Изменетиот Закон за возила стапува во сила без целосно дефинирани критериуми

Во сила стапи Законот за измени и дополнување на Законот за возила со кој се предвидува субвенционирање на граѓаните што ќе набават ново или половно возило со EURO 5 или повисоки еколошки стандарди.

Субвенции за вградување на плински или метанов уред во возилата со EURO 4 и понизок стандард и воведување на еколошки налепнции за возилата. Сепак, условите и критериумите за субвенции за набавка на возило се уште не се утврдени, а одредбата за еколошки налепници има одложено дејство и ќе стапи на сила по 12 месеци.

-Условите и критериумите за субвенција на возила ќе се одредат во Програма за субвенционирање која ќе биде донесена и објавена од страна на Владата. Во нив ќе се прецизира колку пари ќе се субвенционира за набавка на возило со EURO 5 стандард и повеќе, дали висината на субвенцијата ќе зависи од набавната цена и како ќе се утврдува за половни возила, како и дали ќе се субвенционираат и граѓаните кои сами ќе набават возило од странство, велат од Министерството за економија.

Според нив, откупот на старо возило ќе биде единствен услов за добивање субвенција за ново возило и се уште не е прецизирано дали субвенционирањето ќе биде по принципот „прв дојден, прв услужен" или ќе добива секој без разлика колку ќе купат нови возила. Во моментов во соработка со другите министерства, посочуваат, се разгледува и дали субвенцијата ќе се добива откако претходно граѓанинот целосно ќе го плати новото возило или на некој друг начин.

Во законското решение се предвидени 170 милиони денари за субвенционирање на вградување на плински и метанов уред во возилата со EURO 4 стандард и помалку, како и за купување на половно или ново возило со повисоки еколошки стандарди по системот старо за ново. Првично овие средства беа предвидени за субвенционирање на набавка на нови хибридни и електрични возила, но со амандманите решението се преиначи. Сепак, оние што ќе купуваат хибридни и електрични возила ќе можат да користат субвенции од програмата старо за ново возило.

Лани во земјава биле регистрирани 477.350 возила, од кои околу 60 отсто се дизел автомобили. Од нив 90 отсто се постари од 10 години.

Бектеши: Ќе се субвенционира и набавка на половни возила со EURO 5 или повисок стандард

Министерот за економија Крешник Бектеши во интервју за ТВ Алсат најави дека се предвидува да се субвенионира и набавка на половни возила со EURO 5 и повисок стандард од салоните на импортерите на половни возила по принциопот старо за нова, а единствен услов за тоа е да се одјави претходното возило.

Тој неодамна ги презентираше измените во Законот за возила и посочи дека се плод на барањата на граѓаните за намалување на загадување на воздухот од страна на возилата и се однесуваат за две важни подрачја, сообраќајот и екологијата. Прецизира дека субвенционирањето се очекува да почне од наредната година, но додаде дека е можно да се случи и порано доколку се обезбедат средства со најавениот ребаланс на Буџетот.

Бектеши појасни дека со измените се воведуваат субвенции за вградување на уреди на течен нафтен гас (плин) или компримиран земјен гас односно метан, субвенции за купување на ново возило илиполовно возило што ги задоволува повисоките еколошки стандарди, ако претходно користеното се одјави. Се воведува и еколошка категоризација на возилата во зависност на стандардите кои ги исполнуваат. Тие доброволно ќе се одбележуваат со зелена, жолта и црвена налепница, а се воведуваат и жолти регистарски таблички за таксистите и унифицирана светлечка табла за такси возилата.

-Со мерката за субвенционирање на трошоци за вградување на уред за погон на ТНГ, метан или друг вид на алтернативно гориво во постоечките возила се предвидува да се субвенцинира 50 отсто од цената на трошоците за набавка и вградување на уредот, но не повеќе од 300 евра во денарска противвредност за возило и се предвидува да бидат опфатени над 1.200 возила на годишно ниво, рече тогаш Бектеши.

За мерката за субвенционирање на купување на ново лили половно возило со одјава на старо возило, додаде, се предвидуваат субвенции од две до три илјади евра во денарска противвредност, како и во првата година да се субвенционира набавката на 200 до 500 возила. За еколошката категоризација на возилата истакна дека ќе биде на доброволна база и ќе има три категории со различни бои на налепници. На барање на здруженијата за автотакси превоз се воведуваат жолти таблици за такси возилата, со цел да се препознаваат лиценцираните и регистрираните такси возила, и да се спречи нелојалната конкуренција.

