Шкријељ ги посети поранешните корисници на Заводот „Бања Банско" за кои МТСП обезбеди станови за самостоен живот

Уште четири корисници на Заводот за рехабилитација „Бања Банско" во Струмица ќе добијат свој топол дом.

Заврши адаптацијата на куќа во Струмица во која ќе се преселат. Направени се соодветни прилагодувања на просторот, обезбедена е пристапност а во тек е опремување на куќата.

Дополнителната заменик-министерка за труд и социјална политика Санела Шкријељ денеска во Струмица ги посети и лицата кои претходно беа згрижени во ЈУ Завод за заштита и рехабилитација Бања Банско, а сега живеат во четири стана кои се целосно прилагодени на нивните потребите.

„Продолжуваме со процесот на деинституционализација што го почнавме лани. Досега на девет возрасни лица Министерството за труд и социјална политика им помогна да го заменат Заводот „Бања Банско" со свој дом. Некои од нив во Заводот биле и по повеќе од 25 години. Тоа беа луѓе исфрлени на маргините на општеството, а сега се вклучени во заедницата. Ние ги поддржавме во нивните желби и упорност да си создадат нов живот. Тие не ја кријат радоста, таа се гледа на нивните лица. Од Заводот се деинституционализирани и четири деца. Третманот со врзување за радијатори припаѓа на едно друго време, што не смее да се повтори", изјави Шкријељ.

Насмеани и расположени, корисниците и кажаа на Шкријељ дека се задоволни од условите во кои живеат и дека слободата да одлучуваат за животните активности, што сега ја имаат, ги прави среќни.

Во рамки на трансформацијата на Заводот за заштита и рехабилитација на лица со телесна попреченост „Бања Банско" – Струмица, првите девет возрасни корисници го напуштија Заводот во текот на втората половина на 2019 година. Двајца од нив добија поддршка за враќање во сопственото семејство во село Миравци, Гевгелија, а седуммина се сместени во станови во државна сопственост.

Маријана Тошева, секретар на општинската организација на Црвен крст-Струмица посочи дека и тие го поддржуваат процесот преку обуки за персонални асистенти и негуватели. Активни се 19 персонални асистенти кои даваат услуги на 26 лица со попреченост.

Во тек е обука на третата група од 20 персонални асистенти.

Процесот на деинституционализација на Заводот „Бања Банско", Министерството го спроведува во соработка со четири агенции на ОН, кои ги опремија становите. За лицата е обезбедена потребната поддршка, вклучувајќи и лични асистенти, а за обезбедување на нега на крајот на 2019 година беа вработени пет негувателки. Со трансформацијата, се планира Заводот „Бања Банско" да прерасне во модерен Центар за рехабилитација.

Во изминатите две години, повеќе од 44 проценти од луѓето што се сместени во социјални институции за долгорочно згрижување, добија нов дом во заедницата.

Дополнителната заменик-министерка Шкријељ го посети и новиот фитнес центар во рамки на проектот „И ние постоиме". Носител на проектот е Здружението на лица со телесен инвалидитет „Мобилност" - Струмица, а партнер е Здружението на граѓани за помош и поддршка на лица со даунов синдром „Вера" - Струмица. Проектот „И ние постоиме" се спроведува во рамки на Регионалната програма за локална демократија во Западен Балкан „ReLoaD", финансирана од ЕУ и кофинансирана од општина Струмица,стои во соопштението од Владата на РМ.

Сноуден негира дека на Трамповата администрација ќе и даде пет милиони долари

Тој на својот Твитер налог наведува дека „Си-Ен-Ен“ погрешно ја пренел информацијата.

Едвард Сноуден, некогашниот припадник на Агенцијата за национална безбедност (НСА), негира дека со согласил петте милиони долари кои ги заработил од продажбата на автобиографската книга и говорите кои ги држел по светот да и ги предаде на американската влада.

Тој на својот Твитер налог наведе дека „Си-Ен-Ен“ погрешно ја пренел информацијата и дека насловот на текстот би требало да биде „САД би можеле да заработат до 5 милиони долари со помилувањето на Сноуден“.

