Високи владини претставници на Трамп, кои ги информираа новинарите за планот претставен од претседателот во Белата куќа, рекоа дека мировниот план на САД ќе ги признае израелските населби во окупираниот Западен Брег.

За возврат, Израел ќе ја замрзне изградбата на новите населби на четири години за да даде време за преговорите за палестинска држава во тој период.

„Денеска Израел презеде огромен чекор кон мирот“, рече Трамп при објавувањето на планот.

Стоејќи со израелскиот премиер Бенјамин Нетанјаху во Белата куќа, тој рече дека неговиот план е „можеби последната шанса за Палестинците“.

Тој додаде дека за планот писмено го известил палестинскиот претседател Махмуд Абас.

Планот на Трамп содржи големи пречки кои Палестинците мора да ги надминат за да ја постигнат посакуваната цел за сопствена држава.

Тој предложи изводливо решение за двете држави и вети дека ниту Израелците ниту Палестинците нема да бидат протерани од нивните домови. Планот се работел во тајност и бил направен под раководство на зетот на Трамп, Џаред Кушнер.

Трамп во понеделникот го претстави својот план пред Нетанјаху и неговиот противкандидат на изборите, Бени Ганц, и двајцата, според американските официјални претставници, изразија подготвеност да го поддржат.

На Твитер, Трамп објави мапа според која Палестинците ќе контролираат некои области на Западниот Брег, но се опкружени од сите страни од Израел и имаат пристапни патишта до Јордан.

Еврејските населби на Западниот Брег би биле под целосна израелска контрола, како и целата долина на реката Јордан.

Некои области јужно од Газа во пустината Негев ќе бидат под палестинска контрола, а Појасот Газа ќе биде поврзан со тунел до Западниот Брег.

Израел вети дека ќе им обезбеди на муслиманите пристап до џамијата „Ал-Акса“ во Ерусалим и ќе ја почитува улогата на Јордан, кој управува со светите места, соопштија официјални лица од САД.

Палестинската државност ќе зависи од чекорите што ги преземаат Палестинците за остварување на самоуправа, како што се почитувањето на човековите права, слободата на медиумите и транспарентните и кредибилни институции, изјавија официјални лица.

Тие истакнаа дека е важно Палестинците да „седнат на маса и да преговараат“.

Ако тие се подготвени да преговараат, постојат некои области што можат да бидат компромитирани, рече американски претставник, без да прецизира детали.

Не детализирајќи, тој рече дека планот на Трамп предвидува „дарежлив фонд за компензација“ за Палестинците доколку се вратат на преговарачка маса за идната држава.

„Тоа е историски план“, рече Нетанјаху, споредувајќи го со признавањето на државата Израел во 1948 година од тогашниот претседател Хари Труман.

Планот претходно беше наречен „Договор на векот“ затоа што има за цел да стави крај на еден од најдолгите конфликти во светот.

„Со овој ден, станавте првиот светски лидер што го призна израелскиот суверенитет над областите во Јудеја и Самарија, кои се од витално значење за нашата безбедност и нашето наследство“, рече Нетанјаху, користејќи ја Библиската деноминација за Западниот Брег.

Израел им се заблагодари на САД за предлозите, но Палестинците претходно ги отфрлија, нарекувајќи ги пристрасни. Илјадници Палестинци денеска протестираа во Појасот Газа, при што израелските трупи испратија засилувања на окупираниот Западен Брег.

Фактот дека немаше палестински претставници заедно со Трамп во моментот на објавувањето, најверојатно ќе предизвика критики дека планот бил прилагоден повеќе на потребите на Израел отколку на Палестинците.