Одложено враќањето на радикалните исламисти од Сирија во БиХ

Меѓу радикалните исламисти , кои треба да пристигнат во БиХ е и еден од најбараните џихадисти на Исламската држава , познат по заканата до целиот свет.

Не се знае до кога, „поради непредвидени околности“, е одложено враќањето на државјани на БиХ, кои требаше да слетаат на аеродромот во Сараево во саботата, откако минаа месеци во затворски кампови во северен Ирак и Сирија.

- Поради ненадејни и непредвидени околности во Сирија, враќањето на групата граѓани на БиХ закажано за утре е одложено , соопшти Министерството за безбедност на БиХ.

Објаснето е дека Министерството за безбедност на Босна и Херцеговина ги направи сите подготовки за враќање на првата група граѓани на БиХ од Сирија, вклучително и жени и деца, според заклучоците на Претседателството на БиХ и Советот на министри на БиХ.

Според претходните извештаи, група од 24 жени и деца, како и деветмина поранешни членови на терористичката организација Исламска држава, требало да се вратат во саботата.

По слетувањето на аеродромот во Сараево, тие требаше да бидат уапсени и предадени на Обвинителството на БиХ. Според извештаите на медиумите, тоа биле Армин Чурт, Сенад Касуповиќ, Јасмин Кесеровиќ, Емир Алишиќ, Миралем Бербиќ, Хамза Лабидија, Мухарем Даниќ, Емир Маркота и Армин Џелко.

Еден од нив, Кесеровиќ, е меѓу најбараните џихадисти од БиХ, кои во видео порака упатуваше грозни закани кон светот во 2016 година, велејќи: „Станете, муслимани и убивајте ги христијаните!“

Рекорден број новозаболени во Словенија,се воведуваат построги мерки

Во Словенија, во последните 24 часа биле потврдени 137 нови случаи на инфекција со коронавирус од 3557 тестови, што е за 33 повеќе од претходниот ден и е нов рекорден број на потврдени дневни инфекции од почетокот на епидемијата.

Досега најголем број на нови инфекции во еден ден е забележан на 15 септември, кога биле потврдени 123 нови случаи, од извршени 3.123 тестови.

Поради големиот пораст на бројот на новоинфицирани во последните две недели, Словенија е ставена на списокот на епидемиолошки небезбедни дестинации од страна на британската влада, откако тоа го направија и Норвешка, Шведска, Литванија и Естонија претходните денови, објавија денеска словенечките медиуми.

Бројот на активни случаи на инфекција во Словенија во моментов е 1116, од вкупно 4195 потврдени инфекции регистрирани од почетокот на епидемијата, објави Министерството за здравство.

Во болниците има 67 пациенти со ковид-19, што е за седум повеќе од претходниот ден, а 11 од нив се на интензивна нега. Биле забележани четири нови смртни случаи, а бројот на жртвите се искачи на 138.

Бидејќи следните десет дена се сметаат за клучни за смирување на епидемиолошката состојба, владата на Јанез Јанша ќе воведе задолжително носење маски на јавни простори како што се пазарите, но и во училниците и универзитетските сали.

Владата разгледува и можно ограничување на дозволеното дружење на луѓето на најмногу до шест лица. Покрај тоа, од следната недела ќе се ограничи работата на кафулињата, клубовите и другите локали, па ќе им биде дозволено да работат до 22 часот, а предвидени се и некои ограничувања за работата на продавниците, објавија медиумите.

Од друга страна, владата го повикува населението да преземе одговорност и доследно да се придржува до основните епидемиолошки мерки - одржување на потребното растојание, хигиена на рацете и избегнување приватни собири надвор од семејниот круг, како што се родендени и други прослави.

Со цел да се намали можноста за ширење на инфекцијата во работните средини, владата на Јанез Јанша ги повика работодавците во четвртокот да ја мерат температурата на сите вработени кога ќе дојдат на работа и со тоа да овозможат безбедна работа, за која тие се законски одговорни, и да го дефинираат степенот во договор со докторите на трудот за ризикот од инфекција во нивните простории и превентивно да го прилагодат начинот и времето на работа.

Во САД се појави смртоносна болест што ја пренесуваат комарците

По повеќе месечни обиди да се спречи пандемијата на коронавирус, службениците за јавното здравје во Мичиген се соочуваат со друга закана и потенцијално поубиствена болест - источен коњски енцефалитис.

Болеста се пренесува преку комарци, а властите ја засилија дезинсекцијата откако се разболе 28 коњи и еден човек.

Источниот коњски енцефалитис, како што сугерира името, е присутен во источниот дел на Соединетите држави, но и во другите делови на земјата, пишува Ројтерс.

Општо е редок кај луѓето и убива 30% од луѓето кои се заразуваат.

Пет лица биле заразени во САД оваа година и таа пресметка не го вклучува горенаведениот случај.

Властите ги повикаа граѓаните да ги покриваат украсните езерца и да размислат за откажување на активностите на отворено за да се намали ризикот од каснување од комарец.

На „Инвеститорскиот ден" на Берзата склучени 339 трансакции, најголем број од јуни досега

На денешниот „Инвеститорски ден" на Берзата склучени се вкупно 339 трансакции што е најголем број од јуни до денеска.

– Вториот најголем број на трансакции на дневно ниво во овој период е 169, а просечниот дневен број на трансакции изнесува 62 трансакции, соопшти Македонската берза.

Вкупниот промет од тргување во БЕСТ системот денеска надминал милион евра, односно изнесува повеќе од 63 милиони денари, што е пораст од четири пати во споредба со просечниот дневен промет во БЕСТ во последниот квартал кој изнесува 15,3 милиони денари и е прв најголем промет на Берзата во овој период во класичното тргување. Воедно, денеска во БЕСТ системот на Берзата се внесени вкупно 620 налози за тргување, што е втор најголем број на внесени налози во текот на оваа година.

– Дополнително, податоците од Централниот депозитар на хартии од вредност покажуваат голем пораст на бројот на новоотворени сметки за хартии од вредност по најавата за одржување на „Инвеститорскиот ден", односно за една седмица се отворени над 50 сметки во ЦДХВ, што значи дека тоа се инвеститори кои никогаш претходно не тргувале на Берзата. За споредба, просечниот број на новоотворени сметки во ЦДХВ последниот квартал изнесува 73 сметки месечно. Сите овие показатели потврдуваат дека иницијативата „Инвеститорски ден", на кој домашните физички лица имаа можност да тргуваат со акции на сите пазарни сегменти без да ги платат провизиите кон Берзата, ЦДХВ и овластените пазарни учесници (банки и брокерски куќи), во износ на промет до 10.000 евра, е моќна алатка за промоција на инвестирањето во македонски акции и затоа овој настан ќе стане традиција на македонскиот пазар на хартии од вредност, велат од Берзата.

„Инвеститорскиот ден" го иницираше Берзата по повод одбележувањето на 25 години од нејзиното основачко собрание, а иницијативата ја прифатија ЦДХВ и осум членки на Берзата и ЦДХВ (Еурохаус, Инвестброкер, Комерцијална банка, НЛБ Банка, Стопанска банка Скопје, ТТК Банка, Фершпед брокер и Шпаркасе Банка Македонија). Иницијативата доби поддршка и од Комисијата за хартии од вредност. /МИА

притисни ентер