Пендаровски ги намалува очекувањата од средбата со Макрон

Претседателот Пендаровски не очекува пресврт или драстична промена на позицијата од средбата со неговиот француски колега Емануел Макрон идниот вторник. 

Вели дека не треба да се има преголеми очекувања, бидејќи станува збор за држава кој е меѓу најмоќните во Европа, но средбата според него ќе биде исклучителна прилика за да се соочат аргументите со Макрон и да се нагласи до сега постигнатото за членство во ЕУ од македонска страна.

Макрон пред два дена предизвика силни реакции во меѓународната јавност со интервјуто дадено за Економист, каде порача дека НАТО е на смртна постела, а Европа на работа на провалија. Со реакции се јавија и американскиот државен секретар Помпео и германскиот шеф на дипломатијата Хајко Мас, кои застанаа во одбрана на Алијансата.

-Мислам дека НАТО останува важна, клучна и историски мислам нај клучно стратегиско партнерство во целокупната досегашна историја. Токму затоа и претседателот Трамп говори да се осигуриме дека секоја нација треба да го носи својот товар, и да соработува, вели американскиот државен секретар Помпео.

„Не, не верувам дека НАТО е во мозочна смрт, целосно верувам во меѓународната соработка. Најнапред затоа што се соочуваме со предизвици од глобален карактер, а НАТО е сојузот каде соработуваме за безбедносни прашања“, изјави германскиот шеф на дипломатијата Хајко Мас.

Коментарите на францускиот претседател за НАТО, сепак наидоа на позитивни реакции во Русија. Портпаролката на руското МНР зборовите на францускиот претседател ги нарече златни, а со став се јави и нејзиниот шеф Сергеј Лавров.

-Доколку Претседателот Макрон чувствува дека таа дијагноза е реална, има секакво право да го изрази неговото мислење. Сепак, францускиот претседател го познава НАТО далеку подобро од мене, бидејќи Франција е еден од лидерите во Алијансата. Ние би сакале нормален дијалог со НАТО, кој гарантира еднаква и взаемна соработка,истакна Сергеј Лавров.

Интервјуто на Макрон за Економист доаѓа на неполн месец од самитот на НАТО во Лондон, а неговите коментари се на иста линија со тие на американскиот претседател Доналд Трамп, кој во повеќе наврати порача дека според него, НАТО е застарено наследство од студената војна.

Мојаноски: Позитивно е што се работи на отворање на прашањето на МПЦ-ОА пред Вселенската патријаршија

Стасусот на МПЦ нема да го реши ниту претседателот ниту премиерот, тоа е во надлежност на Вселенскиот патријарх. 

Професорот Цане Мојаноски, кој е поранешен претседател на Комисијата за односи со верските заедници, позитивно го оценува обидот на претседателот Стево Пендаровски и на премиерот Зоран Заев за отворање на прашањето за статусот на Македонската православна црква пред Вселенската патријаршија.

– Стасусот на МПЦ нема да го реши ниту претседателот ниту премиерот, тоа е во надлежност на Вселенскиот патријарх. Она што треба да го направиме е да се обидеме тоа прашање да го отвориме, да го забрзаме неговото решавање. Во историјата на православието постојат бројни искуства што укажуваат дека световните власти покажувале интерес за решавање на црковни прашања. Така го гледам и односот на претседателот и на премиерот, рече Мојаноски.

Професот Мојаноски коментирајќи го обидот на македонските власти да покренат иницијатива за отворање на прашањето од потребата за признавање на МПЦ укажа и на изјава дадена од самиот Вселенски патријах Вартоломеј дека за организирање на православна црква треба да има и потреба во рамки на самата држава.

– Има значителен број држави во светот во кој живеат православни христијани, но тие држави не покажуваат интерес дека православните христијани треба да се организирани во посебна црква. Во тој контекст лично сметам дека односната активност на носителите на државните функции во земјата е постапка што демонстрираат нивен одговорен однос кон затворање на отворените прашања на патот на земјата кон ЕУ, рече Мојаноски.

