Преку алатка за споредување на цените на електричната енергија до пониски трошоци за струја за фирмите

Алатката Switch.mk е наменета пред се за малите потрошувачи и домаќинствата и има за цел  да им помогне при нивниот избор на снабдувач со електрична енергија. 

На потрошувачите од денеска им е достапна веб платформата Switch.mk на Регулаторната комисија за енергетика (РКЕ) на која може да направат споредби на дополнителните понуди од страна на активните снабдувачи на пазарот на мало со електрична енергија и да добијат јасни и сеопфатни и ажурирани информации за цените на струјата, периодот на траење на договорот за снабдување, фактурирањето, како и другите услуги поврзани со снабдувањето.

Алатката Switch.mk е наменета пред се за малите потрошувачи и домаќинствата и има за цел  да им помогне при нивниот избор на снабдувач со електрична енергија. Достапна е на македонски, албански и англиски јазик. Изработена е со техничка поддршка од USAID и Националната асоцијација за регулаторни комисионери – NARUC, а во консултација со активните снабдувачи со електрична енергија.

-Регулаторната комисија за енергетика е прва во регионот и во Енергетската заедница која воведува функционална алатка за споредба на цените на електричната енергија. Switch.mk  овозможува транспарентност на малопродажните цени со што компаниите ќе имаат директна корист во намалување на нивните трошоци за електрична енергија, рече претседателот на РКЕ Марко Бислимоски на денешната прес-конференција.

Тој нагласи дека алатката ќе придонесе фирмите да ги намалат нивните трошоци за струја и додаде дека со нејзиното воведување се покажува дека РКЕ има исклучителен капацитет и посветеност да ја донесе иднината пред и формално да има обврска за тоа и пред голем дел од земјите од Европската Унија.

-Платформата нуди и други корисни информации за потрошувачите со цел подобро разбирање како функционира пазарот на електрична енергија, кои се нивните права и обврски, како да се заштеди енергија,… Овозможува прикажување индикативна крајна цена за електрична енергија за секој снабдувач и за секоја објавена понуда, а снабдувачот не може да склучи договор со потрошувачот по цена и под услови понеповолни од објавените на платформата, рече Бислимоски.

Индикативната цена, како што кажа, е пресметана врз основа на цената на електричната енергија содржана во понудата, просечната цена на струјата произведена од повластени производители од ОИЕ кои користат повластени тарифи, просечните тарифи за користење на услугите за пренос и дистрибуција на струја, надоместок за оператор на пазар на струја и ДДВ, а заради поедноставување на пресметката не е вклучен надоместокот за јавно осветлување.

-Во овој момент на Switch.mk се објавени конкурентни понуди од снабдувачите пред се за малите компании, а за домаќинствата има само понуда од универзалниот снабдувач од причина што снабдувачите на слободниот пазар се уште не можат да понудат пониски цени од регулираната, рече Бислимоски и потенцира дека разликата меѓу најниската и највисоката  понуда е дури 28 отсто.

Маргарита Липковска Атанасов од USAID посочи дека алатката е моделирана според најуспешните примери на вакви модели во Охајо и Пенсилванија и во неа има вградено и модели за комуникација и едукација на јавноста по примерот во САД.

-Преку своите билатерални и регионални проекти USAID во континуитет обезбедува поддршка на Република Македонија во развојот на конкурентен пазар кој ги исполнува барањата на третиот енергетски пакет. Нашите имплементатори  NARUC и локалниот тим на консултанти со поддршка на Мисијата на USAID во Македонија заедно со РКЕ работеа на изработката и дизајнот на оваа алатка, но и на подготвување на правилата за нејзина употреба, рече Липковска Атанасов.

Таа посочи дека алатката ќе треба постојано да се надградува и ажурира, а како што најави Бислимоски, тоа се планира да се прави уште од утре.

Половина италијански град евакуиран поради бомба од Втората Светска војна (ВИДЕО)

Повеќе од половина од жителите на градот Бриндизи во јужна Италија биле вчера евакуирани поради деактивирање голема  бомба од Втората светска војна.

Околу 54.000 луѓе од вкупно 80,000 жители ги напуштија своите домови во 8 часот , изјави портпаролката на Градското собрание, Франческа Кумо.

Тоа е прва бомба од Втората светска војна што е пронајдена во градот по 1945 година и најголема евакуација во Италија во повоениот период, изјави Кумо.

Британската бомба била долга околу еден метар и тежела 225 килограми и била фрлена во 1941 година. Била недопрено, закопана во земја до 2 ноември кога биула ископана од градежните работници, јавува Си-Ен-Ен.

Во неделата италијанските вооружени сили ја пренеле бомбата на безбедно подрачје во блискиот каменолом, каде што денес ќе се изврши контролирана експлозија. Пред операцијата, жителите се евакуирани и им било дозволено да се вратат во своите домови околу 13 часот.

Заменик министерот Макрадули во посета на Кавадарци

Борбата за здрава животна средина е еден од приоритетите, порача заменик министерот за животна средина и просторно планирање Јани Макрадули.

Тој денеска беше во посета на Кавадарци, каде разговараше со кавадаречкиот градоначалник Митко Јанчев за проектите со кои општината има аплицирано и добиено пари од Министерството.

