Царовска: Имаме зголемување на платите кај повеќе од 106 илјади работници за декември

„ Го остваривме таргетот којшто го поставивме за само два месеци. “

За декемвриската плата имаме зголемување кај повеќе од 106 илјади работници во нашата држава, со што е остварен таргетот помеѓу 20 и 25 проценти од вработените во реалниот сектор да добијат зголемување на плати од 600 до 6.000 денари врз основа на мерката за субвенционирање на придонеси за раст на плати.

Ова го изјави вицепремиерката за економски прашања Мила Царовска, која заедно со директорката на УЈП Сања Лукаревска денеска ги посети просториите на компанијата „Даути комерц" во Сарај, која е корисник на мерката за субвенционирање на раст на платите.

– Го остваривме таргетот којшто го поставивме за само два месеци. Очекувам оваа мерка и понатаму да ги остварува очекувањата и во текот на целата година овие работници ги земаат повисоките средства. Месечната сума на издвоени средства од Буџетот за оваа мерка, што директно се трансферираат во фондовите за здравствено и пензиско е 200 милиони. За декемвриската плата се исплатени нешто повеќе од 150 милиони, што значи дека сè уште имаме можност за вклучување на  работници во буџетските рамки, изјави Царовска.

Очекувањата, подвлече таа, се остварени и очекуваме во статистичките извештаи да се покаже дека растот на плати има убава, забрзана тенденција, со што директно влијаеме на подобрување на квалитетот на живеење и животниот стандард на нашите граѓани.

Директорката на УЈП Сања Лукаревска рече дека даночниот обврзник „Даути комерц" е евидентен пример за успешноста на мерката субвенционирање на придонеси.

– Зборувавме и за оние даночни олеснувања, ослободувања кои што ги испромовира Владата, и дали ги имаат искористено. Можам да кажам за првпат во овој даночен обврзник информираме дека од 1 мај УЈП ќе направи еден интегриран систем, каде што МПИН образец ќе се поврзе со Е-пдд системот и врз основа на тоа сите приходи односно исплати коишто доаѓаат од Данокот на личен доход ќе бидат во еден систем. Мислам дека функционираме единствено да ги направиме сите процеси во УЈП да бидат едноставни, брзи и лесни, изјави Лукаревска.

Директорот на „Даути комерц" Хамим Даути, ја поздрави мерката за субвенционирање на платите, посочувајќи дека 71 процент од вкупно 340 вработени биле опфатени со мерката.

– Тоа беше еден добар мотив да се подигнат платите и да бидат сите задоволни. Зголемени се платите за 12 проценти. Просечната плата во „Даути комерц" денеска е над 25 илјади денари, изјави Даути./МИА

Адеми-Богдановиќ: Две пријателски земји со богато културно и природно наследство

Во рамките на работната посета на Црна Гора министерот во Владата на Република Македонија задолжен за дијаспора, Едмонд Адеми, денеска оствари средба со црногорскиот министер за култура Александар Богдановиќ.

За време на средбата, беа потврдени одличните и пријателски врски меѓу двете држави, но се разговараше и за отворените можности за нивно натамошно продлабочување, соопшти Кабинетот на министерот без ресор, задолжен за дијаспора.

Беа разменети мислења за соработката на Македонија и Црна Гора со УНЕСКО, имајќи го предвид искуството на двете држави околу статусот на заштитените културно-историски подрачја, Охрид во нашата држава и Котор во Црна Гора. Беше посебно нагласено задоволството за минатогодишниот јубилеј, 40 години од признавањето на двата града како заштитени подрачја на УНЕСКО.

Се разговараше за предизвиците со кои се соочуваат заштитените подрачја од неконтролираниот урбан развој. Во тој контекст, договорена е соработка на експертско ниво, со цел чување на универзалната вредност на двете места.

