Според последните резултати, конзервативната партија освои повеќе од 360 пратеници во 650-члениот парламент, бројка која конзервативците последен пат ја имале во времето на Маргарет Тачер. Џонсон сега има слободен пат за поддршка од парламентот и исполнување на предизборното ветување за Брегзит до крајот на јануари идната година.
-Со овој мандат и со ова мнозинство, ќе успееме конечно да направиме што? Да го спроведеме Брегзит. Внимавајте. Овие избори значат дека спроведувањето на Брегзит е сега неизбежна, неодложна и не неспорна одлука на британскиот народ. И со овие избори мислам дека ставивме крај на сите тие мизерни закани за втор референдум,вели Борис Џонсон – Премиер на Велика Британија.
Опозициската Лабуристичка партија пак преживеа историски пораз, освојувајќи само 203 пратенички места. Лидерот на партијата Џереми Корбин пред изборите вети пресврт и нови преговори со Европската Унија за Брегзитот, кој според резултатите, мнозинството од гласачите не ги посакуваат. По поразот, тој најави дека засега ќе остане на чело на партијата, но дека никогаш повеќе нема да се кандидира за премиер.
-Нема да ја водам партијата во идни изборни кампањи, ќе разговарам со партијата да се осигурам дека ќе има процес на рефлексија за овој резултат и за политиките кои партијата ќе ги преземе во иднина,истакна Џереми Корбин – Лидер на Лабуристичката партија.
Изборите беа своевиден референдум и за иднината на Шкотска во Обединетото Кралство. Тамошната Шкотска национална партија која се залага за независност и останување во Европската Унија го освои мнозинството од гласовите.
Шкотска испрати јасна порака, не сакаме конзервативна влада предводена од Борис Џонсон, не сакаме да излеземе од ЕУ и сакаме иднината на Шкотска да биде во наши раце.изјави Никола Старџон – Премиерка на Шкотска.
Меѓу првите кои упатија честитки за победата на Борис Џонсон беше американскиот претседател Доналд Трамп кој на социјалната мрежа Твитер напиша и дека со тоа се отвара можност за поголема економска соработка меѓу двете земји. Честитки упатија и лидерите на Европската Унија, додека поранешната премиерка Тереза Меј порача дека на резултатот гледа како на излез од политичката парализа на земјата и конечно спроведување на Брегзитот.