Култура

„Одисеј" на Горан Стефановски за затворање на годинешното издание на „Охридско лето"

Со вечерашната изведба на драмата „Одисеј" на Горан Стефановски на Античкиот театар се спушта завесата на годинашното 59-то издание на најголемата музичко-сценска манифестација во земјата – Фестивалот „Охридско лето".

Изминатите 40 фестивалски дена понудија 47 содржини со кои се славеше уметноста. Сцените на Античкиот театар, црквата „Света Софија", предворјето на црквата „Света Софија", Долни Сарај, Центар за култура беа речиси исполнети, за некои од настаните се бараше билет повеќе. За интересот на публиката за фестивалската понуда говори и податокот дека и вечерашната претстава за свеченото затворање на фестивалот веќе е распродадена.

– Изминаа 40 дена исполнети со врвни уметници, задоволна публика и полни гледалишта…„Охридско лето" запиша уште едно успешно издание во богатата фестивалска историја. Пречекавме околу 500 уметници од 23 земји од светот, но и гости од земјава и странство кои допатуваа за да ја следат фестивалската програма. „Охридско лето" следната година слави голем јубилеј, 60 години од неговото постоење. Тоа за нас е голема чест, но и обврска да одбележиме достојно како што заслужува оваа наша најголема музичко – сценска манифестација. Подготовките веќе се започнати и можам само да најавам врвни уметници и беспрекорна организација, истакна на завршната прес-конференција директорката на фестивалот Наташа Поповиќ.

Што се однесува на вечерашниот настан, селекторот на драмската програма на „Охридско лето" Александар Поповски кој е и режисер на претставата „Одисеј", рече дека претставува е мозаик составен од уметници кои патуваат, играат, настапуваат насекаде низ просторите на поранешна Југославија и низ светот.

– Желба ми беше заради Горан оваа претстава да ја играме во Охрид и тука на своевиден начин тој да ја најде својата Итака. Не се надевав дека ќе успеам во тоа, но одговорот на сите уметници на кои им се обратив беше фасцинантен, сите тие откажаа и снимања и патувања да се соберат тука и да ја одиграме оваа претстава. Тоа за мене се работи што кажуваат дека вреди што се занимавам со оваа професија, рече Поповски.

„Одисеј" е копродукциски проект реализиран преку соработка на извонредни, докажани актери од театрите „Гавела" од Загреб, „Улисис" од Бриони, Српскиот народен театар од Нови Сад, „Драма" од Марибор, „Ателје 212" од Белград, Стериин театар и Театар „Навигатор" од Скопје.

Актерот Никола Ристановски, кој ја толкува улогата на пејачот Тиресиј, истакна дека му е мило што после седум години оваа претстава стигна во Македонија, што за него претставува своевидна симболика на затворање на еден циклус, тема која зборува за враќањето на еден човек дома.

– Во таа смисла недвојбено, Горан Стефановски е најважниот дел од цела таа приказна. Физички и метафизички Горан е меѓу нас тука, и сето тоа што би имал да го кажам на оваа тема тоа го кажува самата претстава, а на публиката оставам да ги донесе сите други заклучоци, впечатоци, доживувања, рече тој.

Српскиот актер Светозар Цветковиќ, кој го толкува богот Зевс, од своја страна истакна дека процесот на создавање на претставата врз сите инволвирани во неа оставил трага, како во нивните животи, така и врз нивниот професионален ангажман.

– Од последната изведба на „Одисеј" пред пет години, се случија толку многу настани во нашите животи, во театарот, во овој свет во кој го нема повеќе Горан. Режисерот Поповски не собра повторно во слава на Стефановски, во негова чест да проговориме по она напишаното од негова рака. После временска дистанца од пет години, можам да кажам дека со првото соочување со текстот воопшто не бев свесен колку сме пред времето во кое живеевме тогаш, и оти за жал или за среќа, со таа претстава сме пред времето на се она што се случува во театарскиот живот кој го познаваме на овие простори. Оттаму тоа што го направивме и вечерва ќе го изведеме има причина да постои и во иднина и да претставува театар кој е вистински печат како на Горан Стефановски и на режисерот Поповски, истакна Цветковиќ.

Озрен Грабариќ, актерот од Загреб кој ја игра главната улога на Одисеј со куса, но моќна порака за самата претстава и текстот на Стефановски.

– Во текстот на Горан има една реченицата дека „Итака никогаш не била цел за себе, туку целта било самото патување". Затоа ми се чини логично и убаво и Горан и „Одисеј" и оваа дива „хорда" да продолжи да патува и понатаму. Верувам дека и во иднина ќе има такви излети, рече тој.

Претставата „Одисеј" ќе се игра на прекрасната сцена на Античкиот театар со почеток од 21 часот.

Регион

Пожар на грчкиот остров Крит во близина на поморската база Суда

Превентивно евакуирани населба, болница и училиште.

Населба, болница и училиште, рано утрово беа превентивно евакуирани поради шумскиот пожар што утрово избувна во близина на поморската база Суда на грчкиот остров Крит, јави дописничката на МИА од Атина.

