Експертите предупредуваат дека секторот ќе се соочи со колапс и масовни отпуштања доколку идните креатори на политиката не се насочат кон поддршка на фирмите за купување опрема со која би ја зголемиле продуктивноста.
„Затоа се неопходни воздржувања од креаторите на економскитеп олитики во делот на најавите за натамошно згоелмување на минималната плата. Тоа нема да им наштети на сопствениците кои ќе бидат приморани да ги затворат своите фабрики, туку многу повеќе ќе им наштети на работниците кои во текстилната индустрија се преку 30 000. / Создадовме мит дека сме прости, неквалификувани, а всушност, не може да бидете продуктивни и да имате висока индустриска норма ако работите на рачни машини“,изјави проф. Дарко Лазаров, Универзитет „Гоце Делчев“ – Штип.
Неколку фирми веќе ставиле клуч на врата, потврдија работодавачите. Бараат борба со сивата економија, митото и корупцијата, реформи во образованието како и во стопанството.
Како дополнителна закана за кожарската индустрија го посочија и корона вирусот. Извозот за Италија може да запре, бидејќи кожарците најмногу извезуваат во таа земја.
„Факт е дека неколку компании пропаднаа кај нас. Во најлоша состојба моментално е кумановското стопанство, таму е кожарската индустрија многу развиена и ако се случи сега нешто со корона вирусот во Италија, верувајте таму може да замре целата индустрија, “изјави Ангел Димитров, претседател на текстилна и кожарска индустрија.
Платите изминативе 10 години постојано растат, но бројот на работници се намалува, велат работодавачите. Просечната плата за текстилците лани била нешто повеќе од 17 800 денари, а извозот изнесувал 543 милиони евра, што е намалување од над 6,5% или 38 милиони евра помалку во однос на претходната година.