Помпео во Берлин остро ги нападна Русија и Кина

Американскиот министер за надворешни работи, Мајк Помпео остро ги критикуваше Кина и Русија за време на говорот по повод одбележувањето на 30-годишнината од падот на Берлинскиот Ѕид.

„Русија, предводена од поранешен офицер на КГБ некогаш стациониран во Дрезден, ги напаѓа соседните земји и ги ликвидира своите политички противници“, рече денеска Мајк Помпео во говорот во Фондацијата Коербер, алудирајќи на поранешната шпионска активност на рускиот претседател Владимир Путин.

Американскиот министер за надворешни работи ја спореди позицијата на Кина и Русија со онаа во поранешна Источна Германија, велејќи дека тоа се „режими за кои падот на Ѕидот е предупредување исполнето со страв, а не причина за славење“.

„Руските власти го окупираа Крим со помош на рации и тортура. Во Чеченија, секој што е прогласен за непожелен од властите, исчезнува“, рече Помпео.

Во исто време, тој повторно предупреди за опасноста од изградба на гасоводот Северен тек II.

„Не сакаме европското снабдување со енергија да зависи од волјата на Владимир Путин“, рече Помпео.

Коментирајќи за Кина, Помпео рече дека властите во Кина вршат притисок врз нивните граѓани, што „шокантно“ наликува на методите  што ги користеше поранешниот ГДР.

„Комунистичката партија на Кина ги вознемирува и ги следи активистите од Ксинџијанг и Хонг Конг кои бегаат во егзил во Европа“, рече Помпео.

Тој исто така предупреди дека кинеската група Huawei нема да смее да учествува во изградбата на мобилната мрежа 5G.

Помпео, по повод одбележување на 30-годишнината од падот на Ѕидот, повика на заедничка борба на САД и партнерите во одбрана на човековите права.

Помпео, кој учествува во одбележување на 30-годишнината од падот на Берлинскиот Ѕид, во текот на денот е предвидено да се сретне и со германската канцеларка Ангела Меркел.

притисни ентер