"Нашето единство треба да биде најголемиот адут во односите со Русија. Сакаат да не поделат, не им е грижа за Европската унија", рече Борел во дебатата со европратениците за односите ЕУ-Русија.
„Русија сака да разговара со земјите -членки поединечно и само со одредени, со оние што се важни“, објасни високиот претставник на Унијата за надворешна политика и безбедност.
Русија „секогаш се обидува да ја подели Европската унија“, а Унијата како одговор „мора да остане обединета“, рече Борел. „Верувајте ми, не е секогаш лесно“, истакнал тој.
Шефот на европската дипломатија смета дека состојбата на европско-руските односи е „потешка од кога било“ и дека „де факто нема вистинска комуникација“.
Сепак, Русија е сосед на ЕУ и „важен глобален играч“, затоа е потребна нова стратегија за да се направат односите со Русија помалку конфликтни, попредвидливи и постабилни.
Таа стратегија не смее да вклучува откажување поддршка за руското граѓанско општество, бидејќи поддршката на демократијата е „еден од главните приоритети на ЕУ“, нагласил Борел.
"Не можеме да бидеме остров опкружен со автократски системи. Ние така не би преживеале ", заклучил тој.
Литванскиот пратеник од Народната партија, Андриус Кубилиус, чијшто извештај за насоката на односите ЕУ-Русија во среда ќе го изгласа Европскиот парламент, во дебатата нагласил дека на ЕУ и е потребна јасна стратегија со долгорочни цели во својата политика кон Русија.
„Сакаме добри односи со Русија, но тоа зависи од Русија. Со Русија предводена од авторитари и клептократи и со агресивен режим на Путин, тоа е невозможно“, рече тој, додавајќи дека Русија е најголемата закана за европската безбедност.
Во исто време, Кубилиус нагласува дека „режимот на Кремљ“ треба да се разликува од рускиот народ, кој е пријател на Европската унија.
„Сакаме рускиот народ да ги има истите слободи, човекови права и привилегии на демократијата што ги уживаме“, рече тој.