Батинци и Љубош без вода

 Населбите Батинци и Љубош денеска ќе немаат вода поради дефект на водоводната мрежа.

ЈП Водовод и канализација информира дека прекинот во водоснабдувањето ќе трае од 9 часот до поправка на дефектот.

Спасовски на средба со тимот што ја изврши првата трансплантација на срце: Извршивте зафат што претставува круна во кардиохирургијата и медицината воопшто

 Премиерот Оливер Спасовски денеска во Владата, придружуван од министерот за здравство Венко Филипче се сретна со дел од тимот што ја направи првата трансплантација на срце на 23 мај годинава.

На кои им додели благодарница за историскиот подвиг, посебно именувајќи ги сите кои учествуваа во сложениот зафат.

На средбата, соопшти владината прес-служба, присуствуваше и синот на донорот Емилија Динева, Влатко Динев, на кого премиерот Спасовски симболично му врачи благодарница, изразувајќи му огромна благодарност од свое лично име и од име на Владата.

– Благодарницата за семејството Диневи, сакам лично да му ја предадам на синот на Емилија Динева, Влатко и да се заблагодарам прво за нејзината лична одлука, а потоа и за согласноста на семејството нејзината одлука да ја претворат во трајно сеќавање за нејзиниот исклучителен хуман гест и желба, своите органи да ги дарува на оние на кои им се во моментот најпотребни за да продолжи друг живот", рече премиерот Спасовски, кој ја искористи приликата да се заблагодари и на Иван Огненовски, кај кого беше извршена трансплантацијата и на неговото семејство, кои, како што подвлече, покажаа доверба во домашното здравство и во стручноста на целиот тим и му посака добро здравје.

Обраќајќи се кон тимот, лекари и медицински персонал, премиерот Спасовски истакна дека успешната трансплантација на срце е историски резултат и вистински подвиг и сведоштво за висината на експертизата и стручноста на целиот здравствен систем во нашата земја, бидејќи опфати голем број здравствени институции и поединци кои се вградени во ова историско остварување.

– Во време кога целото наше внимание, сиот наш здравствен систем е ставен во функција на справување со најголемата глобална здравствена криза заради пандемијата со КОВИД-19, вие се обединивте, ги здруживте вашите капацитетите, знаењата, искуството и стручност за да извршите зафат што претставува круна во кардиохирургијата и медицината воопшто, оцени премиерот Спасовски.

Посочи дека во изминатите години, Владата силно инвестираше во здравствениот кадар како столб на здравствениот систем – луѓето кои го обезбедуваат здравјето, кои што ја овозможуваат грижата и негата за сите граѓани, потенцирајќи дека тоа ќе продолжи и понатаму со целосна поддршка на министерот Филипче и Министерството за здравство, при што со медицинските работници разговараше за актуелните решенија и активности во здравството.

Министерот Филипче пред присутните истакна дека со оваа постапка се заокружија два големи сегменти во здравствениот систем во нашата земја: трансплантацијата и кардиохирургијата.

– Ова е само почеток на една успешна соработка. Со овој чин се подигна свеста да се донира орган. Ги направивме сите подготовки за тоа што треба да значи трансплантација на срце. За кратко време се организираше целата работа и се заврши во најдобар ред. Направивме еден т.н „heart" тим во којшто членуваат сите кои имаат познавање со кардиохирургијата. Од срце се заблагодарувам на семејството на починатата за хуманоста која ја покажаа на дело, рече министерот Филипче.

Директорот на Клиниката за Државната кардиохирурхија, Сашко Јовев им се заблагодари на претставниците на Владата за тоа што го препознаа нивниот труд.

– Трансплантацијата на срце претставува врв во срцевата кардиохирургија и во медицината воопшто. Но, ова што практично би требало да го препознаеме сега има научен, стручен, човечки мотивиран потенцијал, пред сè во државното здравство кој треба да биде препознаен. Единствено ни треба само малку ветар во грб, а се останато оставете го на нас. Сакам да се заблагодарам на синот на починатата затоа што спасија три животи. Со трансплантацијата не треба да престанеме тука. Оваа програма мора да постои, да опстои, да се развива, а ќе ја развиваме со помош од државата, медиумите и сите мотивирани стручни лица кои го претставуваат тимот, рече д-р Јовев.

Мицкоски од Дебар: Со Обнова доаѓаат реформи кои што ќе гарантираат безусловна правда и нула толеранција на корупцијата

   Денес претседателот на ВМРО-ДПМНЕ, Христијан Мицкоски заедно со носителот на изборна единица 5, Игор Дурловски ја посетија општината Дебар и остварија посета со мештаните.

При самата средба Мицкоски порача дека во програмата на ВМРО-ДПМНЕ има такви мерки кои што ќе гарантираат безусловна правда и нула толеранција на корупцијата

„Јас ќе започнам со дилемата дека овие избори се практично една раскрсница како сакаме да ја гледаме нашата држава во следните четири години. Тоа е една суштинска дилема која пред секој еден жител без разлика дали е Македонец, дали е Албанец, Турчин, Влав, Србин, Бошњак, Ром, Египјанец е поставена на овие избори. Овие избори се избор каква Македонија сакаме да видиме за четири години од сега, а јас би рекол и годините кои што следат по овие четири години. Дали сакаме да гледаме Македонија која што ќе биде засрамена, понижена, омаловажена, опљачкана, полна со криминал, корупција, многу неуспеси или Македонија која што ќе биде горда, исправена и која што сите жители кои што се дел од нејзе ќе можат гордо да кажат да јас сум од Македонија, среќни граѓани. Држава во која што секој ќе го пронајде сопственото место затоа што тоа место одговара на неговиот квалитет, на неговите компетенции“, истакна Мицкоски.

