Македонија

Владата одобри 60.000.000 денари за чистење на линданот во ОХИС

На 160-тата седница Владата соопшти и дека опасните експлозивни материјали од „Теас-Темко“ се отстранети надвор од државата, ќе има субвенции за ТНГ и метан уреди како дополнителна мерка против аерозагадувањето.

Владата на денешната 160-та редовна седница донесе Одлука за одобрување на 60.000.000 денари од Буџетот за 2019 година за чистење на индустрискиот токсичен отпад (линдан) во поранешната фабрика ОХИС во Скопје.

Средствата утврдени со оваа одлука ќе бидат уплатени на сметката на Канцеларијата за проектни услуги на Обединетите нации (UNOPS), со која Владата и Кралството Норвешка, подготвија план за „Поддршка на Кралството Норвешка и Владата на Северна Македонија за чистење на еколошкото жариште ОХИС“.

Генерален секретаријат на Владата на денешната седница информираше за уште една успешна и целосно завршена постапка за отстранување опасни и експлозивни ствари по животната средина и по безбедноста на граѓаните.

Генералниот секретаријат, постапувајќи по заклучок на Владата, врз основа на договорот со единствениот понудувач Тrayal корпорација АД „Крушевац“ – Република Србија, конечно ја отстрани надвор од границите на државата големата количина опасни и експлозивни ствари што претходно беа во сопственост на АД „Теас-Темко“ на имотот на АД „Макпетрол“ во Скопје.

На оваа своја седница, Владата го утврди Предлог Законот за изменување и дополнување на Законот за минимална плата во Македонија.

Со измените се создаваат услови за корекција на минималната плата за 16 отсто, односно од 12.507 денари на 14.500 денари во нето износ со исплатата на платата за декември 2019 година, што претставува зголемување за речиси 60 отсто во однос на минималната плата пред првата корекција во 2017 година.

Владата го донесе новиот текст на Одлуката за давање согласност на „Програма за измени и дополнувања на Среднорочна програма за работа на Фондот за иновации и технолошки развој за финансиска поддршка на микро, мали и средни претпријатија за 2018-2020 година“.

Со предложените измени се предвидува проширување на буџетот на планираните јавни повици за технолошки развој од Планот за економски раст, како и проширување на буџетот за финансирање на проекти во рамки на тековниот повик за комерцијализација на иновации. Со овие измени директно или индиректно се таргетирани помеѓу 170 – 200 компании (зависно од буџетите и конечната одлука на Комитетот за одобрување на ко-финансирање) од пристигнатите 487 апликации.

Вкупниот обем на планирани инвестиции кај овие компании е нешто над 87 милиони евра, од кои 67 отсто или над 58 милиони евра се побарано учество на Фондот, додека 33 отсто или околу 29 милиони евра се сопствени средства кои апликантите планираат да ги вложат во домашната економија. Иницијално предвидениот буџет за овој јавен повик е 5 милиони евра, со што аплицираниот износ се надминува за речиси 12 пати.

Владата денеска донесе дополнување на Програмата за финансиска поддршка во земјоделството за 2019 година за да се намалат загубите на одгледувачите на овци и на предлог на Министерството за земјоделство, шумарство и водостопанство одлучи да воведе нова дополнителна подмерка за предадено јагне во регистриран кланичен капацитет во висина од 400 денари по грло.

Како уште една дополнителна мерка за справување со аерозагадувањето, Владата ја разгледа и усвои Програмата за субвенционирање на дел од трошоците за купување и вградување на уред за погон на ТНГ, метан или друг вид на алтернативно гориво во возилата, како предлог на Министерството за економија.

На денешната седница е разгледан и усвоен новиот текст на Информацијата за давање согласност за користење на буџетски средства во наредни три години на Министерството за здравство за набавка на медицинска опрема, за потребите на ЈЗУ Универзитетска клиника за радиотерапија и онкологија, во висина од 92.500.000 денари.

Владата денеска го утврди Предлогот на закон за изменување и дополнување на Законот за служба во Армијата на Република Северна Македонија, и донесе одлука да биде доставен до Собранието, со цел да се овозможи иден развој на Армијата заснован на високо квалитетни кадри, лични и професионални вредности на персоналот, висок морал и стандард, со цел создавање Армија оспособена за извршување на зададените одбранбени мисии и задачи.

Во предлог законот се вградени проширување и допрецизирање на должностите кои се сметаат како должности во вршење на служба во Армијата, согласно потребите и барањата на НАТО, со кои се уредува дека како служба во Армијата се смета и учеството во меѓународни операции, мисии и операции на Организацијата на Северноатлантскиот договор - НАТО. Со предложените измени и дополнувања се уредува и правото на стаж на осигурување со зголемено траење за целокупниот активен воен и цивилен персонал на служба во Армијата, како и можност за стипендирање на кадри за критични специјалности за потребите на Армијата за кои има недостиг.

Со предложените измени се продолжува времетраење на договорот кој Министерството за одбрана го склучува со професионалните војници, од три на четири години, заради обезбедување соодветна пополна на командите и единиците на Армијата, согласно потребите за менаџирање со персоналот, како и обезбедување оптимално водење во кариера за време на вршењето на служба во Армијата, со уредување на начинот на оценување на активниот воен и цивилен персонал на служба во Армијата, согласно НАТО регулативите за унапредувањето на офицери и подофицери во непосредно повисок чин согласно стандардите на НАТО.

Владата денеска ја разгледа и усвои Информацијата за динамиката на реализација и плаќање на обврските за изградба на затворен пливачки базен во општина Охрид, и ја задолжи Агенцијата за млади и спорт да предвиди затворениот пливачки базен да биде изграден заклучно со 31.12.2020 година, се наведува во соопштението од Владата.