-Ме радува што заеднички соработуваме во зачувувањето на здравата животна средина, но и намалувањето на аерозагадувањето,  како еден од најголемите предизвици што постои во Република Северна Македонија. Денеска во рамки на имплементацијата на планот за чист воздух, ќе ги посетиме училиштата каде се врши замената на еколошките извори и замената на нафта со уреди на струја. Она што сакам да го нагласам е дека ова не само што е добро за децата кои учат таму, туку тоа значи и заштеда на пари, рече Макрадули.

Со енегетската ефикасност, додаде, некаде заштедите можат да дојдат и до триесетина проценти.

-Во една заедничка борба, како што тоа треба да го прават општините заедно со централната власт, ќе успееме да се справиме со предизвиците за заштита на животната средина, нагласи Макрадули.

Јанчев изрази благодарност до Министерството и потсети за кои проекти станува збор. Се работи, како што кажа, за намалување на аерозагадувањето, менување на системот за греење во училиште и градинка со еколошки грејни тела, за што беа издвоени над пет милиони денари. Тука е и проектот за енергетската ефикасност,  за која се добиени милион и 800 илјади денари, за неколку училишта. Градоначалникот потсети и на проектот за завршување на колекторскиот систем.

Прашан за коментар за реакциите на неготинци за изградбата на депонија за индустриски неопасен отпад, Макрадули рече дека во државата мора да се направи систем за третирање на отпадот. Целта на сите вакви системи, нагласи, е да биде добро и за заштитата на животната средина, но и отпадот да се третира, а не да се расфрлува наоколу.

-Будно следиме и согласно на нашите законски обврски, ја контролираме оценката на влијание врз животна средина што е презентирана на јавна расправа. Наша задача е да инсистираме на користење на најдобра пракса и техники кои постојат, за да не се влијае штетно врз животната средина. Во овој момент не е ништо конечно, начинот на продажба или начинот на целиот концепт што е направен, е предмет и на разгледување од страна на државното правобранителство. Во овој момент нема опасност за никој и тоа е еден процес кој не може да се случи преку ноќ, дециден беше Макрадули во изјава за медиумите. /МИА

Судскиот совет тврди дека во континуитет врши проверки за застарување на предметите

Судскиот совет (СС) во континуитет врши проверките за застарувањето на предметите со непосреден увид во Основниот кривичен суд Скопје.

Велат од СС за МИА во врска со повикот што вчера од трибината „На прав пат" во Скопје го упати премиерот и претседател на СДСМ Зоран Заев до Советот да направи проверки за застарувањето на предметите и да ја провери професионалноста на судиите.

-Судскиот совет на ден 9.10.2019 година и 20.11.2019 година започна со проверките за застарувањето на предметите со непосреден увид во Основниот кривичен суд Скопје. Континутетот на проверките продолжува и понатаму со увид на 18.12.2019 година, велат од Судски совет.

Заев исто така ги прозва и Државната комисија за спречување на корупцијата (ДКСК) да отвори постапки за проверка на имотот на судиите и обвинителите, а УЈП, Катастарот, Централниот регистар, МВР и Финансиската полиција уште овој месец да почнат проверки на имотот на судии, обвинители и членови на нивните семејства.

Претседателката на Државната комисија за спречување на корупцијата, Билјана  Ивановска за МИА одговори дека ДКСК веќе има изградено став по тоа прашање и согласно Законот за спречување на корупцијата и судирот на интереси усвојува Годишен план за наредна година, за следење на имотна состојба и судир на интереси, врз основа на извршена анализа и проценка на ризици од корупција во одредени области, што е и основа за изготување на Националната стратегија за спречување на корупцијата и судирот на интереси.

Годишниот план ќе се утврди и ќе се спроведе  врз основа на законските надлежности, а согласно расположливите човечки и  материјално – технички капацитети на Државната комисија.

Законските надлежности на Државната комисија во делот на  следењето на имотната состојба се спроведуваат преку проверка на вистинитоста на податоците внесени во анкетните листови, како и испитување на имотната состојба доколку има основано сомневање дека имотот на лицето е несразмерно зголемен во споредба со неговите редовни примања и примањата на членовите на неговото семејство.

Во делот на следењето на состојбата на судирот на интереси, Државната комисија ги проверува податоците од изјавите за интереси кои се однесуваат на работни места, членство во управни и надзорни одбори, здруженија на граѓани и фондации и други податоци кои се однесуваат на  избраните и именуваните лица и членовите на нивните семејства.

– Испитувањето на имотната состојба, е нова надлежност на Државната комисија, за чие спроведување  потребно е зајакнување на постојните човечки и  материјално – технички услови и  вклучување на други истражни органи, појаснуваат од ДКСК.

Имајќи ја предвид искажаната подготвеност на премиерот за ставање на располагање на сите капацитети на извршната власт за ефикасно спроведување на постапките за испитување на имотната состојба, Државната комисија смета дека е неопходна  координација на сите надлежни институции, но врз основа на конкретни задолжувања од страна на Владата на Република Македонија. /МИА

притисни ентер