Вебер: На Македонија и Албанија вратата им беше затворена пред нос

Лидерите на најголемите политички групи во Европскиот парламент едногласно го осудија одложувањето на одлуката ЕУ да направи нови чекори во пристапниот процес на земјите од Западен Балкан.

– На Балканот владее нестабилност, а ние можевме да внесеме доза на стабилност, бидејќи тоа е наша одговорност, предупреди лидерот на групата на Европската народна партија во ЕП, Манфред Вебер.

Тој за време на дебатата во Европскиот парламент оцени дека ниту  Македонија, ниту Албанија не ја добиле перспективата што ја заслужуваат.

– Баравме многу од тие земји, а сега вратата им е затворена пред нос. Го губиме кредибилитетот, и тоа е сериозно, порача Вебер.

Тој укажа на фактот дека сите лидери кои доаѓаат од конзервативната Европска народна партија на самитот во Брисел дадоа поддршка за проширувањето, а францускиот претседател Емануел Макрон и холандскиот премиер Марк Руте, кои припаѓаат на либералната опција, биле „сами против сите".

Гарсија Перес од редовите на европските социјалдемократи оцени дека проширувањето може само да донесе „нов живот" во ЕУ.

– Внесувањето на Западен Балкан не само што ќе придонесе за стабилност во регионот, туку и стабилност на цела ЕУ, нагласи Перес.

Лидерот на групата на европски либерали, во која се наоѓаат и француски пратеници од партијата на Макрон, Дачијан Цилос изјави дека проширувањето мора да остане во срцето на политиката на ЕУ.

– Не можеме да замислиме силна Европа, а да не е отворена кон соседите, посебно кон оние кои веруваат во неа можеби и посилно отколку некои земји членки, додаде Цилос.

Тој истакна дека „Европа мора да остане мотор на демократски реформи, а нејзината врата отворена".

Европските Зелени имаа можеби и најостри критики кон францускиот претседател поради одлуката да го блокира отворањето на пристапни преговори со Македонија и Албанија.

Претставникот на Зелените во ЕП, Филип Ламбертс го потенцира јасното определување на земјите од Западен Балкан да пристапат во ЕУ.

Одлуката да не се почитуваат преземените обврски од страна на ЕУ, Ламбертс ја оцени како „сериозна грешка на Европскиот совет" и побара од Унијата да направи вистинска работа доколку постои политичка волја за тоа.

– Ако се сеќавате, Емануел Макрон го поздравивме како голем Европеец. Но како одминува времето, сфаќаме дека не е ниту голем, ниту Европеец, заклучи Ламбертс.

Се уште актуелните претседатели на Европскиот совет и на Европската комисија, Доналд Туск и Жан-Клод Јункер во своето последно обраќање во Европскиот парламент нагласија дека неединството на земјите членки околу новите чекори во процесот на проширување на ЕУ е „огромна грешка". 

„Корковадо": Грејдерите за потребите на Армијата на РМ не се исти со оној продаден во Србија

 „Тие само изгледаат исто, како што сите грејдери на светот изгледаат исто. “

Српска компанија „Корковадо", преку која беа набавени машини-грејдери за потребите на Армијата, денеска ги демантираше тврдењата за злоупотреби и неправилности при реализацијата на набавката, оценувајќи дека станува збор за „лаги и злонамерни манипулации со фактите".

– Разбирам што е политичка борба, но мојата компанија е обвинета во медиумите од страна на целосни незнајковци и луѓе кои не се разбираат во техника и машини, вели во демантот директорот на „Корковадо", Дејан Станојковиќ.

Тој посочува дека грејдерите за потребите на Армијата биле продадени по цена од 197.000 евра за праче без ДДВ, како и дека овие машини и онаа што фирмата ја продала во Србија по пониска цена, воопшто не се исти.

– Тие само изгледаат исто, како што сите грејдери на светот изгледаат исто. Постојат огромни разлики. Вашите грејдери имаат погон и на предните оски што не е случај со грејдерот во Србија. Само тој додаток чини 40.000 евра, се наведува во демантот.

Во соопштението се посочува дека моторите во грејдерите набавени за нашата Армија, производство на еден од најдобрите производители во светото „Каминс", се поголеми и помоќни од оние во машината продадена во Србија, како и дека поради дополнителниот хидрауличен погон со хидромотори на предните тркала, потребен е помоќен мотор, бидејќи тој покренува и дополнителна моќна и голема хидро пумпа, што автоматски го прави поскап.

– Вашите грејдери имаа мотори со моќност од 164 киловати, а грејдерот испорачан во Трговиште (Србија) има 125 киловати. Вашите грејдери имаат ЗФ-троник менувачи од германски производител (најдобри менувачи во светот), што не е случај со грејдерот во Србија. Вашите грејдери имаат „пливачки од" на средниот и на предниот нож, што претставува врвна технологија и ретко кој производител ја има таа опција, се додава во демантот.

Станојковиќ во соопштението посочува дека грејдерите за нашата Армија се и габаритно поголеми, што „злобните луѓе нема да го забележат затоа што не сакаат".