Мицкоски додаде дека граѓаните треба да се определат во каква држава сакаат да живеат, држава во која што секојдневно ќе се гледаат Луј Витон ташничиња полни со пари или пак држава во која што ќе владеат законите, ќе се почитува Уставот, правото и правдината ќе бидат над се.

„Ова се избори во каква држава сакаме нашето семејство да опстои, нашите потомци да опстојат. Но ова се избори кои што ние мора да ги направиме горди нашите предци. Овде нема нација, нема вера, нема религија, сите делиме иста мака. Сите се срамиме од по некој гаф кој што ќе го слушнеме од господинот Зоран Заев кој до вчера беше претседател на Владата. Сите се чувствуваме измамени кога ќе ја стави раката на срце, ќе ја наведне главата налево па ќе спомне и жицата, и семето, и племето итн., кога ќе излаже и нема да ја каже вистината“, потсети Мицкоски.

Мицкоски посочи дека секаде низ целата територија на Република Македонија се чувствува дека обновата доаѓа. Се чувствува дека ВМРО-ДПМНЕ ќе победи на овие избори.

„Време е да се исправиме, за да си ја исправиме Македонија. А, на тој начин ја трасираме патеката за оние кои што вреди за се што правиме во нашите животи, тоа се нашите потомци, нашите деца. Но и за оние да им го обелиме образот на кои што ја градеа и создаваа оваа земја. Голем дел од нив и животот го положија за нашата Македонија“, рече Мицкоски.

Мицкоски потсети како СДСМ ветуваше дека ќе донесе правда на голема врата, но за жал од СДСМ граѓаните добија рекет, криминал, сиромаштија и трас-трас судство.

„Да ги вратиме насмевките на нашите лица, доаѓаат најдобрите четири години. Доаѓаат најдобрите четири години кои што се напишани во оние 360 страници читанка која што ја претставуваме пред граѓаните, а ја нарековме „Проект – Обнова“. 360 страници внимателно одбрани, ги пишувавме заедно со членовите на партиските комисии, општинските комитети, со многу партиски експерти, но многу и луѓе кои што не се определени експерти од земјава, странство. Ги пишувавме впрочем и со вас, се сеќавате на онаа акција која што ја имавме „Разговори за обнова на Македонија“. Оваа програма ја создадовме многу внимателно, збор по збор, реченица по реченица, пасус по пасус, ги сложувавме“, нагласи Мицкоски.

Мицкоски додаде дека многу внимателно се избрани проектите кои се ветени во програмата.

„Посебен акцент посветивме на правната држава, почитување на законите и Уставот. Кога работевме со професорка Силјановска, проф. Каракамишева, проф. Наумоски, Спасеновски, многу адвокати, проф. Климовски, многу луѓе од фелата, направивме такви реформи кои што ќе гарантираат безусловна правда и нула толеранција на корупцијата“, истакна Мицкоски.

Мицкоски за крај порача дека се што е ветено по 15-ти јули се ќе се исполни, бидејќи ВМРО-ДПМНЕ се што ќе вети исполнува.

Со почит,

Центар за комуникации на ВМРО-ДПМНЕ

Заев: Силно ќе поддржиме формирање на социјални претпријатија

Луѓето кои што се дел од програмата на Покров произведуваат домашна вкусна органска храна и преку оваа програма се интегрираат полесно во општеството.

Имав чест денеска да ја посетам тераписката заедница Покров во с.Водоча, Струмичко која се занимава со социјално претприемништво и рехабилитација и ресоцијализација на лица кои биле зависници од употреба на наркотични средства, алкохол и други психотропни супстанци.

Луѓето кои што се дел од програмата на Покров произведуваат домашна вкусна органска храна и преку оваа програма се интегрираат полесно во општеството. Повторно се активни, работат, имаат некаква корисна цел за себе и општеството во кое живеат!

Покров е еден светол пример на социјално претприемништво кој треба да се следи бидејќи овозможува позитивни општествени промени и социјална инклузија на корисниците на оваа програма.

Во следниот четиригодишен мандат планираме силно да ги подржиме иницијативите за формирање на вакви социјални претпријатија со нов закон за поддршка на социјално претприемништво, со фокус на младите и жените, и со отворање на три центри за поддршка на социјални претпријатија.

Производството на квалитетни македонски земјоделски производи коишто произлегуваат од Покров е промоција на нашиот земјоделски потенцијал во струмичкиот регион кој уште посилно ќе го впрегнеме да биде еден од главните мотори на новата македонска економија.

Од овде сакам да упатам еден апел до нашите граѓани, да купуваат домашни производи особено сега повеќе од било кога, бидејќи на таков начин ја помагаат домашната економија и ги помагаат нашите вредни производители на македонски производи и на македонска квалитетна храна.

Државата го препозна тој потенцијал како важен за закрепнување на економијата, со поддршка за пораст на личната потрошувачка. Преку третиот пакет на мерки пуштивме во оптег 355 милиони евра на 730.000 корисници, преку платежни картички, ваучери, поддршка за младите и студентите, и други мерки.

Овие пари преку платежните картички и ваучерите ќе завршат во македонските компании и бизниси и ќе им помогнат да ги зачуваат работните места, да ја надминат кризата и повторно да се насочат кон раст, отворање на нови работни места и пораст на платите на своите вработени.

Да бидеме тука едни за други и кога е криза и кога не е! Да купуваме домашни македонски производи и да бидеме сите активни учесници во новата македонска економија која ќе ни овозможи подобар животен стандард на сите!

Зоран Заев, претседател на СДСМ и носител во ИЕ 4

притисни ентер