Големите фармацевтски компании се натпреваруваат во производство на ефикасна вакцина против коронавирусот, од кој што досега починале повеќе од 935 000 луѓе ширум светот и зарази над 30 милиони.
Претседателката на Европската комисија Урсула фон дер Лајен вчера предупреди на „националистичкиот пристап кон вакцината“ што може да ги загрози животите на најранливите и најсиромашните нации.
Студија објавена од Оксфам покажува дека група богати земји, кои сочинуваат 13 проценти од светската популација, веќе обезбедиле огромни дози на вакцината.
„Пристапот до вакцина за спасување живот не треба да зависи од тоа каде живеете или колку пари имате“, рече Роберт Силверман од „Оксфам Америка“.
Петте водечки кандидати за вакцини, кои се во напредна фаза на тестирање, ќе можат да произведат 5,9 милијарди дози, доволно за да се вакцинираат три милијарди луѓе, се вели во извештајот.
Околу 51 процент од тие дози биле „разграбани“ од богатиот свет, вклучително и САД, Велика Британија, Европската унија, Австралија, Хонг Конг, Макао, Јапонија, Швајцарија и Израел.
Останатите 2,6 милијарди дози ги купиле или резервирале Индија, Бангладеш, Кина, Бразил, Индонезија и Мексико.
Трамп вчера рече дека Америка може да ја направи вакцината веќе следниот месец, додека врвните здравствени експерти во неговата администрација велат дека вакцината ќе биде малку веројатно достапна за пошироката јавност пред средината на 2021 година.
„Ние сме многу близу до вакцинирањето“, изјави Трамп.
Демократите се загрижени затоа што Трамп врши притисок врз владините здравствени регулатори и научниците за да ја одобрат вакцината пред претседателските избори на 3 ноември и да помогнат да се обезбеди негов реизбор.
„Можеме да ја добиеме за неколку недели, три, четири недели“, рече Трамп во вторникот во Градското собрание на Пенсилванија.
Шефицата на ЕК, Фон дер Лајен, рече дека ЕУ ќе ги поддржи мултилатералните организации како што е Светската трговска организација (СТО) во обидот да се обезбеди поправедна дистрибуција на вакцините.
„Никој од нас нема да биде безбеден сè додека не бидеме безбедни сите, каде и да живееме, што и да имаме“, рече Фон дер Лајен.„Националистичкиот пристап кон вакцината е опасен по живот. Соработката околу вакцината спасува.“