Македонија

Од петок постепена стабилизација на времето

Невообичаено топлите времелетни температури нагло се заменија со ладни и дождливи денови.

Во наредните 2 дена ќе владеат врнежи, на некои места ќе бидат поројни, а планинските предели ќе добијат уште една мала снежна покривка, предупредуваат од УХМР. Оние кои планирале прошетка претсојниот викенд не треба да се грижат, тмурните облаци ќе се расчистат, а вистинската пролет, со умерени температури веќе при крајот на неделата ќе пристигне во Македонија.

-Веќе од петок ќе имаме постепено стабилизирање на временската состојба, ќе преовладува во петок претежно стабилно, веќе и потопло време, а од деновите од викендот со максимални температури кои ќе бидат во интервал од 18 па се до 26 степени.-УХМР

Сепак ваквото време во претстојните два дена го вклучи и алармот кај ЦУК. Од таму ги предупредуваат граѓаните да внимаваат на магистранлните и регионални патишта поради одрони од карпи, како и на прилагодување на брзината поради мокри патишта. Воедно, граѓаните да избегнуваат суводолици порадо можност од нагло надоаѓање на вода, а и одводните канали треба да бидат чисти и проточни, наместо да се создаваат брани од ѓубре...

-Истовремено да се внимава на работите што можат буквално, како велиме, да одлетаат од градбите во населбите и особено што се од градбите во изградба, градилиштата, треба да се обезбедат практично сите работи што заради ветер би паднале и би претставувале опасност за луѓето кои што се во околината. Ако се престојува на планина пак препорачливо е да се има доволно гориво во возилата и да се внимава на планинските патишта, конкретно на лизгавостаи на проодноста на патот особено ако не е асфалт. – Илија Бојаровски – ЦУК

Според хидролозите, не постои закана и опасност од излевање кај поголемите реки и сливови, но и тие упатуваат на внимателност кај суводолиците и помалите сливови, како и кај атмосферските канализации кои се во опасност од запушување. Сепак, уверуваат, дека дождливото време во овој период е повеќе од добредојдено.

Македонија

Се зголемуваат трошоците на живот на граѓаните

Минималната синдикална кошничка прв пат ја надмина и психолошката граница од 60 илјади денари.

Речиси 3 минимални плати или една просечна и една минимална му се потребни на едно четиричлено семејство за врзе крај со крај во месецот. Трошоците за живот во април порасна за 1.200 денари и сега изнесуваат 60.212 денари. Во уште потешка состојба се семејствата кои плаќаат ќирија во просек за стан од 60 квадрати. Ним да го истуркаат месецот им се потребни над 75 илјади денари.

- За жал работниците во Македонија од месец јануари до месец април се посиромашни месечно за некаде околу 3000 денари или за 50е. Психиолошката бариера од 60.000 денари, новата пресметка на синдикалната минимална кошничка сигурно ја поминува и тоа треба да биде црвен картон за сите оние кои се сомневаа во пресметката на синдикалната минимална кошничка и укажуваа дека работниците во Македонија можат да преживеат со далеку помалку.- Слободан Трендафилов – претседател на ССМ

Од пекарската индустрија велат дека иако во моментов цената на лебот е стабилна, таа би можела да претрпи измени во зависност од тоа како би се развивала состојбата со воените конфликти на Блискиот исток и во Украина.

- Војната што се случува во близина и Блискоисточната војна која што директно се рефлектира на цената на нафтата. Исто така не знаеме во Русија и Украина каква ќе биде жетвата, што ќе се случува со производството на жито, повеќе параметри се кои влијаат на финалната цена и сметаме дека во овој момент ќе имаме стабилна цена на лебот.

Токму поради незадоволството од ниските плати и зголемените трошоци за живот ССМ организира Работнички протест на 1ви мај, кој ќе започне од 11 часот пред Работничкиот дом и ќе заврши пред Владата. Трендафилов посочува дека барањата кои ќе бидат упатени од протестот ќе бидат враќање на надоместокот за храна и превоз и зголемување на минималната плата на најмалку 450 евра.

Македонија

Нема одговор од МЗ дали е сменет директорот Петровски од Клиниката за токсикологија

Медицинскиот директор на Клиниката за токсикологија Данил Петровски се уште го нема добиено отказот од Министерството за здравство. 

Од министерството не дадоа одговор дали Петровски ќе биде променет од прв човек на токсикологија, бидејќи не потпишал 18 лица со договор на дело што истекол на 31.12 да продолжат да работат. Економската директорка засега нема да биде променета иако од министерството не одговорија: Економската директорка направила долг во клиниката и дали имало проблем во работењето на кадар кој не бил вработен а учестувал во медицинската дејност?

Во текот на вчерашниот ден, Министерството за здравство побара да се спроведе вонреден инспекциски надзор во Универзитетската клиника за токсикологија - Скопје во врска со статусот на 18 ангажирани лица кои добија согласност од Министерството за финансии, со цел да се утврди фактичката состојба. За оваа постапка нема прекршување на законски надлежности и по добиениот извештај од надлежните инспекторати ќе се постапи согласно законските прописи.

Од друга страна Канал 5 доби документ од Министерството за финансии каде се вели дека во време на распишување на избори не може да се вработуваат лица. Медицинскиот директор вели дека на токсилогија и се потребни биолози, кадарот за кој се бара продолжување и кадар кој би работел во ургентен центар, но засега нема ниту најава за негово функционирање а не за вработување.

Канал 5 доби и информација од ДСЗИ каде посочуваат дека за време на побараниот надзор во клиниката биле затекнати лицата кои не им биле продолжени договорите и издале решение дека за пет дена тие не смеат да се појават на работа на токсикологија.

притисни ентер