Во Женева средба на Заев и Димитров со Дендиас

Западен Балкан нема друга алтернатива, освен членството во ЕУ, е пораката што попладнево ја испратија лидерите на земјите од регионот во рамките на Светскиот економски форум во Женева. 

На заедничката пресконференција, премиерот Заев рече дека земјава, освен што е кандидат за членство 14 години, развива успешно мултиетничко општество и направила сериозни реформи, вклучувајќи ги и договорите со Грција и Бугарија. Верува дека во мај следната година, Македонија ќе добие позитивна одлука за преговори со Унијата. 

-Со двете одлуки на ЕУ, се отвораат многу можноси за создавање национализам, популизам и радикализам, што не е добро за регионот. Мислам дека во следната половина од годината, односно во првата половина од 2020 година, ќе биде многу добра за нас, бидејќи Хрватска ќе ја има можноста да го преземе претседавањето со ЕУ, што значи поголем фокус за целиот регион. Многу сум му благодарен за големата посветеност на Андреј кон оваа агенда. Треба да продолжиме со процесот на реформи и секако, да чекаме позитивна одлука на Самитот во Загреб., изјави Зоран Заев, претседател на Владата

Поддршка за евроинтеграциите на Македонија стигна и од шефот на грчката дипломатија Дендиас, кој на маргините на економскиот форум во Женева, се сретна со македонскиот колега Димитров. Грчкиот министер нагласил стабилната поддршка на Атина, потенцирајќи ја потребата за целосно спроведување на Договорот од Преспа. Димитров посочил дека очекува Грција да биде силен промотор на интеграцијата во земјава, а двајцата се согласиле дека треба да се интензивира соработката од заеднички интерес. Разговорот меѓу министрите следи пред најавената втора средба меѓу премиерите Заев и Мицотакис во четврток во Солун. Грчката влада минатата недела почна сериозни внатрешни консултации, по најавите на Заев дека делови од Преспанскиот договор, можат да останат во застој поради условеноста со преговарачките поглавја.

притисни ентер