За тоа колку може да трае решавањето на прашањето околу МПЦ, професорот Мојаноски појасни дека останува на самиот Вселенски патријарх, негово е правото да решава согласно начинот на кој го восприема светот.

– Таму важи принципот на едностарешинството, на почитувањето на најстариот – во случајот на првиот епископ кој по чин е еднаков со сите епископи, но прв по достоинство. Единствено тој има право да ги информира другите епископи односно другите цркви дека е формирана православна црква, истакна Мојаноски.

Истовремено тој укажа и на историските факти дека секоја црковна борба во православието за какви било прашања секогаш е зачинета со одредени политички интереси.

– Било која црковна борба, па и историјата на Охридската архиепископија, ќе видите значителен број историски искуства борби со Вселенската патријаршија, повторно последица на интересите, чија е таа црква, чиј епископ треба да раководи со неа, вели Мојаноски.

Поради тоа што македонските црковни власти како припадници на канонски непризнаена православна заедница немаат можност непосредно да општат со Вселенската патријаршија, треба да се најде соодветен субјект што треба да го информира Вселенскиот патријарх дека се создала нова црква, која живее според каноните на православието./МИА

Царовска и Шахпаска учествуваа на дебата за Денот на толковниот јазик

„ Врвен приоритет е унапредување на услугите и вклученоста во општетството на глувите и наглувите лица“.

Mинистерките за образобвание и наука и за труд и социјална политика, Мила Царовска и Јагода Шахпаска денес учествуваа на дебата „Образованието кај глувите лица и застапеноста на знаковниот јазик во нашата држава", организирана од Сојузот на Глуви и наглуви лица по повод 23 септември- Интернационалниот ден на знаковниот јазик.

Двете минстерки на настанот порачаа дека нивен врвен приоритет е продолжувањето на успешната соработка со Сојузот, но и креирањето на политики коишто ќе ги унапредат услугите и вклученоста на овие лица во општеството.

„Денес зборуваме за унапредување на знаковниот јазик во нашата држава. Како Министерка за образование имам предизвици коишто се однесуваат на подобрување на образовниот ситем за глувите и наглувите лица, но и создавање подобри услови во образованието на овие лица. Она на што ќе работиме заедно со Сојузот е да ги создаваме потребните толкувачи. Во овој процес секако ќе бидат вклучени и високообразовните институции коишто преку квалитетни студии ќе го обноват кадарот", рече министерката Царовска.

Министерката за труд и социјална политика Шахпаска истакна дека градењето општество кое нуди еднакви можности за сите и целосна инклузивност на лицата со попреченост се определба на владата и на министерството.

„За мене како Министер за труд и социјална политика од исклучително значење се условите ги имаат лицата со одредена попреченост за нивна целосна инклузија во општеството, особено по завршувањето на формалното образование.

Нам ни треба општество кое и во јавниот и во реалниот сектор ќе создаде услови за целосна интеграција на сите лица. Затоа што придонесот што секој може да го даде за развој и напредок на општеството е бесценет", истакна Министерката за труд и социјална политика, Јагода Шахпаска.

Како особено значаен проект преку кои се овозможува поголема вклученост и поддршка на лицата со попреченост, министерката Шахпаска го посочи проектот „ Call Centar" , бидејќи преку него се ажурира мобилна апликација која овозможува глувите лица да добиваат одредени услуги и информации, како услуги во банка, аптека и слично.

Преку Министерството за труд и социјална политика а во соработка со здруженија и граѓански организации се реализираат и други проекти со коишто се обезбедува поголема и континуирана вклученост на глувите и наглувите лица, стои во соопштението од Министерство за труд и социјална политика.

Заштитата на културното наследство, младите и евроинтеграциите – трите главни столба во мандатот на министерката за култура Стефоска

„Пред нас е период кога сечиј придонес е важен, очекуван, потребен. Повелете, приклучете се!“, истакна министерката за култура Ирена Стефоска на денешната прес-конференција.

Таа ги претстави целите и визијата на Министерството за периодот што следува содржани во мандатното писмо што го доби од претседателот на Владата, Зоран Заев.

