Димитров: Без ЕУ перспектива во октомври ќе се зајакнат националистичките сили

Министерот за надворешни работи, Никола Димитров, во интервју за Агенција Европа, предупредува за ризиците кои и се закануваат на Македонија доколку ЕУ не додели датум за старт на преговори во октомври.

-Ако немаме перспектива, а тоа е влогот во октомври, ќе ослабнеме, а скептиците, националистички сили и популистите ќе се зајакнат, тоа ќе им помогне на оние кои се сомневаат во европскиот проект, таа стратешка ориентација, додека позитивна одлука ќе ни помогне да кажеме дека работите се во наши раце, изјави Димитров во интервју за Агенција Европа при неговата последна посета на Брисел минатата недела.

Во разговорот, Димитров го споделува својот оптимизам за одлуката на Советот на 15 октомври и смета дека земјата има „многу убедливи аргументи", пред сѐ „очигледен напредок кон вистинска европска демократија", како и постигнувањето на договорите со Грција и Бугарија.

-Имаме слух за загриженоста на некои земји членки околу тоа како да процесот на пристапување да се направи построг и повеќе ориентиран кон промена, што е во срцето на интересите на населението во регионот, вели министерот за надворешни.

Што се однесува до одлагањето на одлуката за датум во јуни годинава, Димитров смета дека министрите немаа доволно време да го разгледаат напредокот во четирите клучни области дефинирани во јуни 2018, поради кусиот рок помеѓу објавувањето на извештајот на Европската Комисија и одржувањето на Советот на ЕУ.

-Сите погледи се сега свртени кон средината на октомври, мислам дека влогот е таков што има сериозни размислувања во престолнините за начинот да се зграпчи оваа прилика во момент кога нема многу прилики за успех, објаснува Димитров.

Во случај Македонија да не добие зелено светло овој пат, по четиринаесет години кандидатски статус, министерот предупредува: „нема да биде лесно за мене, како министер, да се вратам дома после октомври и да речам дека ќе одлучуваат идната година, потребно ни е политичко гориво за да продолжиме да одиме напред".

Тој истакнува и дека Северна Македонија целосно ја поддржува европската интеграција на Албанија, но дека земјата не смее да биде жртва на логиката на ставање земји во пакети и потсетува дека процесот е заснован на индивидуална заслуга.

Запрашан што мисли за новиот предлог за комесар за проширување на претседателката на Европската Комисија, поранешниот унгарски министер за правда, Ласло Трочањи, Димитров не крие дека Македонија има спор со Унгарија околу азилот на осудениот поранешен премиер, Никола Груевски.

Но, смета министерот, важно е двете земји да соработуваат за заедничките интереси и покрај нивните разлики.

-Охрабрени сме и ги цениме пораките на избраната претседателка во однос на нашиот регион, нејзиниот интерес и цениме дека во ЕК е навистина важно да се сочуваат двата столба врз кои почива успешно членство. Првиот е регионот да стане европски, значи да има ангажман, а вториот е строгиот и праведен пристап во проценувањето на напредокот или недостатокот од напредок, вели Димитров.

Тој смета дека колеџот на еврокомесарите, по сослушувањата во Европскиот Парламент, ќе биде внимателен да се сочуваат овие два столба./МИА

Мицкоски: ВМРО-ДПМНЕ и јас лично подржувам се што е добро и за Македонија и за Бугарија

Мицкоски ги урна лажните вести на владата: Гоце Делчев и јазикот се Македонски.

-Синоќа ја завршивте овде средбата во арена Загреб, тет а тет средба со господинот Бојко Борисов, излезе едно видео тој го објави лично на неговиот профил на социјалната мрежа, а се однесува на договорот кој Македонија го има потпишано со Бугарија. Кој е вашиот став за договорот, бидејќи многу информации?

Нашиот став е познат, тој е непроменет, многу пати повторен во минатото и како политичка партија, како ВМРО-ДПМНЕ, она што беше моја изјава којашто ја рефлектирав вчера беше дека ВМРО-ДПМНЕ и јас лично подржувам се што е добро и за Македонија и за Бугарија, имавме контруктивна средба со господинот Борисов, разговаравме за изградба на автопатишта, железничка пруга, железничко поврзување  помеѓу двете земји. Разговаравме за енергетско поврзување, продлабочување на научната соработка помеѓу универзитетите од двете држави, разговараме за побрзо интензивирање и отварање на граничниот прекин „Клепало“. И сето она коешто значи добро и за граѓаните на Македонија и за граѓаните на Бугарија.

Истовремено на средбата стана збор и за онаа Резолуција којашто се однесува на негирање на посебноста на македонскиот јазик, ликот и делото на Гоце Делчев и тоа не е добро и тоа не можам да го подржам и никогаш нема да го подржам, македонскиот јазик е кодофициран и меѓународно признат 1977 година, тука немаме дилеми ниту пак јас, ниту пак ВМРО-ДПМНЕ. Така што она што е добро коешто ги поврзува македонските граѓани и граѓаните на Бугарија го подржуваме, она што е спротивно на интересите на македонските граѓани, Македонија ние не можеме да го подржиме, како што е прашањето поврзано со македонскиот јазик, ликот и делото на Гоце Делчев итн.

Но, забележлива е нервозата кај владата во заминување, кај премиерот во заминување господинот Заев па потрчаа оние скапо платени пи-ар пера да ја искриват вистината и практично лажни вести да рефлектираат во македонската јавност: Она кое што е важно е дека и оваа лажна вест им се распрсна како меур од сапуница. Тие нека продолжат да измислуваат лажни вести, а ние ќе продолжиме  да работиме, одговори лидерот на ВМРО - ДПМНЕ Христијан Мицкоски.

Пет лица загинаа во Италија во фабрика за огномети

Пет лица загинаа, а две се тешко повредени во експлозија во фабрика за петарди и огномет што се случи синоќа во италијанското гратче Барселона Поцо Ди Гото.

Експлозијата била предизвикана од работници кои во магацинот невнимателно ракувале со апарат за заварување.

Меѓу жртвите е и 71-годишната сопруга на сопственикот на малата семејна фабрика во гратчето Барселона Поцо ди Гото, лоцирано на 25 километри од Месина.

Нејзиниот син, кој сакал да ја спаси мајка си, е тешко повреден и заврши во болница. Во слични мали фабрики ширум Италија од 2000 година вкупно  68 лица досега ги загубиле животите.

Општина Гевгелија продава градежни парцели за куќи и згради

Осум градежни парцели за индивидуални станбени куќи и згради ќе продаде Општина Гевгелија по пат на електронско јавно наддавање кое ќе се одржи идниот месец, потврдија денеска од надлежната општинска служба.

Од нив, шест градежни парцели во населбата „Караорман" со корисна површина од 335 до 537 метри квадратни ќе бидат намемети за изградба на индивидуални куќи и ќе се продаваат по почетна цена од 61 денар за квадрат.

Двете парцели наменети за станбени згради со површини од 1.078 и 1.616 квадратни метри се наоѓаат во близина на новиот градски пазар во Гевгелија и за нив почетната продажна цена ќе изнесува 2.570 денари за квадрат.

Пријавите за учество на електронското јавно наддавање треба да се достават најдоцна до 10 декември за станбените куќи и до 23 декември за станбените згради, а лицитациите ќе се одржат на 12 и 25 декември. 

притисни ентер