Општина Ресен ќе го реконструира градскиот пазар

 Општина Ресен ќе врши реконструкција и адаптација на градскиот пазар со која ќе се овозможат подобри услови за работа и организирање на градски пазар.

За проектот се изработува техничка документација, а целта е на подолг рок во Општина Ресен да има уреден и стандардизиран градски пазар, посочуваат од секторот за односи со јавност на тамошната локална самоуправа.

-За реализација на оваа инвестиција ќе обезбедиме 3,7 милиони денари, средства од општинскиот и буџетот на Центар за развој на пелагонискиот плански регион. Но, со оглед дека интерес за овој проект на општината има и од бизнис секторот, очекуваме и донации за комплетирање на проектот, информираат од Општина Ресен.

Во текот на 2020 година Општина Ресен ќе изработи и физибилити студија за решавање на проблемот од недостиг на паркинг места, за што како што посочуваат ќе биде изаботена документација со сообраќајно техничко решение и економско-финансиска анализа.

-За реализација на проектот нови паркинг места во Ресен ќе бидат инвестирани 10 милиони денари, информираа од тамошната локална самоуправа.

Најголем процент од новозаболените и смртните случаи имаат коморбидитети или се над 60 години

Кај 196 лица (34,3 отсто) е регистрирано присуство на коморбидитети.

Најголем процент – 25,9 отсто од новозаболените со Ковид-19 и во периодот од 3 до 9 август се лица на возраст над 60 години, а поголем број на заболени се регистрира и кај лицата на возраст меѓу 30 до 39 години – 18,4 отсто, од 40 до 49 години – 17,9 отсто, а од 50 до 59 години – 17,2 отсто, покажуваат денеска објавените податоци во неделниот извештај на Институтот за јавно здравје.

Кај 196 лица (34,3 отсто) е регистрирано присуство на коморбидитети.

Во истиот период регистрирани се 25 смртни случаи, а најголемиот број од нив се лица на возраст над 60 години (56 отсто). Кај 19 од смртните случаи (76 отсто) се регистрирани претходни коморбидитети.

Бајден ја номинираше сенаторката Камала Харис за потпретседател на САД

Кандидатот на Демократската партија за претседател на изборите во САД, Џозеф Бајден ја номинираше сенаторката Камала Харис за кандидат за потпретседател на државата.

Одлуката на Бајден, се цени како историска затоа што Харис ќе биде првата афроамериканка во историјата на Соединетите држави што ќе биде кандидат за претседател или за потпретседател на државата.

Бајден, кој беше потпретседател на САД, за време на администрацијата на Барак Обама, според набљудувачите, со овој потег признава дека афроамериканските гласачи ќе играат важна улога во неговите напори да го поразат актуелниот претседател на САД Доналд Трамп, на изборите на 3 ноември.

ВМРО-ДПМНЕ: Марин плаќа половина милион евра за парк кој е веќе изграден

Градоначалникот на општина Аеродром Златко Марин плаќа половина милион евра за парк кој е веќе изграден, а нема пари за да ги ослободи родителите од плаќање паушал за градинки.

Денес сме на местото на новиот скандал во чие средиште е градоначалникот Златко Марин. Марин преку општинската каса ќе плати речиси половина милион евра за реконструкција на веќе постоечки парк во време кога огромниот број на граѓани немаат паркови или пак истите се руинирани.

Марин ќе троши половина милион евра пари на граѓаните за прекопување на постоечки парк иако граѓаните бараат сервисирање и решавање реалните проблеми.

Актуелен проблем кој упорно одбива да го реши градоначалникот е ослободување на плаќање на паушали за градинките во услови кога родителите не добиваат услуги за тоа, нивните пари ги троши за скапи паркови на места каде веќе парковите постојат.

Вистинското прашање е дали преку изградбата на паркот од половина милион евра каде веќе постои постоечки парк, не се перат пари на граѓаните на Општина Аеродром?

Зошто на тендерот е избран поскапиот понудувач и каква врска има оваа компанија со Марин ако се знае дека веќе истата ја изработуваше преплатената Боемска улица во Центар?

Златко Марин наместо да решава проблеми тој создава проблеми.

Општина Аеродром ја претвора во пералница на пари.

ВМРО-ДПМНЕ

притисни ентер