“Доцнам зошто бев физички нападнат од затворски слубежници” – рече обвинетиот во “Рекет” Бојан Јовановски при влезот во судницата обраќајќи се на новинарите.
Од кого и како бил нападнат јавноста немаше можност да слушне, заради тоа што рочиштето кое почна со 20 минути задоцнување се затвори за јавноста поради емитување на аудио снимка на Зоран Милевски која е оценета како материјал со приватна содржина.
Канал 5 го контактираше директорот на затворот во Шутка, Есад Рахич. Тој тврди дека напад немало, а целата ситуација се случила затоа што Јовановски утринава бил нервозен и не дозволувал да му стават лисици на рацете кога службениците постапувајќи по правилата требало да го спроведат во Судот. Рахиќ кажа дека ќе го истражи случајот, но дека во изминативе седум месеци никогаш немало отстапување од процедурата.
Јовановски и Катица Јанева, кои се обвинети во овој предмет во Кривичниот суд го слушаа материјалот кој го снимал сега осудениот Милевски. Ова е трета снимка од него, а која ја изведува обвинителката Вилма Русковска. Адвокатот на Боки 13, Сашо Дуковски по рочиштето кажа дека оваа снимка нема доказна вредност.
Јанева и Јовановски вчера побараа оваа снимка да биде емитувана јавно.
И двајцата беа согласни дека овие разговори ќе ја откријат релацијата што Боки 13 ја имал со Милевски, како и тоа дека бил изманипулиран. Во овој контекст Јанева посочи дека доколку јавноста ја слушне снимката ќе добие поинаква слика за целата постапка за „Рекет" и дека ќе биде даден одговор на тоа кој манипулира, кој нуди поткуп, кој нуди рекет.
Но, Пандорината кутија како што Јовановски ги нарече овие разговори ќе останат тајна за јавноста.
На следното рочиште кое е закажано за понеделник треба да се изведуваат материјали од посебни истражни мерки, со што завршуваат доказите од обвинителството .