-Под А, тоа не е договор, јас со тоа не сум се согласил. Под Б, пресуда во овој случај не може да се изврши додека сум во егзил, но и онака никогаш не сум имал толку пари, напиша Сноуден.

„Си-Ен-Ен“ вчера објави дека, според договорот на Сноуден и администарацијата на Трамп, парите ќе бидат зачувани во посебен фонд.

Сноуден минатата година објави книга со наслов „Трајно забележано“ и со тоа го прекршил договорот кој го склучил со ЦИА и НСА.

Во книгата од која заработил повеќе од милион долари, открива како владата на САД направила систем за масовен надзор.

Средба Џафери-ДУЦОР „Партенија Зографски”

Сè што зависи од човечки фактор е решливо.

По повод Светскиот ден на знаковниот јазик, претседателот на Собранието на Република Македонија Талат Џафери, прими претставници на учениците и наставниците од училиштето за средно стручно образование за деца со оштетен слух, ДУЦОР “Партенија Зографски”.

На средбата претседателот Џафери истакна дека, доколку се има храброст, сила, борбеност и поддршка од околината, нема невозможни нешта во животот. Собранието секогаш има и ќе има отворени врати за сите граѓани, за нивните идеи и иницијативи кои треба да се преточат во закони и на тој начин да се надминат постојните пречки. Тој истакна дека, ниедна пречка не е преголема и дека ниеден проблем не е нерешлив, доколку истиот зависи од човечки фактор.

Професорката Викторија Волак, му се заблагодари на претседателот Џафери за неговата отвореност, непосредност и едноставноста на процедурите за остварување на оваа средба, како и за искажаната волја да се решаваат проблемите на кои наидуваат.

Претседателот им посака на учениците да не престануваат да истражуваат нови хоризонти на знаење, да постигнат врв во своите професионални кариери и следната средба да биде еднакво пријатна, но побројна.

Левица: Поднесени осум тужби против Собранието на РМ

Левица поднесе осум тужби против Собранието на РМ

Политичката партија Левица и нашите двајца пратеници во Собранието на Република Македонија, во законски предвидениот рок од 30 дена, поднесоа осум поединечни тужби пред Управниот суд против Собранието на РМ, како јавен орган, за поведување управен спор заради непочитување на процедурата за верификација на мандатите на следниве осум пратеници: Бедри Фазли и Фисниќе Бектеши Шаќири од ДУИ, и Драгица Ѓавочанова, Зеќир Рамчиловиќ, Белкиса Зеќири, Славјанка Петровска, Снежана Калеска Ванчева и Мирослав Богдановски од владејачката коалиција „Можеме“.

Тужбите, со кои се бара поништување на овие спорни поединечни управни акти и враќање одново на процедурата за верификација, се поднесени врз освнова на чл. 3, ст. 1, ал. 4–5, а во врска со чл. 4, ст. 1, ал. 1 од Законот за управните спорови (2019), а како причина за утужувањето се наведени и документирани апсолутно суштествени и неотстранливи процесни повреди на постапката – т.е. бидејќи во постапката која му претходеше на носењето на актите флагрантно се прекрши процедурата за верификација на мандатот на нов пратеник за остаток од мандатот, кој доаѓа на местото на друг пратеник од истата кандидатска листа и воопшто не се постапи според правилата на постапката кои се детално регулирани со закон и со Деловникот на Собранието.

Во прилог на оваа наша теза, дека има неотстранливи „грешки во чекори“ во процедурата, говори и фактот што самото Собрание на РМ, по нашите процедурални интервенции на пленарната седница, си ја увиде својата флагрантна грешка и повреда на чл. 17 од Деловникот, па после првата спорна тура на вакви осум контроверзни верификации, веќе во следните два идентични случаја на верификација на остаток на мандат (на пратениците Емилија Рамбабова и Диме Велковски) – го поправи своето недопустливо однесување, доставувајќи не коректен Извештај од непостоечката Верификациона комисија, туку од надлежната Комисија за деловнички и мандатно-имунитетни прашања – што, пак, доведува до еклатантна повреда на уставното начело на владеење на правото и правната сигурност, затоа што за една иста пропишана фактичка и правна ситуација недозволиво се воведува различна парламентарна пракса, т.е. два сосема различни механизми на верификација.

притисни ентер