Три милиони долари за главата на Доналд Трамп понуди ирански пратеник

Пратеник од Иран понуди награда од 3 милиони американски долари на оној што ќе го убие американскиот претседател Доналд Трамп и рече дека Иран би ги избегнал санкциите доколку поседува нуклеарно оружје.

Тензиите се зголемуваат откако Трамп го повлече Вашингтон од нуклеарниот договор со Техеран од 2018 година и повторно воведе санкции кон Иран. Спорот ескалираше во низа одмазднички воени напади од обете страни.

„Во име на народот во провинцијата Керман, ние ќе платиме парична награда од 3 милиони долари на секој што ќе го убие Трамп“, рече пратеникот Ахмад Хамзах пред 290 парламентарци, пренесе агенцијата ИСНА.

Тој не рече дали наградата ја поддржуваат иранските верски водачи.

 „Ако имавме нуклеарно оружје денес, ќе бевме заштитени од закани ... Нашиот план треба да вклучува производство на ракети со долг дострел, способни да носат неконвенционални боеви глави. Тоа е нашето природно право “, рече тој.

Нуклеарниот договор од 2015 година, за кој Иран се согласи со Велика Британија, Кина, Франција, Германија, Русија и САД, само да развива цивилна нуклеарна програма ,го оневозможи развојот на воената програма.

Бидејќи САД  се повлекоа од договорот и ги обновија санкциите, Иран започна да ги намалува своите обврски предвидени со  договорот.

Техеран минатата недела објави дека нема да ги почитува ограничувањата за збогатување на ураниум предвидени со договорот, но исто така истакна дека ќе продолжи да соработува со Агенцијата за нуклеарна енергија , која следи како ги исполнува своите обврски.

Франција, Велика Британија и Германија го активираа механизмот за решавање спорови, предвиден со нуклеарниот договор, откако Техеран продолжи да го зголемува своето производство на збогатен ураниум во спротивност со договорот, реагирајќи на санкциите на САД.

притисни ентер