Во очекување на одлуката на државниот јавен обвинител Љубомир Јовески по барањето на специјалната обвинителка Катица Јанева предметите од СЈО да преминат во редовното обвинителство, денеска консултации во Министерството за правда. На средбата освен министерката Рената Дескоска и Јовески, присуствувале обвинителката од СЈО Ленче Ристоска, универзитетскиот професор Гордан Калајџиев, академик Владо Камбовски.

Средбата на работната група доаѓа по вчерашното писмо на специјалната јавна обвинителка Катица Јанева, која ги овласти обвинителите да ги предадат предметите што се во судска постапка, истрага и предистрага. И од Обвинителството велат дека консултациите се уште траат а според најавите одлуката треба да биде позната утре кога и истекува рокот од три дена.

Еден од предметите кој се наоѓа во судска постапка е и случајот Монструм кој СЈО го презеде од редовното обвинителство. Иако на денешното рочиште требаше за прв пат да се слушаат бомбите за овој случај тоа не се случи бидејќи приватните разговори не се одделени од она што треба да го слушне јавноста.

Обвинителката Фатиме Фетаи, коментирајќи го барањето на Јанева вели дека не ебитно кој ќе го застапува обвинението во судница, туку правдата да биде задоволена.

Објаснување за тоа што ќе се случува понатаму со предметот поради како што велат неизвесната судбна на СЈО, побараа и семејствата на убиените момчиња кај Смилковско. Судијата Огнен Ставрев која ја води повторената постапка за петкратното убиство им појасни дека судењето нема да се врати од почеток бидејќи нема смена на судечки совет, туку единствено може да се променат обвинителите а во таков случај продолжува оттаму каде што застанале.

Дел од обвинителите во СЈО неофицијално велат дека биле изненадени од писмото на нивната шефица која се наоѓа во притвор за случајот Рекет, но сметаат дека е начин за да се продолжат овие постапки без притоа да дојде до застарување на кривичните дела. Ќе ја чекаат конечната одлука на Јовески но и тие се на став дека ниту еден од предметите нема да пропадне а и доколку заминат во новото Обвинителство за организиран криминал и висока корупција или пак се вратат во обвинителствата од каде што дошле постои правна можност пак да ги застапуваат овие предмети пред суд.