На прес-конференцијата, која се одржа во дворот на Министерството за култура во согласност со протоколите и запазување на мерките за заштита од корона-вирусот, Стефоска истакна дека заштитата на културното наследство, евроинтеграциите и младите се трите главни столба во Програмата на Владата и во нејзиниот мандат како министерка за култура.

„Како што стои во моето мандатно писмо, во изворното значење на зборот ’министер‘ се содржи службата во интерес на граѓаните. Јас и мојот тим во оваа насока имаме благородна и одговорна мисија зашто културата и уметноста не познаваат граници и не ги делат луѓето ниту по етничка ниту по партиска ниту, пак, по родова, генерациска и која било припадност. Клучниот документ што ги дефинира основите на нашата мисија во културата е Националната стратегија за развој на културата за периодот 2018 – 2022 година, која беше изгласана во Парламентот без ниеден глас против. Ова подразбира обезбедување и осовременување на условите за работа на институциите, на независната сцена и на поединците“, нагласи министерката за култура Стефоска.

Таа истакна дека суштинската грижа за недвижното, движното и нематеријaлното богатство е врвен приоритет на нејзиниот министерски кабинет, а, впрочем, едно од клучните барања и на ЕУ кон Република Македонија е токму заштитата на културното наследство.

Стефоска во своето излагање пред новинарите се осврна на обврските кон УНЕСКО, Охрид и Охридскиот Регион и потсети дека како поранешна претседателка на Комисијата за култура во Собранието, беше иницијатор за организирање на Надзорна расправа за Охридскиот Регион, од која произлегоа 22 заклучоци. Таа посочи дека не е помалку важно што во рамките на Програмата за прославување на јубилеи на историски настани и еминентни личности за периодот 2020 – 2021 година на 40. сесија на Генералната конференција на УНЕСКО беа потврдени двата јубилеја предложени од нашата држава. Заедно со УНЕСКО, годинава се сеќаваме на 50- годишнината од смртта на Параскеви Кирјази, која претседавала со Советот за кодификација на албанскиот јазик во 1908 година во Битола, додека, пак, следната година УНЕСКО се придружува кон големиот јубилеј – 100 години од раѓањето на великанот на македонскиот јазик и книжевност, Блаже Конески.

Министерката за култура, осврнувајќи се на заштитата на културното наследство, истакна дека нејзина прва задача како министерка е да овозможи воспоставување на ефикасен систем за заштита на културното наследство и макотрпно, заедно со тимот и институциите, да работи на раскрстувањето со вандалскиот однос кон нашето наследство бидејќи таквиот однос кон него, сите нас нѐ носи во пропаст.

„Уште веднаш по моето стапување на должност, од надлежните институции побарав детални податоци и анализи за црквата „Св. Ѓорѓи“ во Курбиново каде што по 7 години изготвување проекти, досега се спроведени само заштитна покривна конструкција и превентива на ѕидното сликарство иако со децении сме сведоци на ужасната состојба во која се наоѓа црквата. Замислете, зборувам за културно добро од 12 век, со светска вредност!“, истакна министерката за култура Стефоска. Таа пред новинарите изрази зачуденост, зошто во последниве децении црквата „Св. Ѓорѓи“ не била прогласена од надлежните институции за културно наследство во опасност иако Законот за заштита на културното наследство го наложува тоа. Стефоска посочи дека таквиот статус, добро во опасност, значи да се мобилизираат сите стручни и материјални ресурси во земјава и да се вклучуваат меѓународни експерти и ресурси за трајно решавање на проблемот.

„Зошто досега не бил применет овој пристап и за сите други загрозени културни добра од светско и од национално значење, на пример, актуелен е случајот и со манастирот „Успение на Пресвета Богородица“ во Матејче, иако уште во 2017 г. Министерството за култура и Управата за заштита на културното наследство повеле иницијатива за негово прогласување за културно добро во опасност“, рече министерката за култура.

Таа пред новинарите истакна дека нема да бидат заборавени и спомениците од НОБ кои се еднакво важен сегмент во нашата културна меморија.

