Нејмар докажа дека нема непријатели во тимот

Нејмар потсети колку е моќен во дуелот помеѓу ПСЖ и Галатасарај (5-0).

Бразилецот постигна еден гол и забележа две асистенции, но неговиот потег за петтиот гол привлече најголемо внимание.

По изречената казна во корист на ПСЖ , Нејмар ја однесе топката на белата точка. Сепак, тој не го шутираше пеналот, туку му го препушти шутот на Единсон Кавани.

"На себичноста не и е место во фудбалот. На Единсон му беше потребен гол. На крајот, сите напаѓачи постигнаа по еден и сите си одиме дома среќни", изјави Нејмар и изненади многумина со таквата порака.

Ова е уште почудно ако се знае дека судирот меѓу Нејмар и Кавани започна пред две години токму поради пенал. Бразилецот сакаше да шутира пенал на натпреварот против Лион, но Кавани не му ја даде топката и тој го промаши ударот од белата точка. Подоцна, расправиите продолжија во соблекувалната и навивачите на ПСЖ јавно застанаа на страната на Кавани, кој е подолго во клубот.

Оваа сезона Кавани има проблеми со повреда и постигнал само два гола на 10 настапи пред натпреварот со Галатасарај.

Во САД се појави смртоносна болест што ја пренесуваат комарците

По повеќе месечни обиди да се спречи пандемијата на коронавирус, службениците за јавното здравје во Мичиген се соочуваат со друга закана и потенцијално поубиствена болест - источен коњски енцефалитис.

Болеста се пренесува преку комарци, а властите ја засилија дезинсекцијата откако се разболе 28 коњи и еден човек.

Источниот коњски енцефалитис, како што сугерира името, е присутен во источниот дел на Соединетите држави, но и во другите делови на земјата, пишува Ројтерс.

Општо е редок кај луѓето и убива 30% од луѓето кои се заразуваат.

Пет лица биле заразени во САД оваа година и таа пресметка не го вклучува горенаведениот случај.

Властите ги повикаа граѓаните да ги покриваат украсните езерца и да размислат за откажување на активностите на отворено за да се намали ризикот од каснување од комарец.

На „Инвеститорскиот ден" на Берзата склучени 339 трансакции, најголем број од јуни досега

На денешниот „Инвеститорски ден" на Берзата склучени се вкупно 339 трансакции што е најголем број од јуни до денеска.

– Вториот најголем број на трансакции на дневно ниво во овој период е 169, а просечниот дневен број на трансакции изнесува 62 трансакции, соопшти Македонската берза.

Вкупниот промет од тргување во БЕСТ системот денеска надминал милион евра, односно изнесува повеќе од 63 милиони денари, што е пораст од четири пати во споредба со просечниот дневен промет во БЕСТ во последниот квартал кој изнесува 15,3 милиони денари и е прв најголем промет на Берзата во овој период во класичното тргување. Воедно, денеска во БЕСТ системот на Берзата се внесени вкупно 620 налози за тргување, што е втор најголем број на внесени налози во текот на оваа година.

– Дополнително, податоците од Централниот депозитар на хартии од вредност покажуваат голем пораст на бројот на новоотворени сметки за хартии од вредност по најавата за одржување на „Инвеститорскиот ден", односно за една седмица се отворени над 50 сметки во ЦДХВ, што значи дека тоа се инвеститори кои никогаш претходно не тргувале на Берзата. За споредба, просечниот број на новоотворени сметки во ЦДХВ последниот квартал изнесува 73 сметки месечно. Сите овие показатели потврдуваат дека иницијативата „Инвеститорски ден", на кој домашните физички лица имаа можност да тргуваат со акции на сите пазарни сегменти без да ги платат провизиите кон Берзата, ЦДХВ и овластените пазарни учесници (банки и брокерски куќи), во износ на промет до 10.000 евра, е моќна алатка за промоција на инвестирањето во македонски акции и затоа овој настан ќе стане традиција на македонскиот пазар на хартии од вредност, велат од Берзата.

„Инвеститорскиот ден" го иницираше Берзата по повод одбележувањето на 25 години од нејзиното основачко собрание, а иницијативата ја прифатија ЦДХВ и осум членки на Берзата и ЦДХВ (Еурохаус, Инвестброкер, Комерцијална банка, НЛБ Банка, Стопанска банка Скопје, ТТК Банка, Фершпед брокер и Шпаркасе Банка Македонија). Иницијативата доби поддршка и од Комисијата за хартии од вредност. /МИА

Груби-Цакај: Односите меѓу Македонија и Албанија се одлични

Првиот вицепремиер и министер за политички систем и односи меѓу заедниците, Артан Груби, денеска во својот кабинет оствари средба се министерот за Европа и надворешни работи на Република Албанија, Гент Цакај.

Груби и Цакај размениле мислења за актуелните политички теми во земјата и регионот, по што заедно високо ја пофалиле соработката меѓу Скопје и Тирана која, како што стои во соопштението од Кабинетот на првиот вицепремиер и министер за политички систем и односи меѓу заедниците, е одлична.

Првиот вицепремиер Груби истакнал дека Република Македонија е многу посветена на исполнувањето на потребните реформи и задачи со цел што побрзо да се постигне отворањето на преговорите со Европската Унија.

Министерот за надворешни работи на Република Албанија, Цакај, му честитал на првиот вицепремиер Груби за успешното спроведување на клучните политики кои се во прилог на сите граѓани во Република Македонија.

– Цакај, исто така, му кажа на Груби дека Македонија не е само една соседна земја, туку е и пријателска земја и стратешки партнер со која имаме изградено односи преку дијалог и добра соработка. Целосното членство на Македонија во НАТО и заедничкиот пат кон Европската Унија се додадена вредност за развојот на регионот и особено за мирот и стабилноста, се наведува во соопштението.

Груби и Цакај разговарале и за начинот на либерализација на движењето на граѓаните, односно враќањето кон нормалноста на граничните премини, земајќи го како пример слободното движење меѓу Република Македонија и Албанија.

– Груби му рече на Цакај дека очекува за краток временски период истото слободно и безусловно движење да се спроведе и со Република Косово и другите соседни земји, стои во соопштението од Кабинетот на вицепремиерот Груби./МИА

притисни ентер