ООН во минус од 1,2 милијарди долари, веќе не вработуваат, штедат на греење

Пристапот со ескалаторите во седиштето на Обединетите нации во Њујорк е заграден со жолта лента на која пишува дека не се во функција.

Ова можеби не изгледа важно, но ја симболизира сериозноста на монетарната криза со која се соочуваат ООН заради доцните исплати на десетици земји членки.

Ова е само една од мерките за штедење што ја донесе Светската организација заради „најголемата монетарна криза со која се соочија Обединетите нации за последните скоро десет години“,вели генералниот секретар Антонио Гутереш.

ООН престанаа да вработуваат, ги скратија службените патувања и ги откажаа состаноците за кои е потребен прекувремен надоместок. Трошоците за греење на просторот и климатизацијата се исто така ограничени.

Причината е во тоа што само 134 од 193 земји-членки годинава го платиле својот придонес . ООН се во загуба од 1,2 милијарди американски долари.

Најголеми должници се САД, Бразил, Аргентина, Иран и Израел.

Ова не е првпат ООН да се соочува со недостиг на пари на крајот на годината.

Соединетите држави, најголемиот плаќач на ООН, обично плаќа во ноември. За оваа и претходните години, Американците должат најмалку 100 милиони долари.

Одговарајќи на веста за финансиските проблеми на ООН, американскиот претседател Доналд Трамп напиша во твит: „Нека плаќаат сите држави членки, не само САД!“

Недостатокот на пари го надополнува фактот дека другите земји сè повеќе ги одложуваат плаќањата.

Експертот за кризни групи на ООН, Ричард Гоуан, вели дека ова не е причина за страв за иднината на Обединетите нации.

„Дури и САД на крајот ќе ги исполнат повеќето финансиски обврски оваа година“, изјави тој, додавајќи дека ООН повеќе се грижат за проблемот со ликвидноста отколку со целосната финансиска криза.

Портпаролот на организацијата им рече на новинарите дека со исклучувањето на ескалаторите заштедуваат 14 000 долари годишно, или 38 долари на ден.

Дваесет новозаболени со Ковид-19 во тетовскиот регион

 На подрачјето на шесте тетовски општини Центарот за јавно здравје од Тетово денеска регистрира 20 нови случаи со Ковид-19. И натаму општина Тетово има најмногу позитивни случаи.

-Општина Тетово денес има 12 нови случаи, во населените места на Општина Јегуновце има пет, двајца во Општина Брвеница и еден во рамки на Боговиње, изјави д-р Зорица Зафировска, специјализант по епидемиологија при Центар за јавно здравје Тетово

Во текот на изминатото деноноќие, според статистиката на Секторот за внатрешни работи Тетово, за неносење заштитни маски 36 лица добиле прекршочни платни налози, согласно член 6 од соодветната владина Уредба.

Аналитичарите поделени за одлуката на ВМРО-ДПМНЕ за замрзнување на односите со Пендаровски

Дел од аналитичарите во земјава со поделени мислења за одлуката на ВМРО-ДПМНЕ да ги замрзне односите со Претседателот Пендаровски. 

Политичкиот аналитичар Алберт Муслиу, одлуката на опозицијата ја оценува како погрешна, но додава дека не очекува можен влез во политичка криза. Според него, Пендаровски постапил исто како и неговите претходници.

За поранешниот дипломат Ристо Никовски пак, постапката на опозицијата е исправна и вели дека тоа било нај логичниот чекор бидејќи бил прекршен уставот. Никовски додава и дека формирањето на новата Влада, според него ќе се одвива тешко и со уцени.

Од опозициската ВМРО-ДПМНЕ, за сега не ги откриваат следните чекори. Од партијата и денеска го повторија ставот на партискиот лидер Мицкоски дека Пендаровски со доделувањето на мандатот го прекршил уставот и станал, како што велат соучесник во криминалот на Зоран Заев.

Претседателот Пендаровски по вчерашната средба со Мицкоски во Вила Водно, образложи дека го доделил мандатот на Зоран Заев, бидејќи имал најголем број на мандати, но и поради тоа што истекуваат уставните рокови. Сепак, како што кажа тој, доколку Заев не успее да формира Влада, мандатот ќе го добие Мицкоски.

Шилегов: Во Вардариште не се депонира нов отпад, туку се врши негова примарна обработка и се носи во Дрисла

Проблемите настануваат од долгогодишното несоодветно место и несоодветен начин на депонирање повеќе децении на комуналниот отпад. 

Депонијата Вардариште била во интензивно користење за фрлање на комуналниот отпад на Град Скопје од 1997 година, кога се отвора капацитетот Дрисла, и тоа што де факто се случува таму сега е всушност распаѓање на тој депониран комунален отпад што е потенцијален сериозен еколошки проблем за Град Скопје. Градот и „Комунална хигиена" тоа што во моментот го работат на Вардариште е дека таму има еден капацитет на претоварна станица каде се носи ѓубриштето во тој дел на градот, се врши примарна селекција, се истовара во возила и се носи во Дрисла, што значи дека нов комунален отпад не се генерира, туку се врши примарна негова обработка и се носи во Дрисла.

Ова денеска во изјава за медиумите го нагласи градоначалникот на Град Скопје Петре Шилегов по брифингот со новинарите за поранешната депонија Вардариште и проблематиката што постои таму и со која се соочува Градот, но и граѓаните кои живеат во непосредна близина.

– Проблемите настануваат од долгогодишното несоодветно место и несоодветен начин на депонирање повеќе децении на комуналниот отпад. Во непосредна близина на самата локација постојат три правни субјекти кои управуваат со отпади, а кои како институции се под исклучива надлежност на Министерството за животна средина и просторно планирање (МЖСПП) и Државниот инспекторат за животна средина, односно градот ја нема ингеренцијата да може да ги инспекторира или да изрече било каква санкција доколку истите несоодветно ја извршуваат својата дејност, иако ги мониторираме. Ги мониторираме од иста причина што нашите инспекциски служби се таму присутни заради постоењето на три диви населби, на неформални преработувачи на ѓубре, кои како такви ги санкционираме. Инспекцискиот надзор во последниве две години е зголемен за 300 проценти за разлика од минатото, посочи Шилегов.

Информира дека Градот во меѓувреме има изработено студија за целосна санација на Вардаршите, за целосна заштита на тој локалитет.

– Според таа студија која ја имаме направено да се изврши една примарна заштита на тој простор со технологиите кои се познати, потребно е за примарната некаде околу 25 милиони евра, а за целосна санација некаде околу 40 милиони евра средства кои Град Скопје за жал ги нема на располагање . Веќе имаме разговори со дел од претставниците на ЕУ тука, но мислам дека како проблем, како начин на решавање ќе мора и МЖСПП да партиципира со цел потенцијална опасност за животната средина во Скопје понатаму да нема. Тоа што ние го правиме е таму да се инсталирани т.н. подземни шипки, одводи, за метанските гасови кои се создаваат долу да не претставуваат евентуална еколошка опасност, додаде Шилегов.

притисни ентер