Ослободувањето на Талибанците е дел од размената на затвореници според договорот меѓу Талибанците и САД во Доха во февруари, како предуслов за мировните преговори меѓу исламистичките милитанти и авганистанската делегација составена од претставници на повеќе групи.
Целта на преговорите е да се стави крај на дводецениската војна.
„За подобро решавање на прашањето за размена на затвореници, важно е да се продолжи прекинот на огнот“, рече Хавид Фајсал, портпарол на советникот за национална безбедност на авганистанската влада.
Тоа, рече тој, е неопходно за да се избегне понатамошно крвопролевање и авганистанската влада е подготвена за тоа.
Прекинот на огнот истекува на полноќ и Талибанците допрва треба да се изјаснат за негово продолжување.
Процесот на ослободување на затворениците започна во април, но е бавен поради тензиите меѓу Талибанците и владата. Според договорот во Доха, владата треба да ослободи 5.000 затвореници.
Талибанците треба да ослободат 1.000 припадници на авганистанските безбедносни сили.
Досега, владата ослободила 1.000 затвореници , а Талибанците 105.