Во рамките на меморандумот за пријателство на градовите Охрид, Котор, Дубровник и Мостар, потпишан 2018 година, договорено е да во соработка и со Организацијата на градови на светското културно наследство, се изнајдат начини за конкретизирање на соработката. Во тој контекст, планирано е во скоро време реализација на состанок на претставници на четрите града со претставници и националните комисии на УНЕСКО, стои во соопштението. /МИА

ВМРО-ДПМНЕ: Костадинов и СДСМ шират лажни вести кои им се алиби за претстојниот пораз кој ќе им се случи на 12 април

​Кој во СДСМ го мести Костадинов со вакви смешни прес конференции?

Костадин Костадинов и СДСМ во очај шират лажни вести дека некој лобира Македонија да не добие датум за преговори со Европската Унија. Тоа е обично алиби за претстојниот пораз кој ќе им се случи на 12-ти април.

ВМРО-ДПМНЕ секогаш работело и работи Македонија да ги забрза евроинтеграциите. Тоа е за добро и на Македонија и на граѓаните. За разлика од СДСМ кои секогаш биле водени од тесно партиските интереси и ситните политички поени,

Видовме како работи СДСМ за европската агенда: „договорено е со Врховен", „без Заев не се може", „трас-трас и ете одлука на Врховен суд", „Катица знае за се што треба да се случи", или закон за СЈО или одлука на Врховен суд ама случаите ќе паднат. Ете тоа е вистината.

Жалиме што СДСМ не може да излезе од заевата матрица на функционирање, за своите неуспеси да наоѓа вина во европските партнери, ВМРО-ДПМНЕ или други политички субјекти во Македонија. Растечката корупција, економскиот колапс и безнадежноста на граѓаните галопирачки растат токму поради владеењето на Заев и тие параметри се видливи и за домашната, но и за европската јавност.

Криминалецот Зоран Заев е во исто време премиер и врховен судија

Клучен доказ дека мафијата има своја држава.

Зоран Заев треба да е со лисици на раце и да одговара за своите злодела.

Центар за комуникации на ВМРО-ДПМНЕ

СДСМ : Исплашени од одговорност, ВМРО-ДПМНЕ и Мицкоски по налог од Будимпешта маршираат за неправда

Очигледна е ескалацијата на стравот и паниката од одговорност во ВМРО-ДПМНЕ, се наведува во реакцијата на СДСМ на прес конференцијата на Орце Ѓорѓиевски од ВМРО- ДПМНЕ .

Од белиот дворец, симболот на корупцијата денеска уште еднаш потврдија дека ВМРО-ДПМНЕ и Христијан Мицкоски, извршителот на Груевски остануваат во истата режимска матрица, чија единствена грижа е заштита на криминалот, заштита на криминалците и некаков очајнички обид за спас со протест за неправда.

Откако не им успеа обидот преку блокади, закани и уцени во Собранието да го закочат процесот на носење на Законот за Јавно обвинителство, Мицкоски и ВМРО-ДПМНЕ сега ќе протестираат против правдата, против одговорноста, против независното судство.

Налогот на шефот Груевски стигна од Будимпешта, Мицкоски и ВМРО-ДПМНЕ тргнуваат на марш за неправда.

Мицкоски, Груевски и ВМРО-ДПМНЕ не можат да се борат за правда. Не можат да носат правда тие кои носат неправда, тие кои се бегалци од правдата, тие кои се заглавени во криминал и корупција.

Борбата за амнестија на нивниот криминал не може да биде и не е борба за правда, а стечајниот управник Мицкоски нуди само правда во стечај.

Ќе има одговорност за сите криминали и незаконски постапки. Сите ќе одговараат пред правдата и Мицкоски не може ништо да стори околу тоа.

СДСМ како одговорна и демократска партија преку Законот за јавно обвинителство овозможува ослободување на правосудството и создава услови за независно и професионално постапување на судиите и обвинителите.

Граѓаните го гледаат тоа и на 12 април ќе порачаат – режим никогаш повеќе!

притисни ентер