– Секој кој и малку се разбира во техника ќе ги разбере овие наводи и ќе сфати дека машините воопшто не се исти. Напротив постои огромна разлика, но за незнајковците и злобните луѓе тоа не значи ништо. Купувачот поради ограничени средства купил многу поедноставна машина. Морам да напоменам дека кај вас имаше јавна набавка на која можеа да се јават сите продавачи на грејдери. Исто така, имаше и е-аукција на која учествуваа три фирми. Зошто не ги намалиле цените, ако моите грејдери се скапи. Напоменувам дека другите имаа многу повисоки цени и дека цената по која ги купивте грејдерите е исклучително добра, бидејќи доколку мојата компанија не беше на тој тендер, истите машини ќе ги платевте многу поскапо, истакнува Станојковиќ во демантот.

ВМРО-ДПМНЕ вчера обвини дека Министерството за одбрана преку јавна набавка набавило две тешки машини грејдери за потребите на Армијата од „Корковадо" по цена од 232.426 евра по машина, додека, според партијата, истата компанија на српска институција и продала таква машина во вредност од 108.000 евра.

На тврдењата на ВМРО-ДПМНЕ уште вчера реагираше Министерството за одбрана тврдејќи дека во целата постапка за јавната набавка на грејдерите биле почитувани сите законски одредби. /МИА

Чолош и Ќучук: Македонија ги исполни критериумите за почеток на преговорите со ЕУ

Македонија ги исполни критериумите за да ги почне преговорите со Европската унија. 

Сега следи политичката одлука со новата методологија која ја предложи Европската комисија. Земјата направи добри чекори со законот за јавно обвинителство и ја охрабруваме да продолжи со борбата против организиранито криминал и корупцијата, порачаа Дачиан Чолош, лидер на групата на либералите во Европскиот парламент – „Renew Europe" и известувачот за Македонија во ЕП, Илхан Ќучук.

– Методологијата треба да се усвои од Советот и земјите членките и откако тоа ќе биде завршено мислам дека сите услови ќе бидат завршени да започне тој процес. Ние во Европскиот парламент ќе се залагаме за тоа, рече Чолош, одговарајќи на новинарски прашања пред денешната дебата посветена на младите и Европската унија во организација на Либерално-демократската младина.

Известувачот за земјава Ќучук со порака дека Владата и опозицијата заедно треба да работат на остварување на стратешките цели на државата.

–  Сигурен сум дека големи работи може да се случат во Македонија, но за тоа е потребна  политичка волја. Тоа не се однесува само за Владата, туку и за опозицијата и моја заложба е дека заедно можат да работат на остварување на стратешките цели на земјата и не гледам подобра стратешка цел од тоа да се биде дел од НАТО и земја членка на ЕУ бидејќи тие можат да испорачаат висок демократски и економски стандард кои се многу потребни на регионот и на земјата, изјави Ќучук, порачувајќи дека реформите се прават заради граѓаните и државата.

ЕУ, рече Ќучук, не се однесува на политичките елити на земјата, туку на граѓаните и на младите, бидејќи тие се иднината. – Паметната политика е за следните 15 до 20 години, а не е за утре, порача известувачот на ЕП за земјава. /МИА

ССК бара поддршка за приватниот сектор со системско решение

Мицкоски истакна дека на бизнисмените од ССК ќе им го презентираат она што веќе го вклучиле во изборната програма и ќе слушнат што би можело да се вметне од неа од предлозите од оваа комора.

Претседателката на Сојузот на стопански комори Данела Арсовска денеска на средба со лидерот на опозициската ВМРО-ДПМНЕ Христијан  Мицкоски порача дека сите работи што ќе се прават за доброто на економијата во иднина треба да бидат поддржани со системско решение.

-Единствената работа којашто му е потребна на приватниот сектор во овој момент е системско решение. Потребно ни е сите работи што ќе се прават, а кои се за доброто на економијата да бидат поддржани со системско решение, со решенија кои ќе бидат квалитетни, функционални, долгорочни и ќе немаат проблеми во имплементацијата, рече Арсовска на средбата на која стопанственици од ССК ги претставуваат очекувањата за бизнисот по изборите.

На сите во државата,  нагласи, им е потребен систем, владеење на правото и функционални институции.

Според Арсовска, ветувањата на партиите за инфраструктурните проекти треба да бидат реални и остварливи. Таквите прокети, потенцираше, се значајни за инфраструктурното поврзување  и протокот на стоки и услуги во рамки и на државата и со регионот.

– Важно е реализацијата да биде реално остварлива и да се потрудат  чинителите во власта откако ќе го донесат Буџетот да ја остварат максимално, односно да биде реална и остварлива. Она што ќе се предвиди да се оствари за да немаме ситуации со ребаланс на Буџетот како што имавме во минатото. Важно е да се прават добри и квалитетни анализи. Инфраструктурното поврзување секогаш е добро, ја движи економијата и градежништвото и уште 20-ина други гранки, рече Арсовска.

Мицкоски истакна дека на бизнисмените од ССК ќе им го презентираат она што веќе го вклучиле во изборната програма и ќе слушнат што би можело да се вметне од неа од предлозите од оваа комора.

– Она што Сојузот на Стопански Комори практично ќе ни го предложи, она што е важно за нив, па да видиме дали дел од тие проекти, политики можеме веднаш да ги вклопиме во програмата. Дел понатаму откако ќе направиме детална анализа на состојбите во буџетот на државата кои што според наша информација, според она навигација со која ние располагаме е во една многу лоша состојба и кондиција. Таквата состојба исто како и за економијата предвидуваме дека ќе биде се полошо од периодот кој што следи, рече Мицкоски. /МИА

притисни ентер