Германските медиуми известуваат дека убиството било одмазда за наводната вмешаност на семејството фон Вајцекер во војната во Виетнам.
„Сторителот го објасни својот чин со фактот дека таткото на убиениот, поранешниот германски претседател Ричард фон Вајцекер, беше директор на хемискиот концерн„ Бохернгер Ингелхајм “во 60-тите години на минатиот век, и со тоа е одговорен за продажба на воени отрови во САД што се користеле во војната во Виетнам“. пренесува Spiegel Online.
Бидејќи Ричард фон Вајцекер не е повеќе жив, како жртва бил избран неговиот син, докторот Фриц, објасни 57-годишниот сторител.
По сослушувањето, човекот по потекло од сојузната држава Рајнска -Пфалц бил испратен во затворена психијатриска клиника. Тој објасни дека на интернет се информирал за предавањето на интернистот , докторот , Фриц фон Вајцекер на Клиниката „Шлоскарк Берлин“ на тема масен црн дроб, а потоа купил нож, се качил на воз и се упатил кон Берлин, каде го нападнал Фон Вајцекер за време на предавањето пред околу петнаесет учесници и го прободел во вратот.
При нападот сериозно е повреден и полицаец, кој случајно бил во публиката и кој се обидел да го спречи напаѓачот. Сочувство до семејството на убиениот фон Вајцекер упатија германскиот претседател Франк-Валтер Штајнмаер и германската канцеларка Ангела Меркел.
Ричард фон Вајцекер е еден од најпознатите германски повоени политичари, меѓу другото и за неговата посветеност на германската конфронтација со минатото. Тој ја вршеше функцијата претседател на Германија од 1984 до 1994 година. Пред тоа беше градоначалник на Западен Берлин.