Македонија

Трибина на ДОМ во Крушево: Придобивки од развојот на еко-туризмот

Зелената партија ДОМ одржа трибина во Крушево за придобивките од развојот на еко-туризмот. На трибината присуствуваа претставници од институциите, граѓански здруженија и угостителскиот сектор.

Во своето воведно обраќање, претседателката на ДОМ, Маја Морачанин зборуваше за значењето на еко-туризмот кој за разлика од масовниот туризам, истовремено овозможува заштита на животната средина и биодиверзитетот и економски бенефит, особено за локалното население.

"Со раст од 50% на бројот на туристи во мината година Крушево е добар пример како еко-туризмот може да придонесе за економски бенефит на локалното население. Тоа пред се, се должи на подемот на параглајдерството, алпинизмот, планинскиот велосипедизам и други форми на активен туризам"-рече Морачанин.

Директорот на Агенцијата за промоција и поддршка на туризмот, Љупчо Јаневски ги истакна позитивните резултати од поддршката која Агенцијата ја обезбедува за развој на еко-туризмот. Особено значајни се финансиската помош за полетувалиштето за параглајдерство, ознаките за велосипедски и планинарски патеки, како и промоцијата на Крушево како туристичка дестинација на голем број меѓународни саеми за туризам.

Државната секретарка во Министерството за животна средина и просторно планирање, Ана Петровска говореше за значењето на управувањето со отпадот за квалитетот на живот на граѓаните, но и како предуслов за развој на туризмот. Таа го презентираше планот за управување со цврст отпад во Пелагонискиот регион, што ќе овозможи затворање на дивите депонии и изградба на регионална санитарна депонија во Суводол.

Претставникот од општина Крушево, Сотир Габелоски ги презентираше веќе реализираните и проектите кои општината ги планира за следниот период, со цел изградба на туристичка инфраструктура, подобрување на јавната хигиена и промоција на туризмот. Еден од најголемите предизвици е решавањето на деценискиот проблем со водоснабдувањето на Крушево.

Претставничката од параглајдерскиот клуб Хели ХЦ, Кристина Пејчиновска истакна дека во тек на петмесечната сезона, околу 2000 параглајдеристи престојувале во Крушево. Таа се осврна на потребата за постојано присутна спасувачка екипа, наплата на такса за летање, комуникација со контролата на летање, обезбедување на паркинг на полетувалиштето, како и слетувалиште за параглајдеристите и туристички мапи за посетителите.

Во текот на двочасовната конструктивна дискусија присутните истакнаа дека евидентни се позитивните резултати од реализираните активности и ги дефинираа потребните мерки кои институциите треба да ги преземат за понатамошен развој на еко-туризмот во Крушево./МИА

Свет

Мадуро размислува повторно да се отвори Канцеларијата на ОН за човекови права во Венецуела

Мадуро најави дека е подготвен да се сретне со претставникот на Канцеларијата на ОН за човекови права.

Венецуелскиот претседател Николас Мадуро најави дека е подготвен да се сретне со претставникот на Канцеларијата на ОН за човекови права, откако претходно, во февруари, венецуелската Влада побара од вработените во Канцеларијата да ја напуштат земјата во февруари.

-Добив предлог за повторно отворање на Канцеларијата на високиот комесар на ОН за човекови права во Венецуела и се согласувам дека треба да ги надминеме нашите разлики, изјави Мадуро за венецуелската национална телевизија, за време на заедничкиот говор со главниот обвинител на Меѓународниот кривичен суд, Карим Кан.

Мадуро додаде дека е подготвен наскоро да се сретне со Фолкер Тирк и дека претставникот на Канцеларијата е добредојден да дојде на разговори за разликите што ги имаат и начините за надминување на конфликтот што произлезе.

Откако кон средината на февруари од персоналот на Канцеларијата за човекови права на ОН беше побарано да ја напушти Венецуела, владата најави дека во рок од еден месец ќе ги ревидира техничките услови за соработката.

Венецуелската влада потоа го критикуваше „колонијалистичкиот, навредлив и насилен однос“ на ОН, откако специјалниот известувач рече дека венецуелската програма за храна не се занимава со основните причини за гладта во земјата, потсетуваат британските медиуми. /МИА

Свет

Рускиот свештеник кој држеше опело за Навални отстранет од црквата на три години

Тој ќе биде префрлен и во друг храм во Москва, каде што ќе ги извршува должностите на црковен помошник.

Рускиот православен свештеник кој во март одржа комеморација во спомен на починатиот руски опозициски лидер, Алексеј Навални е суспендиран на три години од извршувањето на неговите духовни должности, соопшти Московската епархија на Руската православна црква, цитирана од британските медиуми.

Во соопштението, кое беше објавено вчера на веб-страницата на епархијата, не е наведена причината за казната за отец, Дмитриј Сафронов, со која му се одзема правото да дава благослов и да носи расо и свештенички крст до 2027 година.

Тој ќе биде префрлен и во друг храм во Москва, каде што ќе ги извршува должностите на црковен помошник.

-По истекот на периодот на покајание (казна - забелешка изд.), врз основа на повратните информации од местото на послушанието, ќе се донесе одлука дали е можно тој да продолжи со свештеничката служба, наведуваат од епархијата.

На 26 март, Сафронов одржа комеморација на која присуствуваа илјадници луѓе за Навални, кој беше најжесток критичар на руската територија на претседателот Владимир Путин и кој почина во февруари на 47-годишна возраст во казнена колонија на Арктикот. /МИА

НБА

Тајрис Макси е играчот со најголем напредок во НБА

 Како што се ближи крајот на натпреварувањето во НБА лигата, така се повеќе се зборува за индивидуалните награди. Првата веќе пристигна.

Кошаркарот на Филаделфија, Американецот Тајрис Макси е добитник на наградата за играч кој најмногу напредувал во изминатиот период, објавено е на веб-страницата на НБА.

Мекси (23) доби повеќе гласови во финалниот избор од Коби Вајт од Чикаго и Алперен Шенгун од Хјустон. Наградата се доделува од 1985 година.

Минатата сезона победник беше Лаури Марканен од Јута, а меѓу оние кои досега ја освоија оваа награда се Горан Драгиќ, Паскал Сиакам, Јанис Адетокумбо, Пол Џорџ, Трејси Мекради, Зек Рендолф, Хидает Туркоглу итн. /MИА

притисни ентер