Еколошката категоризација на возилата со одложено дејство од 12 месеци

Новиот Закон за возила предвидува доброволна еколошка категоризација на возилата со зелена, жолта и црвена еколошка налепница. Оваа одредба од законот има одложено дејство и ќе стапи на сила по 12 месеци. Ограничувањата за движење на возилата во периодот на зголемена загаденост на амбиенталниот воздух ќе ги одредува локалната самоуправа на одредени делови од градовите. Во деновите кога ќе има забрана за движење на возилата ќе може да сообраќаат само возилата со зелена еколошка маркица, но не и возилата кои имаат EURO 5 или повисок еколошки стандард што не се 3означени со еколошки маркици.

-Првата еколошка категорија ќе ги опфаќа возилата со ниво на емисија на издувни гасови EURO 5 и повисоко, како и возилата со EURO 4 и EURO 3 кај кои е вграден уред за погон на течен нафтен гас или на компримиран земјен гас, хибридните возила и електричните возила, но и возилата кои имаат вградена опрема што ја намалува емисијата на гасови во воздухот и ги достигнуваат стандардите на EURO 4, EURO 5 и повисоко. Втора еколошка категорија ќе ги опфаќа возилата со EURO 4 и EURO 3 стандард, а трета возилата со EURO 2 и понизок стандард, како и возилата за кои производителот нема дефинирано емисија на издувните гасови, информираше неодамна министерот за економија Крешник Бектеши.

Во новиот Закон за возила се вели дека зелена еколошка налепница ќе можат да добијат возилата што го исполнуваат стандардот EURO 5 и повеќе, но и возила со EURO 4 и EURO 3 стандард во кои е вграден плински или метанов уред, како и хибридните и електричните возила. Од категоризацијата се изземаат возилата на војската, полицијата, пожарната и брзата помош, како и возила во кои се возат лица со попреченост. Тие ќе можат да се движат и во зоните каде има забрана за движење поради загаденост на воздухот. Трошокот за еколошката налепница ќе биде на товар на граѓаните, а за издавање на погрешна еколошка маркичка предвидена е глоба од 250 евра во денарска противвредност за одговорното лице во техничката служба.

ССК не гледа потреба од субвенции за набавка на половно возило

Сојузот на стопански комори на Македонија (ССК) го поздрави донесувањето на новиот Закон за возила со кој се предвидуваат субвенции за набавка на возила со повисоки еколошки стандарди, но не гледа потреба од субвенционирање на набавката на половни возила.

-Оваа мерка има два аспекта – социјален и еколошки. Веруваме дека треба да бидат запазени двата истовремено, но не ја гледаме потребата во делот за субвенционирање на половни возила. Сепак, сметаме дека треба да се задржи социјалниот аспект, но истовремено да се поткрепи со еколошкиот, односно да им се овозможи на граѓаните со субвенционирање и со обезбедување бескаматни кредити да можат да си дозволат да ги заменат старите возила со нови што нема да имаат импакт врз животната средина, вели претседателката на ССК Данела Арсовска.

Таа истакнува дека во светот имало вакви практики, но само за возила што не ја загадуваат или минимално ја загадуваат животната средина.

-До сега не сме имале пракса за субвенционирање половни возила, ниту во Европската Унија, ниту, пак,во поблиската околина и не знам дали можеби Министерството за економија има информации и конкретни примери каде е применето или спроведено такво нешто. Сепак, бидејќи мерката важи и за нови возила веруваме дека е добра, но сметаме дека нејзините крајни ефекти треба да ги опфатат светските практики за намалување на емисијата на штетни гасови во атмосферата. Тоа се постигнува само со мерки што се добро осмислени и долгорочни со кои возилата што загадуваат се исфрлаат надвор од сообраќајот, потенцира Арсовска./МИА.

Американската компанија ,,Атари” отвора хотел , рај за гејмери

Американската компанија Атари е основана пред скоро половина век и е една од најголемите производители на конзоли и компјутерски игри.

На нивната веб-страница прикажаа планови да изградат низа хотели кои на гостите ќе им понудат незаборавно уживање во различни типови игри, вклучувајќи модерни типови на виртуелна реалност, пренесува „Унилад“.

Засега се најавени Лас Вегас, Денвер, Чикаго, Остин, Сиетл, Сан Франциско и Сан Хозе, додека првиот хотел ќе биде изграден во Феникс, Аризона.

Дизајнот на хотелот им беше доверен на Шели Марфи и Наполеон Смит III, продуцент на филмот „Ninja Turtle“ во 2014 година.Тој посочува дека проектот има намера да донесе носталгија и ретро стил за да одговара на современите трендови.

Водечките луѓе на Атари се убедени дека ќе има уште многу да се направи, што е поддржано и со извештајот за 2019 година, според кој гејмерите ширум светот потрошиле скоро 140 милијарди евра на игри.

