Владата ги утврди идните заеднички приоритети на општините од Полошкиот регион со централната власт

Владата вечерва ја одржа својата редовна 165-та седница во Тетово, како втора од утврдените 10 седници што во наредниот период еднаш месечно, ќе се одржуваат во десет различни региони во државата.

Претседателот на Владата, Зоран Заев ја отвори седницата со централната точка на дневниот ред: Информација за состојбите и извршените посети во општините Тетово, Гостивар, Јегуновце, Врапчиште, Боговиње, Брвеница, Теарце и Желино.

Премиерот Заев се заблагодари до Општина Тетово и до градоначалничката Теута Арифи што за оваа цел ја отстапија салата за седници и ја овозможија логистиката за одржување на седницата.

Во продолжение на ова соопштение ви го пренесуваме обраќањето на претседателот на Владата Заев на почетокот на седницата во целост:

„Им благодарам за присуството и на градоначалниците од овој регион, од општините Гостивар, Јегуновце, Врапчиште, Боговиње, Брвеница, Теарце и Желино.

Вашето присуство вечерва тука е исклучително значајно за да ги добиеме информациите од интерес на граѓаните од нивните заедници од прва рака, и согласно тоа да ги димензионираме нашите идни политики и одлуките за проекти кои може да се реализираат заедно со централната власт.

Оваа наша цел можеме да ја оствариме и врз основа на искуствата од бројните проекти што ги реализираше централната власт и што се од посебен интерес на граѓаните од полошкиот регион.

Таква инвестиција е изградбата на гасоводот на делницата Скопје-Тетово-Гостивар во должина од 76 километри, вреден 29 милиони евра. Целосно ќе биде изграден во 2020 година кога ќе го доведеме гасот до граѓаните и компаниите во Гостивар и Тетово со што значително ќе се намалат на трошоците на граѓаните и ќе биде од огромен придонес за намалување на аерозагадувањето.

Ја завршивме изградбата на филтер станицата на водоснабдителниот систем во Тетово со што градот сега се снабдува со квалитетна вода.

Заврши и рехабилитацијата на регионален пат Тетово-Попова Шапка во должина од 18,2 километри, инвестиција вредна 1,7 милиони евра и се подобри пристапноста до скијачкиот центар Попова Шапка за сите посетители.

Го рехабилитираме регионален пат Гостивар-Колари-Кичево и извршивме реконструкција на 5 мостови на оваа делница, и на патот до Охрид ја подобруваме безбедноста на сообраќајот за сите возачи.

Со изградбата на водоснабдителниот систем на Општина Желино, создадовме услови за поврзување на 18 населени места во општината.

Во интерес на граѓаните спроведовме градежни работи и опремивме повеќе детски градинки во Општина Боговиње, во Општина Брвеница, во селата Неготино и Добридол во Општина Врапчиште, во село Прељубиште во Општина Јегуновце, како и во Тетово и Теарце.

За Гостивар во тек е изработката на проектот, а во селата на Општина Гостивар Равен и Форино се отворени центри за ран детски развој, исто како и во тетовските села Бродец и Гајре.

Министерството за труд и социјална политика отвора канцеларии Во 7 населени места во Полошкиот регион. Овие канцеларии се oд суштинско значење за граѓаните од руралните средини бидејќи директно ќе може да поднесуваат документи и да се информираат за остварување на правата од социјална заштита.

Вакви канцеларии се отвораат во: Боговиње, Брвеница, Гостивар, Јегуновце, Теарце и Желино.

Преку проектот за подобрување на општински услуги, кој го спроведува Министерството за финансии со поддршка на Светска банка и ЕК, одобрена е техничката документација на Општина Тетово за набавка на автобуси.

Во март 2019 завршена е изградбата на ново училиште во село Гургурница, Општина Брвеница.

Министерството за финансии склучи договор за заем со Општина Тетово за „Изградба на дел од булевар Видое Смилевски Бато“ во Тетово во рамки на МСИП проектот.

Преку ИПА грант, министерството за финансии намени средства за набавка и инсталација на фотоволтаични системи во јавни општински објекти. Во Општина Тетово беа инсталирани фотоволтаични системи со вкупна моќност од 45kW на Филтер станицата за водноснабдителен систем, на Општинското основно училиште „Ѓерѓ Кастриот Скендербег“ во село Порој Средното училиште“7-ми Март“ во Тетово.

Со средства од Програмата за подобрување на општински услуги се финансира изградба на две филтер станици во село Неготино и с ело Добри дол во вкупна вредност од 31,1 милион денари за снабдување на квалитетна вода за 5223 лица од Добри Дол, 1383 од Топлица и 3673 од Неготино.

Преку програмите на Министерството за култура е поддржано формирањето на новата национална установа-Гостиварски театар. Во тек се првите вработувања, а колку што сум информиран се работи и на првата премиера.

Во завршна фаза е карабината на нов објект во Тетово „Културно-образовен центар“ со нов театар и библиотека, а пред една недела беше положен камен-темелник за изградба на дом на култура во село Камењане во Општина Боговиње.

