Свет

Блинкен го осуди воениот удар во Судан

Американскиот државен секретар Антони Блинкен во синоќешниот телефонски разговор со суданската министерка за надворешни работи Маријам Садик ал-Махди го осуди военото преземање на власта во земјата и апсењето на цивилни лидери.

Блинкен на Твитер соопшти дека со Ал-Махди разговарале и за тоа како САД можат најдобро да го поддржат повикот на суданскиот народ да се врати на транзицијата кон демократијата предводена од цивили.

Илјадници Суданци излегоа на улиците откако војската во понеделникот ја презеде власта од преодната влада, а неколкумина беа убиени во судирите со безбедносните сили.

Шефот на вооружените сили, генерал Абдел Фатах ал-Бурхан, кој го предводеше воениот удар, го распушти заедничкиот цивилно-воен совет формиран да управува со земјата до демократските избори по соборувањето на автократот Омар ал Башар со народното востание во април 2019 година.

-Блинкен разговараше за поддршката на Вашингтон за граѓанска транзиција во согласност со суданската уставна декларација, изјави портпаролот на американскиот Стејт департмент, Нед Прајс.

Светската банка ја суспендираше помошта за Судан по државниот удар во земјата, а САД ја замрзнаа помошта од 700 милиони долари.

Африканската унија (АУ), исто така, го суспендираше Судан поради „неуставното" преземање на власта од страна на војската.

Шоу биз

Синовите на Џон Ленон и Пол Макартни снимија песна

Синовите на некогашните членови на поп-рок составот „Битлс“ - Џон Ленон и Пол Мекартни, објавија заедничка песна за познатиот парк „Примроус Хил“ во Лондон.

Џејмс Мекартни (46) и Шон Оно-Ленон (48) заеднички ја напишаа баладата „Primrose Hill“, пренесува лондонски „Телеграф“.

„Многу сум среќен што можам да ја споделам мојата најнова песна што ја напишав со мојот добар пријател Шон Оно-Ленон. Со објавувањето на оваа песна се чувствуваме како да се движиме сите заедно. Возбуден сум што ќе продолжам да споделувам музика со вас“, напиша Мекартни на Инстаграм.

Познатиот парк бил отворен во првата половина на 19. век на ритче во центарот на Лондон, а таму денес се наоѓа куќата на сер Пол Мекартни.

Фудбал

Пиоли пред реваншот со Рома: Ова е одлучувачки момент за европските амбиции на Милан

Тренерот на Милан, Стефано Пиоли, ги искажа своите очекувања за вечерашниот натпревар со Рома.

Во првиот натпревар од четвртфиналето на Лига Европа, Милан загуби на домашен терен од Римјаните со резултат 0:1.

- Одам на овој натпревар со самодоверба бидејќи знам за што се способни моите играчи. Сигурен сум дека знаат што да прават на вакви важни натпревари. Мора да подобриме некои ситници во однос на првиот натпревар. Ова е одлучувачки момент за нашите европски амбиции. Мора да ги покажеме нашите најдобри квалитети на теренот и да ја исцедиме секоја последна капка пот, изјави тренерот на Милан.

Натпреварот на „Олимпико“ во Рим ќе почне во 21 часот.

Македонија

За брзо возење казни за 140 возачи на територија на цела Македонија

Во спроведената акциска контрола на територијата на Република Македонија за санкционирање на возила кои се движат со брзина поголема од дозволената, во текот на цчерашниот ден биле казнети 140 возачи.

Како што соопштија од МВР, од нив четири возила се движеле со брзина над 50 километри на час повеќе од дозволеното, а едно возило се движело со дури над 70 километри на час повеќе од дозволената брзина. Притоа, 86 возила ја пречекориле брзината во населено место, а 54 надвор од населено место.

Сообраќајните контроли продолжуваат и во наредните денови.