Повикувајќи се на извори кои инсистираа на анонимност, Гардијан известува дека мобилниот телефон на Безос бил хакиран користејќи шифрирана порака на WhatsApp, испратена од личниот број на Бин Салман.
За пораката се верувало дека содржела злонамерна датотека (малициозен софтвер) што навлегол во мобилниот телефон на Безос, наведуваат резултатите од дигиталната форензичка анализа.
Според таа експертска анализа, „многу е веројатно“ е дека мобилниот телефон бил хакиран со употреба на заразено видео испратено до Безос од бројот на Саудискиот принц.
Безос добил злонамерна порака среде пријателските пораки од принцот, изјавил изворот за „Гардијан“. Само неколку недели порано, Безос и Бин Салман вечераа во Холивуд со холивудскиот продуцент Брајан Грејзер, како дел од дипломатската и економска турнеја на принцот во САД, каде ги запозна сите, од претседателот Доналд Трамп до Безос, Марк Цукерберг и Опра Винфри .
Откако бил хакиран, извлечена е голема количина на податоци од мобилниот телефон на Безос, но не се знае точно каков вид. Сето тоа се случило на 1 мај 2018 година.
Саудиска Арабија претходно негираше дека го хакирала мобилниот телефон на американскиот милијардер, од каде протекле љубовните пораки и фотографии што ги разменувал Безос со љубовницата Лорен Санчез, по што конечно се разведе од сопругата Макензи, што американските медиуми го опишаа како еден од најскапите разводи во историјата.
Ова е токму причината зошто Безос ангажирал приватни иследници кои на крајот утврдиле дека Саудијците го хакирале неговиот мобилен телефон, како што се сомневал уште од почетокот.
Во меѓувреме, саудиската амбасада во САД се огласи преку Твитер. „Неодамнешните извештаи во медиумите кои сугерираат дека Кралството стои зад хакерството на мобилниот телефон на г-дин Џеф Безос е апсурдно. Бараме истрага за овие обвинувања, за да ги имаме сите факти“, се наведува во саудискиот твит.
Безос, според магазинот „Форбс“, има богатство од 115,6 милијарди долари, пред сопствениците на конгломератот Мот Хенеси - Луис Вутон, Бернард Арна (111,2 милијарди) и ко-основачот на Мајкрософт, Бил Гејтс (110,6 милијарди). Покрај тоа што ја поседува најголемата светска интернет продавница, Безос поседува и еден од најголемите американски весници, „Вашингтон пост“.
И токму за „Вашингтон пост“ пишуваше Џамал Кашоги, саудискиот новинар со американско државјанство , кој беше брутално убиен во саудискиот конзулат во Истанбул, каде беше привлечен со измама. Тоа се случи само половина година по турнејата на принцот во Америка. Откако саудиските агенти го убиле Кашоги, тие го распарчиле неговото тело и, според турските служби, најверојатно го раствориле со киселина.
Американската ЦИА открила дека принцот Мухамед го наредил неговиот атентат, иако тој и саудискиот режим го негираа тоа - но првично негирале дека Кашоги воопшто бил убиен. Минатиот месец, саудискиот суд осуди на смрт петмина нејзини државјани за убиството на Кашоги, функционери од понизок ранг за кои Ријад тврди дека биле „револтирани“ и го извршиле убиството самостојно.