Пендаровски: Високата корупција е закана за држава

 Неспорно е дека постојано вршиме прилагодување на домашното право со правото на ЕУ што е наша стратешка цел.

Но, она што е моја лична дилема, а верувам и на најголемиот дел од нашите граѓани е дали државните институции суштински или само формално ги имаат усвоено и ги следат европските вредности и принципи во оваа област, рече претседателот Стево Пендаровски во обраќањето на денешниот Регионален форум за борба против корупција на тема „Исполнување на ветувањето за проширување на ЕУ: 30 години добро управување и антикорупциски реформи во Централна и Источна Европа".

Претседателот Пендаровски повика на соработка меѓу институциите, невладиниот и приватниот сектор затоа што, подвлече, тоа е еден од успешните начини во справувањето со корупцијата, а транспарентноста и отчетноста се темели на доброто управување и владеење на правото.

– Долги години се занимавам со прашањата од областа на безбедноста и слободно можам да кажам дека во изминатите 10 до 15 години во нашата држава високата корупција прерасна во една од најголемите безбедносни закани за иднината на земјата. Тука морам да го издвојам т.н. случај „Рекет" кој дискредитираше голем дел од нашите напори и надежи за справување со криминалот и високата корупција. Лично не очекував дека носители на толку важни и одговорни функции толку ќе потфрлат во даден момент. Овој случај останува да биде лакмус за правната држава, а со тоа и тест за отпорноста од политички влијанија на клучните институции, истакна Пендаровски.

Според него, искрената борба за правна држава подразбира да се истражуваат криминалите на претходната, но и криминалите на актуелната власт, а истовремено е многу значајно да не се дозволи преку намерно застарување на предметите да се случи таканаречена скриена амнестија на сторителите на дела поврзани со високата корупција.

-Сметам дека е добро што се овозможи да постои континуитет и што предметите од поранешното СЈО беа преземени од редовното Обвинителство. Не постои земја членка на ЕУ која не ни укажува дека мора до крај да го истражиме тој огромен скандал во кој имаше милиони снимки кои мораат да имаат разрешница, во спротивно не може да очекуваме да не третираат како сериозна држава, потенцира Пендаровски. Тој очекува во наредниот период тоа да биде најтешката задача со која системски и сериозно ќе се зафатиме откако ќе почнеме да преговараме со ЕУ.

Шефот на државата смета дека за ефикасна борба против високата корупција потребен ни е нов закон за Јавно обвинителство кој ќе ги задоволува највисоките европски стандарди, наместо, како што рече, преку непринципиелни политички договарања зад сцена да ја компромитираме борбата со високата корупција.

Пендаровски се осврна на принципите на Конвенцијата на ОН за борба против корупцијата која укажува на тежината на проблемите и заканата што таа ја претставува за стабилноста и безбедноста, за демократските и за моралните вредности.

– Нам ни е неопходно системско справување со корупцијата и воспоставување нов вредносен систем за што е предуслов јасно изразената волја на релевантните политички фактори во државата, истакна претседателот Пендаровски и повтори дека неопходните реформи во сферата на владеење на правото и правната држава не треба да ги правиме за да ги задоволиме критериумите за членство во ЕУ, туку за да ја вратиме довербата на граѓаните во институциите и во сопствената држава.

Од грозјето „вранец" кое нема да го откупат винариите, ќе се прави алкохолен дестилат

Од грозјето „вранец" кое нема да го откупат винариите, а е со полош квалитет поради лоши временски услови, ќе се прави алкохолен дестилат. 

Но, и сопствениците на тоа грозје ќе ги добијат предвидените субвенции од државата од два плус два денара. Дополнителната мерка, пак, поврзана со алкохолниот дестилат, ќе ја чини Владата речиси скоро два милиона евра.

Ова беше соопштено по денешната работна посета на министерот за земјоделство, шумарство и водостопанство Арианит Хоџа во Кавадарци. Тој рече дека имал навистина добар состанок со Здружението на лозарите и претставници на дел од винарските визби.

-Ние синоќа до касно заедно со премиерот и економскиот стим во Владата ги разгледувавме сите можни опции како да се излезе во пресрет на оваа новонастаната ситуација со грозјето. Ние мора да изнајдеме решение во делот на тоа како да им се излезе во пресрет на лозарите, но секако имајќи го во предвид и интересот на винарските визби. Тука се мерките предложени досега, што значи тие четири денари субвенции за да се достигне ланската цена на грозјето и поддршката кон извозот на флаширано и наливно вино, која беше како супституција во транспортот. Исто така, и извозот на винско грозје до одредени количини што предвидуваше до 12 милиони килограми два денари, од 12 до 25 милиони килограми три денари и над 25 милиони килограми – четири денари, рече министерот.

Тој информираше дека денеска била претставена и новата мерка.

– Заради квалитетот на грозјето што има под 18 малигани, ние додатно како Влада ќе помогнеме со дополнителни четири денари за тоа грозје чија намена нема да биде за вино, туку ќе биде друга намена како на пример дестилат или концентрат за сокови. Мислам дека веќе имаме решение, ќе се излезе во пресрет. Поголемиот дел од винарските визби кажаа дека можат да ги прифатат количините, соопшти министерот Хоџа.

Кавадаречкиот градоначалник Митко Јанчев рече дека околностите на годината што ги имаме и Ковид-19 ситуацијата, но и лошите атмосферски услови со големите дождови во втората половина на август, имаа лошо влијание, особено за сортата „вранец", со слаби малигани или шеќерност на одредени места.

