Скопските автобуси возат по алтернативни траси поради тековни градежни активности

Поради одвивање градежни активности на крстосницата од булеварот „11 Октомври" со булеварот „Кочо Рацин" возилата од јавниот градски превоз денеска се пренасочени по алтернативни траси на движење.

Како што е објавено на веб-страницата на ЈСП „Скопје", автобуските линии со број 3, 5, 7, 15, 21, 22, 23, 25, 27 се пренасочени од булеварот „Кузман Јосифовски – Питу" (Народна банка) десно по булеварот „Крсте Петков Мисирков", лево на крстосницата кај судот по булевар „Гоце Делчев" и лево кај МНТ, по булеварот „Филип Втори Македонски" до Жена парк, каде се врти десно на булеварот „11 Октомври" и на Рекорд се враќа на траса.

Во обратна насока, од Рекорд автобусите сообраќаат кон Градска болница, каде се врти лево по булеварот „Филип Втори Македонски", кај „Холидеј Ин" се врти десно по улицата „Кеј 13 Ноември" (Дрводекор) и кај Веро Џамбо се враќаат на редовните траси.

Автобусите со број 24 од Припор кон Тафталиџе по подвозникот вртат лево на булеварот „Св. Кирил и Методиј" (од кај Рамстор) десно по булеварот „Св.Климент Охридски" и лево на булеварот „Партизански одреди" возилата се враќаат на траса. Од Тафталиџе кон Припор возилата од булеварот „Партизански одреди" вртат десно по булеварот „Св.Климент Охридски" (од кај Европски универзитет), лево по улицата „Јордан Мијалков" и на улицата „Антон Попов" се враќаат на траса.

Линијата 9 од Клинички центар кон Скопје Север на крстосницата кај Тутунски комбинат продолжува право по булеварот „Карпошово востание", десно по булеварот „Трета македонска бригада", лево по булеварот „Никола Карев" (Транспортен центар), каде врти лево по булеварот „Кузман Јосифовски – Питу" (Народна банка) и десно кај МАНУ се враќа на траса. Од Скопје Север кон Клинички центар од Битпазар врти десно по булеварот „Гоце Делчев", кај МНТ лево по булеварот „Филип Втори Македонски" и кај Жена парк врти десно на булеаврот „11 Октомврии" низ центар од кај Европски универзитет кон Клинички центар.

Автобусите со број 31,41,67,74,51,70,58  во правец кон Транспортен центар кај Тутунски комбинат вртат десно по улицата „Карпошово востание", десно по булеварот „Трета македонска бригада" и лево по булеварот „Никола Карев" до Транспортен центар. Во обратна насока сообраќаат по истата траса.

За автобуската линијата 16 од Железара кон Пржино, од Жена парк возилата се пренасочени десно низ центар, лево по булеварот „Св.Климент Охридски" (Европски универитет), лево по улицата „Јордан Мијалков" од каде продолжуваат по својата редовна траса. Од Пржино кон Железара, возилата сообраќаат на булевар „Кочо Рацин", по подвозникот вртат лево по булевар „Св.Кирил и Методиј" (Рамстор) десно на булевар „Св.Климент Охридски", десно на булевар „Димитрие Чуповски" и право до Градска болница, каде се врти лево и продолжуваат по трасата.

Автобусите со број 4 и 4а од населбата „11 Октомври" кон Тафталиџе и Хром, од село Усје, од булеварот „11 Октомври" е пренасочена од булеварот „Борис Трајковски" десно по булеварот „Карпошово востание", десно по булеварот „Трета македонска бригада", лево по булеварот „Никола Карев" (Транспортен центар), лево по булеварот „Кузман Јосифовски – Питу" (Народна банка), десно по булеварот „Крсте Петков Мисирков" (МАНУ), лево на крстосницата кај судот по булевар „Гоце Делчев" и лево кај МНТ, по булеварот „Филип Втори Македонски" до Жена парк, каде врти десно на булеварот „11 Октомври" и на Рекорд се враќа на трасата.

