Силното невреме, проследено со пороен дожд и југоисточен ветер што денеска ја зафати Црна Гора , создаде проблеми во сообраќајот, поплавени се бројни објекти, а локалните служби за заштита и спасување интервенираат на теренот од раните утрински часови. Во најтешка состојба се градовите Никшиќ и Колашин на северот на Црна Гора, како и Херцег Нови на јадранскиот брег.
Во Никшиќ, заради излевање на реките, спасувачите го евакуираат селото Брочанац, додека сообраќајот во некои градови од тој втор по големина град во Црна Гора е во прекин.
Пожарникарот Душко Пековиќ за Јавниот сервис изјави дека припадниците на безбедносната служба биле на терен од 4 часот наутро и имале голем број интервенции.
„Луѓето се јавуваат од сите страни, заглавени или со поплавени подруми. “, рече Пековиќ.
Најтешка состојба во Колашин е во сливот на реката Бистрица, каде што се поплавени мостовите. Водата, според извештаите на медиумите, им се заканува на објектите, додека десетици веќе се под вода. Патот од Подгорица до Колашин, најфреквентниот пат кон северот на Црна Гора, е затворен поради лизгање на земјиштето и поројните води.
Во Херцег Нови, поројниот дожд, кој нападна 90 литри на метар квадратен за два часа, ги поплави улиците и јавните места. Одговорните за итни случаи во општината Херцег Нови добиваат повици за интервенции, претежно од граѓани чиишто приземни објекти се поплавени.
Поради силниот јужен ветер, два крузери се откажаа од влезот во пристаништето Котор. Ситуацијата во заливот на Котор на моменти беше опасна, бидејќи силните ветрови, според подгоричките медиуми, предизвикаа т.н. „орање на сидрото“ по морското дно, поради што 300 метри долгиот крузер се движел неконтролирано. Во Подгорица, нивото на водата на реката Морача се искачи на три и пол метри за 12 часа и е на два метра над историскиот максимум.
Секторот за итни случаи на црногорското Министерство за внатрешни работи издаде предупредување дека може да дојде до поплавување на бреговите на езерото Скадар и реката Бојана поради најавени силни дождови во Албанија.