ЦГК: Многу политички кадри членови на управни одбори во државните претпријатија

Истражувањето е проследено со отворена база на податоци за членовите на управните и на надзорните одбори на 30 најголеми претпријатија во земјата.

 Само една третина од членовите на надзорните одбори за контрола на материјално-финансиското работење имаат економско образование и поседуваат знаења и искуство од дејноста на финансиското и сметководственото работење, покажуваат резултатите од истражувањето „Право или политика: Изборот на членови на управните и надзорните одбори во државните претпријатија" на Центарот за граѓански комуникации (ЦГК), што е објавено денеска.

Истражувањето е проследено со отворена база на податоци за членовите на управните и на надзорните одбори на 30 најголеми претпријатија во земјата.

Во истражувањето се посочува дека како членови на управните одбори во најголемите државни претпријатија се јавуваат многу политички кадри, секторски директори во други државни претпријатија, припадници на државната администрација, сметководители во приватни компании, секретари на училишта, педагози, психолози па и раководител на бензинска пумпа, сопственик на златарски дуќан,…

-Владата и единиците на локалната самоуправа немаат официјален документ што го регулира процесот на селекција на членовите на раководните органи на претпријатијата што ги основаат. Тие, како основачи, не објавуваат огласи за избор на членови во раководните органи на државните претпријатија, не вршат проверка на квалификуваноста ниту, пак, ги интервјуираат потенцијалните кандидати. Со биографии на членовите на управните и на надзорните одбори на дел од државните претпријатија не располагаат ниту основачите, ниту самите претпријатија, се посочува во истражувањето на ЦГК.

Од обемното истражување во коешто беа вклучени и основачите и претпријатијата, како што додава Центарот, не можело да се утврди кој, врз основа на кои критериуми и во каква постапка им предлага на Владата и на општинските совети да ги изберат токму тие лица за членови на управните и на надзорните одбори.

-Со оглед на целосната нетранспарентност на процесот, оправдан е сомнежот дека списоците за именување на членови на управните и на надзорните одбори на претпријатијата во државна сопственост се составуваат надвор од институциите, односно во партиските кругови, се потенцира во истражувањето на ЦГК.

Според податоците објавени во истражувањето, висината на надоместокот за членовите на одборите се движи од 800 денари по одржана седница, колку што се плаќа во Комуналец – Прилеп, до 27.000 денари месечно, за претседателот на Надзорниот одбор на Македонската радио-телевизија. Гледано на годишно ниво, најголеми вкупни трошоци за членовите на одборите има Водовод и канализација-Скопје, и тоа 2,2 милиони денари, односно околу 36 илјади евра./МИА.

Трамп го откри адвокатскиот тим што ќе го брани на судењето пред Сенатот

Претседателот на САД, Доналд Трамп, ќе биде застапуван следната недела во Сенатот на судењето за отповикување од тим на адвокати.

Меѓу адвокатите на Трамп е и поранешниот адвокат на О.Џ. Симпсон , Алан Дершовиц и специјалниот обвинител за процесот на отповикување на поранешниот претседател Бил Клинтон, Кен Стар.

Дершовиц (81) со децении е добро позната личност во американските правни кругови. Професорот од Харвард успешно го бранеше О.Џ. Симпсон, кој беше обвинет за убиство на сопругата и нејзината пријателка и за одбрана на финансиерот Џефри Епштајн под обвинение за сексуален напад.

Кен Стар е поранешен независен советник чија истрага го отвори патот за процесот на отповикување на Бил Клинтон во 1998 година. Во тоа време, Претставничкиот дом гласаше за повлекување, но беше ослободен од Сенатот по аферата на Клинтон со стажистката во Белата куќа,  Моника Левински.

Стар мораше да ја напушти функцијата претседател на универзитетот Бајлор, по истрагата што покажа дека овој универзитет неправилно го водел случајот за силување против еден од спортистите. Подоцна поднесе оставка и како професор по право на универзитетот.