-Онаа мерка што ја предложи Владата, два плус два денари додадени на откупната цена, е одлична мерка. Но дојдовме до официјални информации преку Инспекторатот и Министерството дека има доста количини од „вранец", за кои нема договори со винарски визби. Во разговор со винарските визби увидовме дека тој „вранец" е со полош квалитет, не само во малиганите, туку и кога станува збор за болести, кои произлегуваат од атмосферските влијанија, рече Јанчев.

Министерот, нагласи, е два дена тука и по средбите со него и со заменик министерот Трајан Димковски, успеавме да изнајдeме решение, целокупната количина на „вранец" која нема да биде откупена за вино, да се претвори во алкохолен дестилат во постоечки винарски визби.

-Денеска успеавме со винарските визби да направиме заеднички состанок кој помина во добра атмосфера и со лозарите и со Министерството. Од утре Владата и Министерството треба да направат протоколи за таа работа, за да може од вторник да се отпочне со посебни пунктови за откупување на „вранец" за посебна намена – алкохолен дестилат или концентрат за понатамошни намени, појасни Јанчев.

Само, беше дециден Јанчев, да не му биде намената за вино на тој „вранец".

-Затоа што ако се претвори во вино, ќе има неквалитетно вино и затворање на пазарот на виното и би имале проблеми наредната година. Таа дополнителна мерка од речиси скоро два милиона евра која Владата ќе ја пружи директно за лозарите преку винарските визби, од големо значење е и мислам дека нема да остане грозје на нивите, вишокот ќе се откупи и ќе се преработи во алкохолен дестилат. Тоа е единствен начин каде што може ова грозје да се претвори во трајна суровина и да си најде понатамошна примена, а лозарите на некој начин да бидат задоволни со откупот на тоа грозје за алкохолен дестилат, за кое исто така си важи мерката два плус два денара субвенција по килограм грозје, рече Јанчев./МИА

Пендаровски: Во денешно време, потребата да се фокусираме на одржлив развој е уште поитна

Обраќање на претседателот Пендаровски на состанокот на високо ниво „SDG Moment 2020" во рамки на 75. Генерално Собрание на Обединетите Нации.

Би сакал да му се заблагодарам на Генералниот секретар на ООН за организирањето на овогодишниот настан посветен на целите за одржлив развој.

Чест е да се биде дел од оваа дебата, која се случува во мошне значајно, но сепак неизвесно време. Пандемијата предизвикана од КОВИД-19 има сериозно влијание не само врз економијата, туку ги промени и нашите животи и навики до непрепознатливост. Во денешно време, потребата да се фокусираме на одржлив развој е уште поитна, а оваа сложена задача бара координирани реформи и темелна промена на начинот на кој ги дизајнираме нашите општества.

Во 2015 година се обврзавме „да не оставиме никој зад нас" и се согласивме да ја спроведеме Агендата 2030, усвоена од земјите-членки на ООН. Нашиот фокус е подобар живот за сите граѓани, а нашите национални напори за одржлив развој се исто така усогласени со нашата клучна надворешно-политичка цел - членство во Европската унија.

Проценката за брза интеграција на целите за одржлив развој спроведена во 2019 година покажа дека 83% од националните стратешки планови за развој се усогласени со целите за одржлив развој.

Приоритетни цели за 2019-2020 година за Македонија се: да се стави крај на сиромаштијата; да се обезбеди инклузивно и правично, квалитетно образование; да се промовира инклузивен и одржлив економски раст и пристојни работни места за сите, да се преземат итни активности за борба против климатските промени, да се обезбеди пристап до правдата за сите и да се изградат ефикасни, отчетни и инклузивни институции на сите нивоа.

Климатските промени и натаму остануваат предизвик. На Самитот во Париз во декември 2015 година, Владата се обврза да ги намали емисиите од фосилни горива за дури 36% до 2030 година во споредба со основното сценарио.

Презедовме мерки за производство на чиста, достапна и безбедна енергија, вклучително и зголемена употреба на сончева енергија. Аерозагадувањето останува предизвик за Северна Македонија и бара долгорочен, системски пристап, инвестирање во позелена економија за позелена животна средина.

Еднаквоста пред законот е приоритет за нас. Посветени сме да продолжиме со структурните реформи, да ги зајакнеме владеењето на правото и судскиот систем на кои ќе им веруваат мнозинството граѓани.

Во јули 2020 година го презентиравме првиот Доброволен национален преглед кој ги отсликува достигнувањата од Агендата 2030 и ги идентификува следните чекори за забрзување на спроведувањето на целите за одржлив развој во преостанатата Декада на акција. При изготвувањето на овој документ, соработувавме и сме благодарни за придонесот на агенциите на ООН во Македонија, младинските организации, граѓанското општество, академските установи и стопанските комори.

Одржливиот развој не е само дополнителен план за светот. Агендата 2030 е обврска за нашите и идните генерации целосно да го искористат човечкиот потенцијал и да размислат за наследството што ќе го оставиме зад нас, стои во соопштението од Кабинетот на претеседателот.

ЦЈЗ Куманово: Единаесет новозаболени, 33 оздравени, еден починат од Ковид 19

Центарот за јавно здравје Куманово во последниве 24 часа евидентира, 11 новозаразени лица од Ковид 19, сите од Куманово, соопштија, денеска надлежните од јавната здравствена установа. 

Оздравени се 33 пациенти од Куманово Починат е еден пациент (48) соопшти Министерството за здравство

– Новозаболените веќе имале контакти со претходно заболени лица-изјави директорот на Центарот, д-р Ариф Љатифи

Денеска, извршени се 41 тестирања од кои 24 преку „Мој Термин" и 17 тестирања, извршени согласно епидемиолошки индикации.

Од почетокот на пандемијата во кумановско-липковскиот регион, ковид дијагностицирани се 1.655, а во моментов активни се 192 случаи./МИА

притисни ентер