"Атари е глобален бренд популарен кај луѓето од сите возрасти, без оглед на потеклото или културата. Со нетрпение очекуваме да ги видиме нашите фанови да уживаат во овој нов концепт на хотел со своите семејства", рече Фред Чеснас, извршен директор на компанијата.

Братот на позната раперка е осуден на 25 години затвор за силување девојче (ВИДЕО)

Братот на раперката Ники Минаж, Џелани Мараџ, е осуден на 25 години затвор за силување малолетно девојче.

Неговата паштерка имала само 11 години, а Џелани постојано ја силувал додека нејзината мајка и негова сопруга била на работа.

Џелани Мараџ е прогласен за виновен за „предаторски сексуален напад врз дете“, и покрај тоа што неговата позната сестра се изјаснила писмено до судијата за да му ја промени казната, па сепак тој заработи 25 години зад решетки. Во писмото, Ники изјавила дека нејзиниот брат е „најстрпливиот, нежен, најискрен и несебичен човек што го познава“.

„Го уништивте ова дете силувајќи го постојано“, рече судијата.

Мараџ доби и дополнителна казна за загрозување на дете од  364 дена.

Жртвата, која денес има 14 години, сведочеше дека ја силувал четири пати неделно, а понекогаш и двапати на ден. Таа му рекла на судијата дека поради тоа размислувала за самоубиство, пренесува Дејли Меил.

„Мислев дека нема да можам да издржам повеќе ниту еден ден. Се чувствував како никој да не ме слуша“, рече таа.

Девојчето изјави дека не се осмелувала да каже ништо затоа што Мараџ и се заканил дека ќе ја избрка мајка и и дека никој нема да и верува. Се излезе на виделина кога нејзиниот брат на училиште пријавил дека го видел Мараџ како ја допира неговата  сестра. Тој беше уапсен во 2015 година.

Мараџ упорно тврдеше дека е невин, и призна пред судот дека имал проблем со алкохолот и побара милост.

Како ќе изгледа авионскиот превоз од иднината? (ФОТО)

Од хиперповрзаната персонализирана кабина на иднината до ротирачките седишта што ја зголемуваат економијата и удобноста, годинашниот избор на награди „ Crystal Cabin “ донесе бројни иновации во авионите.

Дизајнерите кои стојат зад овие иновативни решенија се бореа да ја трансформираат внатрешноста на авионот, а со тоа и да станарт добитници на една од најпрестижните награди во авијациската индустрија.

Над 100 проекти што учествувале на натпреварот, во категории како „забава и поврзаност“ и „визионерски концепти“ ќе бидат претставени во март 2020 на годинашната изложба на авиони во Хамбург, Германија.

Во последниве години, потребата да се трансформира искуството од економска класа се зголемува. Се додаваат крилја на седиштата за дополнителна приватност и удобност на патниците, а инженерската фирма Heinkel Group го воведе концептот Flex Lounge, што подразбира флексибилна конфигурација за седење.

 По полетувањето, патниците можат да ги преуредат редовите така што ќе можат да седнат еден до друг, дозволувајќи им на семејствата, пријателите или соработниците да патуваат заедно порелаксирано.

Adient Aerospace предложи нов дизајн на седиштата, наречен простор за сите. Според нивното гледање, трите места во предниот дел на авионот имаат механизми кои овозможуваат седиштата да се претворат во лежаи што патниците ќе можат да ги извлечат.

Седиштата Ciara Crawford ROW1, прават инвалидските колички да се вклопуваат, овозможувајќи попогодна употреба и поголема достапност за лицата со посебни потреби.

Новата генерација на концептот Airbus Cabin Airspace Cabin Vision 2030, покрај тоа што нуди пофлексибилни конфигурации за седење и спиење, вклучува и дигитално опкружување кое им овозможува на патниците ново искуство во кабината.

Германската компанија AERQ исто така предлага да се користи технологијата на иновативен начин, дозволувајќи им на OLED-екраните да бидат поставени во одредени авиони со информации што им се потребни на патниците. Бидејќи авиокомпаниите се соочуваат со зголемена потреба за одржлив бизнис, се појавија предлози за решавање на проблемот со животната средина.

PriestmanGoode предложи Zero послужавник со цел да се намали количината на пластичен отпад што е резултат на еднократната употреба на приборот за јадење.

Наместо пластичен материјал, Zero се состои од јадливи, биоразградливи делови што можат да бидат компостирани.

Добитникот на наградата „Crystal Cabin“ ќе биде објавен на 31 март.

притисни ентер