Милошоски најави средба со Русковска на која ќе и достави аудио материјал поврзан со „Рекет"

Утре во 9:00 часот на моја иницијатива, во Обвинителството за борба против организиран криминал и корупција, ќе остварам средба со Вилма Русковска. 

Целта на закажаната средба е на обвинителката да и го предадам аудио материјалот доставен од укажувач, а на кој се препознава гласот на поранешниот премиер Зоран Заев, пишува пратеникот од ВМРО-ДПМНЕ Антонио Милошоски на неговиот фејсбук профил.

Тој додава дека во прилог на овој материјал ќе го достави и транскриптот од чија содржина, како што пишува, „произлегува сомнеж за тоа дека господинот Зоран Заев бил во тек со нелегалното финансирање на “Меѓународниот сојуз” на Бојан Јовановски преку рекетирање на стопанственици, како и дека тој лично од позицијата премиер го помагал финансирањето на телевизијата 1ТВ".

Се надевам, додава Милошоски, дека овој материјал ќе му биде од корист на обвинителството во покренатото обвинение за овој предмет.

Голема акција за чистење на снежните наноси во општина Кисела Вода

Голема акција за расчистување на снежните наноси се одвива од рано изутрина во општина Кисела Вода. 

​На терен е општинската администрација заедно со сите сезонски работници. Со механизација се расчистува снегот, се фрла сол на замрзнатите површини, со цел граѓаните да можат непречено да стигнат до своите работни места. Исчистени се и приодите до градинките, тротоарите и пешачките патеки. Интензивно се работи на Теферич, во Припор, во Драчево, во моментов се чистат Пржино и Црниче.

Ќе бидат опфатени сите месни и урбани заедници низ општината. Координирано, заедно со службите на градот Скопје се работи на расчистување на булеварите и автобуските постојки.

Согласно донесените одлуки од состанокот на кризниот штаб, градоначалникот Орце Ѓорѓиевски за неопходните потреби на граѓаните на располагање ги стави сите службени возила. Воедно, службите на Општината се достапни 24 часа за граѓаните кои имаа потреба од дополнителна интервенција за расчистување на напластениот снег. Контакт може да се оствари на телефонскиот број 075/309-548 (Далибор), на [email protected] или на фејсбук страницата на Општина Кисела Вода.

Апелираме до сопствениците на деловните објекти да ја исполнат својата законска обврска за расчистување на снегот од пред влезот на објектот, а исчистениот снег да не го фрлаат на улиците со што би ја отежнале работата на нашите служби.

Ваква обврска имаат и сите други граѓани кои треба да го расчистат снегот пред своите дворови и влезовите на станбените згради и со тоа да овозможат проодност и непречен пристап до објектите.

ВМРО-ДПМНЕ: Пиунот Ковачевски да смогне храброст и да излезе на избори, без техничка влада

Пиунот Ковачевски да смогне храброст и да излезе на избори без техничка влада, а за помалите партии предлог за една изборна единица.

ВМРО-ДПМНЕ е спремна да оди на предвремени парламентарни избори без техничка влада, и со тоа изборите да можат да се распишат во најкраток можен рок, без услов од 100 дена техничка влада. Така ќе се заштеди на време и новата влада ќе може бргу да почне да се справува со предизвиците пред кои е исправена државата.

ВМРО-ДПМНЕ е подготвена и на барањето на помалите партии кои бараа една изборна единица. ЛДП, ДОМ и ДС треба само да смогнат сили и да им кажат не на нивните раководства кои ги држат во влада за неколку директорски места или вработување на роднини на истите.

Владата со која управува ДУИ, а Ковачевски е само вршител на должност премиер не може да ја избави државата од ниту една од четири кризи во кои ја втурна токму оваа гарнитура на политичари.

Потребни се брзи предвремени избори и одговорна влада која ќе знае да се справи со проблемите.

Со почит,

Центар за комуникации на ВМРО-ДПМНЕ

Светската банка и додели заем на Јужна Африка од 750 милиони долари

Светската банка и додели заем на Јужна Африка од 750 милиони долари за закрепнување од последиците на Ковид-19.

Светската банка одобри заем од 750 милиони американски долари за Јужна Африка поврзан со закрепнувањето на земјата, посебно за заштитата на сиромашните и поддршка на економското закрепнување на земјата по пандемијата со Ковид-19 , соопшти денеска Министерството за финансии на Јужна Африка.

Јужна Африка, втората по големина економија на континентот, е силно погодена од четири бранови на инфекцијата, што досега ја предизвикаа смртта на околу 94.000 лица и заразија 3,5 милиони граѓани, што е најголема бројка на заразени во цела Африка.

Постојаните карантини за заштита на луѓето доведоа до затворање на илјадници бизниси, зголемувајќи го бројот на невработени, што минатата година доведе до зголемување на стапката на невработеност во Јужна Африка.

-Поддршката од Светска банка доаѓа во критично време за нас, рече Дондо Могајане, генерален директор на Државниот трезор.

Средствата од заемот за развојна политика ќе помогнат да се премости финансискиот јаз што произлегува од дополнителните трошоци за кризата со Ковид-19, додаде тој.

притисни ентер