиј сопственик е внук на сопругата на пратеникот Елми Азири земала тендери од Општина Липково, од средното училиште „Исмет Јашари“ во Липково, од гимназијата „Сами Фрашери“ во Куманово и ЈЗУ Здравствен Дом – Куманово, истакна Бујаре Абази од Коалицијата ВРЕДИ на денешната прес-конференција.

На овие четири тендери, нагласи, фирмата РИТРОН КОПИ ДООЕЛ увоз-извоз Куманово, дала понуди за набавка на компјутерска опрема за што и биле исплатени без малку 1 милион денари.

-Овие информации јасно покажуваат дека без разлика дали се работи за набавки од помала или поголема вредност, без амин на ДУИ ниту една фирма не може да добие ниту денар. Очигледно е дека ДУИ владеел како мафијашка структура која не се воздржувала да ги злоупотребува народните пари за остварување политичко влијание, посочи Абази.

Во мрежата на ДУИ, како што кажа, се фаќале сите политичари „кои ја сфаќаат политиката и како можност за лично и фамилијарно богатење“.

-Затоа, го охрабруваме раководството на опозицискиот Европски Фронт, добро да му објасни на своето членство зошто клучните поранешни функционери на Али Ахмети и Зијадин Села се под сомневање за политичка корупција, порача Абази.

Култура

Изложбa на академскиот сликар Роберт Цветковски, 35 години творештво

Авторот истакна дека иако за многумина неговите дела се апстракција, за него тоа е еден чист реализам.

Уметничката јавност во „Градот на културата за 2024“ синоќа сведочеше на импресивното творештво уметност на сликарско платно, дела од новата етапа во творештвото на академскиот сликар Роберт Цветковски од Крива Паланка со која авторот одбележа 35 години творештво.

Авторот истакна дека иако за многумина неговите дела се апстракција, за него тоа е еден чист реализам.

- Тој чист реализам отсликан од моето секојдневие, а произлегува директно од внатрешноста на еден уметник. Во делата се отсликани сите оние дневни, месечни или годишни случувања низ кои поминуваме сите ние, заеднички и иако понекогаш се обидувам да ги претставам и поставам во еден друг ред нештата, тие, верувајте, извираат во еден друг контекст, свесно или несвесно, рече Цветковски.

За делата говореше и Ѓорѓи Костовски, историчар на уметност од Градскиот музеј.

- За многумина од експресионистите, како и за Цветковски, сликата е дел од неговата душа. Секоја боја, секое движење е отсликување на одредени емоции и мисли. Сликата најчесто настанува многу брзо, молскавично, создавајќи се себе преку авторот, но нејзиното крајно обликување може да помине низ долг и мачен процес на реобмислување, ревносно смирено и естетско, рече Костовски.

Роберт Цветковски е уметнички амбасадор на Крива Паланка кој досега бележи бројни интернационални претставувања во САД, Кина, Германија, Португалија, Франција, Црна Гора, Македонија, а до крајот на годината ќе има самостојни изложби во Загреб, Хрватска и во КИЦ, Скопје.

Со изложбата во галеријата на ЛУ Градски музеј Крива Паланка одбележа три и пол децении творештво, преку 50- те дела што го отсликуваат секојдневието, траен белег на времето преточен преку текстура, материја, боја и симболи.

Изложбата е дел од манифестацијата „Крива Паланка - Град на културата за 2024“. /МИА

Македонија

Кочанчанецот кој изврши обид за убиство и побегна уапсен на Табановце

 Кочачанецот кој вчера изврши обид за убиство и побегна од местото на настанот бил лишен од слобода на граничниот премин „Табановце“, информираат од Министерството за внатрешни работи.

- На 14.09.2024 во 06.30 часот на Граничен премин Табановце М.Н. бил лишен од слобода од страна на полициски службеници, постапувајќи по претходна пријава од В.А. (38) од Кочани, дека на паркинг во Кочани на 13.09.2024, додека седеле во автомобилот на В.А. заради купопродажба на мобилен телефон, М.Н. извадил нож и со него го нападнал пријавителот, стои во соопштението од МВР.

Веднаш по добиената пријава, како што дополнуваат, се преземени соодветни мерки и активности и случајот е расчистен, поднесена е кривична пријава, а М.Н. е изведен пред судија на претходна постапка и му е изречена мерка притвор во траење од 30 дена, соопшти МВР.

Од обвинителството во Кочани, претходно соопштија дека за 24-годишник постои основано сомнение дека сторил кривично дело „убиство во обид“

Како што соопшти ОЈО, на 13 септември, во вечерните часови, осомничениот се договорил со оштетениот да се најдат на паркинг простор кај Споменикот на слободата во Кочани заради купопродажба на мобилен телефон.

Кога се сретнале на наведеното место, осомничениот влегол во возилото на оштетениот, седнал на совозачкото место и започнал да разговара со него и да го разгледува мобилниот телефон.

По кратко време, од џебот извадил нож и му задал удар во витален дел од телото во пределот на главата и вратот под брадата, нанесувајќи му отворена рана од околу 2-3 см. Ножот се скршил, а осомничениот продолжил со дршката уште неколку пати да го удира оштетениот. Нападнатиот му ја фатил раката и го спречил, по што осомничениот се извлекол од возилото и со трчање побегнал од местото на настанот.

притисни ентер