Од Хром, Тафталиџе кон 11 Октомври и село Усје, автобусите кај Градска болница вртат лево и продолжуваат право до хотелот „Холидеј Ин", каде вртат десно по улицата „Кеј 13 Ноември" и право кон Транспортен центар, каде врти десно по булеварот „Никола Карев", десно на булеварот „Трета македонска бригада", лево на булеварот „Карпошово востание", лево на булеварот „Борис Трајковски" и по старата траса. /МИА

Трамп: Ловот на вештерки мора веднаш да престане !

Доналд Трамп денеска не го криеше својот гнев откако  сведочеше неговиот амбасадор во Европската Унија пред  Конгресот како дел од истрагата за отповикување на претседателот , барајќи веднаш да се „прекине“.

„Овој лов на вештерки мора да запре СЕГА. Тој е толку штетен за нашата земја“, напиша американскиот претседател на Твитер.

Знаците на нервоза што ги покажа Доналд Трамп на денот на сослушувањето на главниот учесник во случајот, што фрла сенка врз неговата реизборна кампања, се противречни на неговите изјави пред два дена кога рече дека размислува сам да поднесе  докази.

„Конгресменката, Нанси Пелоси, предложи да сведочам во истрага за лажното отповикување. Таа дури рече дека можам да го сторам тоа писмено“, напиша тој во понеделникот.

„Иако не сум сторил ништо лошо и не сакам да и придавам значење на оваа пародија на судството, ми се допаѓа идејата“, додаде тој. „Јас сериозно ќе размислам за тоа“.

Гордон Сондленд, дипломат близок на американскиот претседател, беше интервјуиран денеска во Конгрес и беше испрашуван директно за контроверзните тврдења против Украина кои доведоа до покренување истрага за отповикување на Трамп.

Сондленд, американски амбасадор во Европската Унија, рече дека смета оти Трамп навистина условувал билатерална средба со неговиот украински колега Володимир Зеленски за Киев да покрене истрага за демократите во САД за корупцијата.

Тој исто така рече дека е убеден дека голема воена помош за Украина зависи од започнувањето на овие истраги, иако призна дека Трамп не му кажал ништо за поврзаноста.

Најмалку 15 загинати во напад врз камп и болница во Сирија

Во напад на сириските владини сили во северозападниот регион Идлиб, кој сè уште го држат бунтовниците, загинаа најмалку 15 лица во кампот за раселени и десетици се повредени, пренесе Ројтерс.

Северозападниот дел на Сирија, вклучувајќи го и регионот Идлиб, е последниот голем дел од територијата што ја окупираат бунтовниците по повеќе од осум години војна.

Според извештајот на „Вајт Хелметс“, спасувачка група позната како Сириска цивилна одбрана, кампот, лоциран во Каху, град на турската граница, бил нападнат од Алепо.

Сириската опсерваторија за човекови права соопшти дека провладините сили исто така ја нападнале и болницата во градот. Медицинското здружение на Сирија соопшти дека вработени во болницата биле повредени, а зградата е оштетена.

Швајцарија поради екстремизмот ја отежнува набавката на хемикалии

Швајцарскиот федерален совет сака да го отежни набавувањето хемикалии како што се ѓубрива, средства за чистење на базени и растворувачи што можат да ги користат екстремистите за напади.

Предлогот на седумчлениот Федерален совет ќе бара одобрение од сојузната полиција за отежнато купување на околу 100 производи што сега се продаваат во аптеките, продавниците за алати и специјализираните продавници.

Земјоделците и некои други сектори ќе бидат изземени, објави АП.

Парламентот ќе расправа напролет за овој предлог.

Советот истакна дека продажбата на производи како што се водороден пероксид или нитрат е ограничена во Европската унија од 2014 година.

Швајцарија не е членка на европскиот блок, но граничи со четири земји членки на ЕУ.

Во денешното соопштение, швајцарската влада соопшти дека е свесна за ризикот одредени хемикалии што се продаваат во Швајцарија да ги користат терористите.

притисни ентер