Во пожарот интервенираат 79 пожарникари со пет пешадиски тима, 22 возила и еден хеликоптер, помагаат припадници на воената морнарица, волонтери и цистерни од општините, а ситуацијата е подобрена и според локалните медиуми не постои активно жариште.

Утрово, преку порака од европскиот број за итни случаи 112 до жителите на областа околу воената база беше побарано превентивно да се евакуираат.

Според локалните медиуми, пациентите од болницата што е во близина биле префрлени во болницата во Ханиа. /МИА

Свет

ОН бара Велика Британија да го преиспита Законот за Руанда

Двајца високи функционери на Обединети нации денеска ја повикаа Велика Британија да го преиспита планот за префрлање на барателите на азил во Руанда, предупредувајќи дека потегот ќе има штетно влијание врз човековите права и заштитата на бегалцитe.

Во заедничката изјава на Високиот комесаријат на ОН за бегалци, Филипо Гранди и Високиот комесаријат за човекови права на ОН, Волкер Турк ја повикаа Велика Британија наместо тоа да преземе практични мерки за справување со нерегуларните текови на мигранти и бегалци.

Новиот закон означува уште еден чекор подалеку од долгата традиција на Велика Британија за обезбедување засолниште за оние на кои им е потребна, што исто така ја прекршува Конвенцијата за бегалци, посочи Гранди.

Тирк, кој претходно го критикуваше планот, наведе дека законот „сериозно го поткопува владеењето на правото во Велика Британија поставува опасен преседан на глобално ниво“.

Запирањето на протокот на мигранти е приоритет за британската Влада, но според критичарите планот за депортирање на луѓе во Руанда наместо да се работи со баратели на азил во Велика Британија е нехуман.

Според политиката формулирана пред две години и договорена со Руанда, секој барател на азил, кој илегално ќе пристигне во Велика Британија ќе биде испратен во Руанда. Тоа ќе важи и за оние кои поднеле барање за азил во Велика Британија и никогаш досега не стапнале на африканскиот континент.

Десетици илјади мигранти, од кои многумина бегаат од војните и сиромаштијата во Африка, Блискиот Исток и Азија, изминатите години стигнаа до Велика Британија поминувајќи го Ла Манш со мали чамци, а организирани од бандите шверцери на луѓе.

Горниот дом на Парламентот вчера го усвои Законот за Руанда со кој се овозможува испраќање на илегалните мигранти во Руанда, каде ќе се обработуваат нивните барања за азил во Велика Британија.

Британскиот премиер Риши Сунак, по усвојувањето на Законот за Руанда, посочи дека „ништо нема да ни застане на патот“ и оти авионите за африканската земја ќе полетаат за 10 до 12 недели.

- Донесувањето на оваа значајна легислатива не е само чекор напред, туку суштинска промена во глобалната равенка за миграцијата. Го воведовме предлог-законот за Руанда за да ги одвратиме ранливите мигранти од опасни премини и да го скршиме бизнис моделот на криминалните банди кои ги експлоатираат. Донесувањето на оваа легислатива ќе ни овозможи да го направиме тоа и многу јасно ќе ни даде до знаење дека ако нелегално дојдете овде, нема да можете да останете, посочи Сунак.

Откако Законот за Руанда ќе добие кралска согласност, што се очекува во наредните денови, ќе започне процесот на ратификација на договорот подготвен со Руанда. /МИА

Свет

Британскиот парламент усвои закон за враќање баратели на азил во Руанда

Сунак објави дека владата резервирала комерцијални чартер авиони и обучила персонал да испраќа мигранти во Руанда.

Британскиот премиер Риши Сунак вчера во денот кога Горниот дом на парламентот го усвои потребниот закон вети дека во рок од 10 до 12 недели ќе започне да испраќа во Руанда баратели на азил за да ги процесуираат нивните барања, што беше одложено со месеци поради парламентарните обиди за промена на планот.

Сунак објави дека владата резервирала комерцијални чартер авиони и обучила персонал да испраќа мигранти во Руанда, политика за која се надева дека ќе ја зајакне неговата Конзервативна партија пред изборите подоцна оваа година.

Домот на лордовите долго време одбиваше да го поддржи нацрт-законот, што нема дополнителни заштитни мерки и беше раздор, но на крајот попушти откако Сунак рече дека владата ќе го принуди парламентот да заседава онолку долго колку што е потребно за да го усвои.

Десетици илјади мигранти, од кои многумина бегаат од војните и сиромаштијата во Африка, Блискиот Исток и Азија, стигнаа до Велика Британија во изминативе години поминувајќи го Ламанш со мали чамци на ризични патувања организирани од банди шверцери на луѓе.

Запирањето на протокот на мигранти е приоритет за владата, но критичарите велат дека планот да се депортираат луѓе во Руанда наместо да се работи со барателите на азил во Британија е нехуман. Тие ја наведуваат загриженоста за состојбата со човековите права во источноафриканската земја и ризикот барателите на азил да бидат вратени назад во земјите каде што се соочуваат со опасност.

И по успешното надминување на парламентарните пречки, Сунак се уште може да се соочи со правни предизвици за законот. /МИА

притисни ентер