Тројца приведени во антитерористичка акција во Грција

Грчката полиција соопшти денеска дека уапсила три лица во големата антитерористичка операција и запленила оружје, вклучително и калашников што во нападите го користеле припадниците на екстремната левица.

Една од левичарските групи, Револуционерната организација за самоодбрана, ја презеде одговорноста за нападот со гранатирање на француската амбасада во Атина на 10 ноември 2016 година.

Полицаец беше полесно повреден во експлозијата што предизвика помала материјална штета.

Организацијата, исто така, презеде одговорност за нападот во јули 2014 година врз мексиканската амбасада во Атина.

Запленетиот калашников бил користен во неколку напади на Револуционерната организација за самоодбрана во 2014 година - оној во седиштето на грчката социјалистичка партија ПАСОК во Атина и во зградата на мексиканската амбасада во Атина.

Грчкиот премиер Киријакос Мицотакис ја поздрави акцијата како „многу голем успех“ и ја потврди „решеноста да се стави крај на проблемите со тероризмот во земјата“.

Нападите врз јавни институции, медиуми, банки или дипломатски мисии се повторуваат со години наназад во Грција.

притисни ентер