На последните големи протести во јуни, се собраа стотици илјади. Но, овој пат, со оглед на симболиката на датумот, организаторите најавуваат дека еден милион Чеси би можеле да излезат на протестот.
На 16 ноември се одбележува триесетгодишнина од Кадифената револуција, односно ненасилната револуција во Чехословачка, која траеше од 16 ноември до 29 декември 1989 година. За време на таа револуција, полицијата брутално интервенираше за да ги спречи студентите кои бараа престанок на комунистичкиот режим, повикувајќи на демократија и почитување на основните слободи.
Чесите се обединија на улиците на Прага, барајќи независно судство, слобода на говор и слободни избори. Неколку недели подоцна, режимот се распадна, оставајќи место на либералната демократија.
Но, организаторите на протестите предупредуваат дека три децении подоцна, демократијата во Чешка е во сериозна опасност затоа што премиерот, поранешен агент на комунистичката државна безбедност, е обвинет за корупција и загрозување на функционалната и здрава демократија во таа земја.
"Ништо не е изгубено, напротив. Луѓето се обединуваат за да ги поддржат либералните демократски вредности за кои толку се бореа. Подготвени се да излезат на улиците и да покажат дека се грижат. Тоа е сигнал што мора да се слушне и одекнува, не само во нашата држава “, велат организаторите на протестите.
"Ние, Милионската иницијатива, бараме оставка од премиерот Андреј Бабиш и од министерката за правда Марија Бенешева. Ќе повикаме на обединување на демократските сили во политичка опозиција и ќе претставиме долгорочен план за одбрана на демократијата", додадоа организаторите .
Инаку , протестите против актуелниот премиер Андреј Бабиш се одвиваат од крајот на април. Започнаа откако чешката полиција му поднесе кривична пријава за злоупотреба на два милиони евра и препорача да се поведе судска постапка. Претходниот министер за правда поднесе оставка, само еден ден откако полицијата ја заврши истрагата.