Франција е потресена од сообраќајниот хаос и намален број на вработени во училиштата и болниците, откако 800.000 луѓе веќе втор ден се приклучија на уличните протести.
„Нашите граѓани знаат дека има широк спектар на актуелни верзии на пензискиот систем, 42 од нив, но тие не може да се одржат“, рече Филип. „Тие дури знаат дека, малку по малку, ќе треба да работиме подолго“, додаде тој.
„Мислам дека Французите веќе не можат да го прифатат режимот според кој некои луѓе кои вршат иста работа, се пензионираат со повеќе пари порано од другите“, рече францускиот премиер, осврнувајќи се на пензискиот систем за вработените во јавниот превоз, кои го формираат 'рбетот на штрајкот.
Филип рече дека се придржува кон планот за реформа на пензискиот систем, но дека промената ќе биде постепена, а не „брутална“.
„Верувам во социјалниот дијалог. Конфликтот никогаш нема да биде логичен“, рече францускиот премиер откако синдикатите повикаа на нов штрајк и демонстрации против планот на владата за реформите во пензиите и за вторник, 10 декември.
Филип рече дека ќе го објави планот на владата за реформите во пензискиот систем во среда напладне по завршната средба со синдикатите и работодавците што ќе се одржи во понеделник.