„Пред 10 дена од Секторот во Министерството побарав да изготват листа на споменици од НОБ на територијата на целата земја, кои лично ќе ги обиколам за да видам во каква состојба се наоѓаат. Затоа што антифашизмот е втемелен во нашата државност, а повоена Европа е градена на антифашистички темели. Младите генерации заслужуваат да растат и да се развиваат со вредностите на антифашизмот“, посочи Стефоска.

Во остатокот од своето обраќање таа потенцираше дека постои соработка со Град Скопје за ревитализација на централното градско подрачје по штетите предизвикани од „Скопје 2014“, а, според Програмата на Владата, за оваа цел се планира распишување меѓународен конкурс.

Процесот на интегрирање на Република Македонија во Европската Унија за ресорот култура е ветер во грб, бидејќи вториот столб во Програмата на Владата и на овој министерски кабинет, како што нагласи Стефоска, се токму евроинтеграциите. Таа истакна дека во институциите на Европската Комисија имаме отворени врати за секаков вид соработка и помош, во административна, програмска, кадровска и во финансиска смисла, а пред два дена на средбата со високи претставници на Делегацијата на Европската Комисија во земјава се договорени и некои конкретни чекори. „Во пристапните преговори, културата е во Поглавјето 26. Напорно ќе работиме за успешно да го отвориме и да го затвориме ова поглавје“, рече Стефоска.

За остварување на нашата визија за модерна, секако, и на автентична култура, исткаена со боите од сите етнички заедници во земјава, неопходни ни се енергијата и креативноста на младите, со што министерката за култура најави дека младите се третиот столб во работата на овој министерски кабинет и на Владата, како што, впрочем, стои и во мандатното писмо од Премиерот до неа.

На новинарско прашање, министерката за култура Стефоска појасни дека новите Годишни конкурси за поддршка на проекти од национален интерес ќе бидат објавени во согласност со стариот Закон за културата, но, како што кажа, веќе се работи на подобрување и усовршување на критериумите за вреднување на пријавите во Годишните конкурси. Стефоска истакна дека е од особена важност и во Собранието што побрзо да се донесе новиот Закон за јавен интерес во културата, во кој, меѓу другото, се менува и моделот на финансирање во културата.

За другите прашања, Стефоска нагласи дека пред доаѓањето на есента и во координација со сите засегнати страни, установите и Комисијата за заразни болести, посветено се работеше за повторно отворање и функционирање на институциите од културата во време на светската пандемија. Протоколите за театрите, пред новинарите ги појасни советничката на министерката за култура, Јасмина Никуљска, која кажа дека во текот на вчерашниот ден на седницата на Владата биле усвоени општите протоколи за одржување настани во затворен простор, кои се однесуваат и на кината и на театарите. Никуљска напомна дека националните установи од областа на театарската дејност имаат обврска да изготват индивидуални протоколи, бидејќи секоја институција има свои специфики, а тие треба да бидат усогласени со општиот протокол кој е усвоен од Владата. Според општите правила за реализација на настани, треба да се искористат само 30 % од капацитетите, да нема паузи за излегување во фоаје, претставите треба да траат од час до час и половина, да се менуваат филтрите на климатизерите на секои 6 месеци и друго.

Министерката за култура Стефоска го истакна и проблемот со задоцнетите плати во културата за кој беше информирана јавноста, кој се реши и се решава со мачна, деноноќна работа на сите надлежни служби во Министерството.

„Во оваа пригода сакам да потсетам дека по 15 години е потпишан нов Колективен договор во културата, кој, секако, има простор уште да се усовршува, а со тоа и работничките права во културата, за што секогаш ќе се залагам. За таа цел, вчера формирав работна група од најдобрите специјалисти во земјава, кои со претставници на синдикатите и службите во Министерството, во разумен рок ќе ги преиспитаат евентуалните правни недоследности на Колективниот договор“, рече Стефоска, која за новинарите прецизираше дека за јули сѐ уште не се исплатени плати на 2 национални установи и на 11 локални поради тоа што уште не ја доставиле потребната документација според новиот Колективен договор. Таа нагласи дека во меѓувреме, почната е работата за исплата на платите за август.

Министерство за култура на Република Македонија

притисни ентер