Тимот на Трамп ќе биде предводен од советникот на Белата куќа, Пат Циполоне и личниот адвокат на Трамп, Џеј Секулоу.

Циполоне остро го бранеше претседателот за време на истрагата за отповикување и одби да ги достави документите и да им дозволи на сведоците да зборуваат , како што бараше Конгресот.

Секулоу ќе и помогне на одбраната како приватен адвокат на Доналд Трамп.

Воведните зборови во Сенатот се очекува да почнат во вторник.

БиХ се обврза дека нема да ја окупира Месечината и нема во вселената да користи нуклеарно оружје

Босна и Херцеговина се обврза дека нема да ја окупираат  Месечината или други небесни тела.

Тоа е дел од документот ратификуван вчера на седницата на парламентарното собрание на БиХ во Сараево.

Тоа е договор на принципите што ги регулираат активностите на земјата во истражување и употреба на вселената, вклучително и Месечината и другите небесни тела.

„Правилата за употреба на вселенските ресурси би можеле да почекаат, барем додека не бидат решени земните“, изјави Мирко Шаровиќ, член на Српската демократска партија (СДС) во Собранието на Босна и Херцеговина, за Радио Слободна Европа (РСЕ).

Меѓу другото, БиХ го ратификува договорот со обврска да не користи нуклеарно оружје во вселената.

Во договорот се вели дека универзумот, вклучително и Месечината и другите небесни тела, не подлежат на национално присвојување врз основа на тврдења за суверенитет, преку користење или окупација, или со какви било други средства.

Тоа е меѓународен договор, а некои парламентарци велат дека не е приоритетен. Еден од нив е пратеникот Шемсудин Мехмедовиќ, од Партијата за демократска акција (СДА).

„Додека земјата губи огромен број луѓе, испраќаме млада работна сила во Европа, ние се справуваме со вселенски проблеми што апсолутно не не интересираат, но мора да бидат усогласени со некои европски принципи“, вели Мехмедовиќ.

Кина со најниска стапка на наталитет во последните 70 години

Стапката на наталитет во Кина се спушти на најниско ниво од основањето на Народна Република пред 70 години, и покрај попуштањето на строгата политика на едно дете.

Во 2019 година имало 10,48 раѓања на илјада жители, најмалку од 1949 година, соопшти кинеското биро за статистика. Бројот на деца родени во 2019 година опадна за 580 илјади и изнесува 14,65 милиони.

Стапката на наталитет на Кина опаѓа со години, што е предизвик за втората по големина економија во светот.

Но, со помалку раѓања, смртноста е исто така помала, па кинеското население порасна на 1,4 милијарди луѓе минатата година.

Намалениот број на раѓања предизвикува загриженост за „демографската бомба“ затоа што намалениот број на работоспособни луѓе ќе мора да поддржи поголем број пензионери.

Стапката на наталитет на Кина е помала од стапката на наталитет на САД во 2017 година, кога последен пат е забележана, со 12 раѓања на илјада луѓе. Според Светска банка, во 2017 година глобалната стапка била 18,65 раѓања на илјада.

Во 1979 година, кинеската влада воведе политика на едно дете за спречување на растот на населението. Повреда на законот се казна за  семејствата, со губење работа или со принуда жената да има абортус.

Но, мерката предизвика голема нерамнотежа на половите, па денес во Кина има 30 милиони повеќе мажи отколку жени. Во 2015 година, сепак, Пекинг им овозможи на семејствата да имаат две деца, но тоа не ја зголеми стапката на наталитет, објави Би-Би-Си.

Економијата на Кина порасна за 6,1 процент во 2019 година, што е најспоро во речиси 30 години, под притисок од трговската војна со САД, покажаа официјалните податоци.

И покрај тоа што ланскиот раст бил побавен отколку во 2018 година, кога активностите пораснаа за 6,6 проценти, тој сепак останал во рамките на целниот опсег на Владата од шест до 6,5 проценти, соопшти Бирото за статистика.

притисни ентер