Од програмите за заштита на културното наследство во тек се истражувањата на Ѓоновичко кале, каде активно работат екипи од Конзерваторски центар – Гостивар, а привршија и подготовките за започнување на непосредни активности за заштита и конзервација на влезната партија на Тетовското кале.“

Во продолжение на седницата говореа градоначалниците и претставниците на општините од овој регион и беа утврдени насоките за остварување на тековни проекти кои се реализираат во соработка на локалните и централната власт и се презентираа идните приоритети кои главни се однесуваат на инфраструктурните проекти во патната мрежа, во образовните институции, како и во проектите за водоснабдување, канализационите системи и депониите за обработка на отпадот ,се наведува во соопштението од Владата.

Во Британија се појавија опасни таблети екстази со ликот на Трамп

Британската полиција издаде предупредување до јавноста да се чуваат од апчиња екстази со ликот на американскиот претседател Доналд Трамп кои се исклучително опасни.

Маж е фатен под сомнение дека снабдувал со портокаловите апчиња, соопшти полицијата.

"Криминалците постојано наоѓаат нови начини да ја продаваат својата дрога и да ги направат позависни. Сме наоѓале претходно апчиња МДМА (екстази) произведени во форма на разни популарни предмети од културата, а неодамнешен пример се оние во форма на Доналд Трамп", рече детективот Рајан Барнс од полиција во Бедфордшир.

„Ако наидете на овој или друг вид дрога, ве молиме, не земајте ја поради ваша безбедност, бидејќи никогаш не можете да бидете сигурни што содржат овие апчиња“, додаде тој.

Ова не е првпат да биде откриена дрога со лик на американскиот претседател. Британската полиција и минатото лето предупреди на силни апчиња кои потсетуваат на Трамп.

Слични се забележани пред две години во Хонг Конг, во Германија минатата година и во САД оваа година.

Лукашенко праќа војска на западната граница

Претседателот на Белорусија, Александар Лукашенко, изјави денеска дека падобранска бригада ќе биде распоредена на западната граница на земјата како одговор на воените вежби на НАТО во Полска и Литванија.

Лукашенко го најави ова откако претходно денеска се договори за соработка со рускиот претседател Владимир Путин.

Бидејќи Европската унија му се заканува на Минск со санкции поради претепување на антивладините демонстранти, Лукашенко рече дека е загрижен за воените вежби на НАТО во двете соседни земји.

Белоруската новинска агенција „Белта“ претходно објави дека двајцата претседатели разговарале за „ситуацијата во Белорусија и во странство“.Додаде дека Лукашенко побарал да разговара со Путин за „заканата“ на која била изложена неговата земја, но и „целиот наш регион“. Тој најмногу се насочил кон опасноста што протестите во Минск ја претставуваат за унијата на Русија и Белорусија.

Илјадници демонстранти се собраа денеска повторно во Минск, главниот град на Белорусија, во знак на протест против реизборот на претседателот Лукашенко, објави АФП. Десетици илјади демонстранти го оспоруваат реизборот на Александар Лукашенко низ целата земја од неделата, изразувајќи незадоволство од масовната измама и насилното задушување на протестите.

Белоруските власти добија поддршка од Москва, која ги осуди обидите за „надворешно мешање“ насочени кон дестабилизација на Белорусија, историски сојузник на Русија, и покрај тензиите меѓу двете земји што се појавија во последните години.

По пет месеци , отворена најголемата туристичка атракција во Рио (ВИДЕО)

Големите туристички локации во Рио де Жанеиро, вклучувајќи ја и статуата на Христос Спасител  со поглед на бразилскиот град, од денеска повторно се отворија за  јавноста, откако беа затворени пет месеци поради пандемијата на коронавирус

„Повторното отворање на Христос го симболизира повторното отворање на Бразил кон туризмот“, изјави министерот за животна средина Рикардо Салес на церемонијата пред статуата.

Од посетителите ќе се бара да носат маски и да одржуваат социјална дистанца, и нема да им биде дозволено да лежат на земја - како што многумина прават во обид да го добијат најдобриот агол за фотографии пред нозете на огромната статуа.

Сместен на врвот на ридот Корковадо висок 2 300 метри во центарот на Рио во националниот парк Тијока, споменикот нуди спектакуларен панорамски поглед на градот и неговата околина.

Бидејќи поради мерките за социјално растојание беше затворен во март, споменикот на Христос Спасител продолжи да функционира како верско светилиште, нудејќи јавни миси и бдение во чест на здравствените работници и жртвите на пандемијата.

Исто така, деенска проработе жичарницата Пао де Акучар, која нуди панорамски поглед на градот, аквариумот Акварио и гигантската Рио Sвезда, најголемото тркало Ферис во Јужна Америка, пуштено минатата година во пристаништето.

Националната конфедерација на стоки, услуги и туризам во Бразил проценува дека секторот за туризам во земјата изгуби 154 милијарди реали (28,4 милијарди американски долари) во последните пет месеци, работејќи со само 14 проценти од својот капацитет.

Државата Рио де Жанеиро, со 17 милиони жители, има регистрирано повеќе од 14.500 смртни случаи и скоро 190.000 случаи на коронавирус, според официјалната статистика.Самиот главен град, кој во јуни започна постепено економско отворање, во последните 24 часа бележи 33 смртни случаи и 1.365 нови заразени.

Бразил, со 106.500 смртни случаи и 3,2 милиони заарзени до денес, е втора земја најтешко погодена во светот, по САД.

притисни ентер